Ha̍p-kâi Sû 2

Sîn Sṳn-thien ke Yùng-kông

1Ke-ngièn chhit-ngie̍t ngi-sṳ̍p yit, Song-chú yu thûng-ko siên-tî Ha̍p-kâi kóng-fa. 2Kì oi Ha̍p-kâi hi lâu Yù-thai sén-chóng Só-lò-pâ-pak, thai-chi-sṳ̂ Yok-sû-â, pin ke-têu chhûn hâ-lòi ke ngìn-mìn kóng: 3“Ngì-têu tông-chûng yû má-ngìn hàn ki-tet liá sṳn-thien thèu-pái he ngióng-pân yùng-kông? Liá-ha he ngióng-pân hìn? Kám m̀-he tông khon m̀-sông ngién? 4Chúng-he, Só-lò-pâ-pak â, Ngài — Song-chú khien ngì, ngì oi kông-khiòng! Thai-chi-sṳ̂ Yok-sû-â â, ngì ya oi kông-khiòng! Liá thi-fông ke ngìn-mìn â, Ngài — Song-chú me khien ngì-têu, ngì-têu oi kông-khiòng, oi sat-mâng cho-kûng, yîn-vi Ngài — Song-chú, Van-kiûn ke Ngièn-soi lâu ngì-têu khiung-ha. 5Ngì-têu ke chú-siên tui Âi-khi̍p chhut-lòi ke sṳ̀-chiet, Ngài sṳt lâu kì-têu#2:5 “Ngì-têu ke chú-siên tui ... lâu kì-têu”: Hî-pak-lòi-vùn chhṳ̍t-yi̍t he “Ngì-têu tui ... lâu ngì-têu”. li̍p liá-ke yok. Ngài ke Lìn liá-ha hàn-he lâu ngì-têu khiung-ha, só-yî m̀-sṳ́ kiâng.

6“Ko mò kí-kiú, Ngài — Song-chú, Van-kiûn ke Ngièn-soi oi chai yit-pái yèu-thung thiên-thi, thai-hói lâu liu̍k-thi. 7Ngài oi yèu-thung van-koet, chiông van-koet ke pó-vu̍t tai-to liá-vi lòi, sṳ́ liá sṳn-thien chhûng-mân yùng-yeu. Liá he Ngài — Song-chú, Van-kiûn ke Ngièn-soi kóng ke. 8Sṳ-kiên só-yû ke ngiùn-è, kîm-é chhiòn-phu su̍k Ngài — Song-chú, Van-kiûn ke Ngièn-soi. 9Liá sîn hí ke sṳn-thien voi pí khiu ke hàn-kha yùng-kông; Ngài oi pûn Ngài ke ngìn-mìn chhai liá-vi ko ôn-kî lo̍k-ngia̍p ke sên-fa̍t. Ngài — Song-chú, Van-kiûn ke Ngièn-soi án-ngiòng siên-pu lé.”

Siên-tî Chhiáng-mun Chi-sṳ̂

10Thai-liù-sṳ cho fòng-ti thi-ngi ngièn kiú-ngie̍t ngi-sṳ̍p-si ngit, Song-chú — Van-kiûn ke Ngièn-soi yu lâu siên-tî Ha̍p-kâi kóng-fa. 11Kì kóng: “Ngì hi chhiáng-kau ke-têu chi-sṳ̂ yû-koân fap-li̍t ke mun-thì: 12Na-he yû-ngìn nâ-chhut yit-te fûn-phe̍t vì-sṳn ke ngiuk, yung kì ke sâm-pha pâu hí-lòi, heu-lòi liá sâm-pha pen-tó piáng, thông, chiú, kám-lám-yù ya-he phe̍t ke sṳ̍t-vu̍t, liá-têu sṳ̍t-vu̍t son he sṳn-vu̍t mò?”

Chi-sṳ̂ en-kóng: “M̀ son.”

13Ha̍p-kâi yu mun: “Na-he yû-ngìn pen-tó sṳ̂-thí, tá-lá-sap chhṳ-kâ, yî-heu kì miâ-tó liá-têu sṳ̍t-vu̍t, liá-têu sṳ̍t-vu̍t chhiu son mò chhiang-li he-mò?”

Chi-sṳ̂ en-kóng: “Son mò chhiang-li.”

14Só-yî, Ha̍p-kâi chhiu kóng: “Song-chú kóng: ‘Liá chhìn-khóng cho-tet sṳt-yung chhai liá koet-kâ ke ngìn-mìn lâu kì-têu kok-yong ke kûng-chok; kì-têu hien chhai chi-thàn táng ke tak-hong tûng-sî chhiòn-phu he mò chhiang-li ke.’ ”

Song-chú Yin-hí Su-fuk

15Song-chú kóng: “Kîm-pû-ngit, ngì-têu oi hó-hó sióng khon-é! Màng khôi-sṳ́ chhùng-kien sṳn-thien yî-chhièn ke chhìn-hìn, 16chhai ke sṳ̀-chiet, yû-ngìn lòi-to kuk-tôi, hî-mong tet-tó lióng-pak kûng-kîn, chang tet-tó yit-pak kûng-kîn. Yû-ngìn lòi-to chiú-fòng, sióng-oi tet-tó yit-pak kûng-sṳ̂n chiú, chang tet-tó si-sṳ̍p kûng-sṳ̂n. 17Ngì-têu sú só-cho ke kûng-chok, Ngài yung sêu-fûng, sâng-kû, pên-pho̍k kûng-kit ngì-têu, ngì-têu hàn-he m̀-hén fí-kói. 18Kîm-pû-ngit he kiú-ngie̍t ngi-sṳ̍p-si ngit#2:18 “kiú-ngie̍t ngi-sṳ̍p-si ngit”: Cheu hien-thoi ke ngit-la̍k lòi son he kûng-ngièn chhièn ńg-pak ngi-sṳ̍p ngièn sṳ̍p-ngi ngie̍t sṳ̍p-pat ngit., he sṳn-thien tá thi-kî ke ngit-è. Ngì-têu oi hó-hó sióng khon-é! 19Sûi-yèn kuk-chhông tú màng yû kuk, phù-thò-su, vù-fâ-kó-su, sa̍k-liù-su, kám-lám-su hàn-màng kiet kó-chṳ́, chúng-he tui kîm-pû-ngit khôi-sṳ́, Ngài oi su-fuk pûn ngì-têu.”

Song-chú tui Só-lò-pâ-pak ke Yin-hí

20Khiung-ngit, chhiu-he kiú-ngie̍t ngi-sṳ̍p-si ke-ngit, Song-chú thi-ngi pái lâu Ha̍p-kâi kóng-fa, 21ham kì lâu Yù-thai sén-chóng Só-lò-pâ-pak kóng: “Ngài oi yèu-thung thiên-thi. 22Ngài oi thûi-fân van-koet, sêu-me̍t kì-têu ke sṳ-li̍t. Ngài oi súng-vang kì-têu ke chan-chhâ lâu sṳ́-chhâ ke ngìn; mâ-é ya oi vang-sí chhiang-chhiang, khì-pîn fu-siông chhàn-sat. 23Ngài ke phu̍k-ngìn Só-lò-pâ-pak â, chhai ke-ngit, Ngài — Song-chú, Van-kiûn ke Ngièn-soi oi sién-seu ngì. Chhiong koet-vòng tun vòng-yin lòi thúng-chhṳ, Ngài oi chṳ́-phai ngì, fung Ngài ke miàng lòi thúng-chhṳ, yîn-vi ngì he Ngài só kién-sién ke. Ngài — Song-chú, Van-kiûn ke Ngièn-soi án-ngiòng siên-pu lé.”

Currently Selected:

Ha̍p-kâi Sû 2: THV12Rdb

Highlight

Copy