Mataị 2
2
Abamanyandōndwa aba bāfụmịle kubusōkelo
1Lelo bo Jesụ apāpị̄gwe nkāja mụ Betelehemụ, nkisu kya mụ Jụtaị nkabalilo ka Malafyale Helotị, balinkuboneka mụ Jelụsalemụ abamanyandōndwa aba bāfụmịle kubusōkelo ilị̄suba, balinkulālūsya balinkuti: 2Ali kūgu umalafyale gwa Bajụ̄ta uju apāpị̄gwe? Tulubwene ulutōndwa lwake kubusōkelo ilị̄suba, lelo twịsịle kukubụngụlụka kumyake. 3Bo umalafyale Helotị apilị̄ke sịsịsị alinkwenda nukutēnguka mụ̄nda, bope naba mụ Jelụsalemụ akāja kōsa, balinkunyomokela lumo nagwe; 4po papo alinkubabūnganịa bōsa nabapụ̄tị abakulūmba na bamanyandagilo ba mbany'Ịsịlaelị alinkubānịa alinkuti: Kali mo mōkị mụno bạ̄tigi ịsakupāpịgwaga Kilisịtị? 5Abēne balinkummwamụla balinkuti: Mo mụ Betelehemụ nkị̄su kya mụ Jụtaị, namanga syo isị āsị̄mbịle unkụ̄ngụlụka ātịle.
6Nanụngwe gwe Betelehemụ nkị̄su kya Jụ̄ta
ukaja gwe nnāndi napanāndi kutwaja
utukulūmba twa mwa Jụ̄ta;
buno mmyako mo ịsakufụmaga unndōngosị,
ugwakubalagila abāndu bāngu abany'Ịsịlaelị.
7Po papo Helotị alinkubabilikila kubutị̄tu abamanyandōndwa alinkubalālūsya akabalilo aka ulutōndwa lwabonekị̄le. 8Po lelo alinkubatuma ku Betelehemụ alinkuti: Amụbūke mụkanndōnde fị̄jo umwanịke jujuju; linga mụmmwagịle mwịsemụmbūle, nanịne ukuti nịsembūke kukubụngụlụka kumyake. 9Abēne lelo bo bapilị̄ke isị kumalafyale balinkubūka. Po papo balinkunyomoka ulutōndwa ulu bālubwene kubusōkelo ilị̄suba lubalōngolị̄le nkyenị; lulinkwakwima pamwanya papo ālipo umwanịke. 10Lelo bo balubwene ulutōndwa balinkusekela fị̄jo nalolị. 11Balinkwịngila nnyụ̄mba balinkummwaga umwanịke na junna Malịja, balinkufụgama pāsi balinkubụngụlụka kumyake; balinkusakula ifyuma fyabo, balinkummbonola Sahabu nalubanị nunkota unkali ugu bịkuti jo mịla īngamụ. 12Bo basokịgwe na Kyala mụ njōsị ukuti bo bịkugomoka bāngēndaga ija pa Helotị, balinkwenda īnjila ijīngi ukubūka kumyabo.
13Lelo bo babukịle ugwandumị gwa NTWA alinkunsetukila Josefụ mụnjosị alinkummbūla alinkuti: Sụmụkaga ummwegege umwanịke na junna, ujōngelege mw'Egịpịtị, mo ukajege bwịla ukwịsakufịka papo nịsakukubūlilaga jujune ukusōkamo. Helotị ịkunndōnda umwanịke, ịkulōnda ukuti anngoge. 14Po papo Josefụ alinkusụmụka alinkummwega umwanịke na junna pakilo alinkujōnga nabo ukubūka mw'Egịpịtị. 15Alinkuja mụmo bwịla ukwịsakufịka papo afwilege Helotị; syabōmbị̄gwe sịsịsị ukuti mo sị̄silege isị UNTWA ājobịle mụ nkụ̄ngụlụka apa ạ̄tigi:
Nummbilikị̄le umwanāngu ukufụma mw'Egịpịtị.
Ukugogịgwa kwa bāna
16Lelo bo Helotị āgịle bansyobịle abamanyandōndwa alinkukalala fị̄jo. Alinkutuma abakwakubagoga abāna bōsa abalumyana mụ Betelehemụ na nkị̄su kyosa iki kipalamēne na Betelehemụ ukufụma pabafyinja fịbili ukwakufịka pabafyele. Balinkugelela pakabalilo kāko abamanyandōndwa bālinndīngēnịe Helotị, aka lwabonekị̄le ulutōndwa. 17Bo syatēndịke bunobuno ukwịsa isị unkụ̄ngụlụka Jelemịja ājobịle apa ạ̄tigi:
18Īngụ̄to jikụ̄tịlwe mụ Lama
Kwịlilisya kutupu, kuhihīla kutupu, mfwa ngulūmba
Lahelị ịkulilila abānāke,
ịkukāna nukunsūbisya.
Ukugomoka ukufụma mw'Egịpịtị
19Lelo bo afwịle Helotị, ugwandumị gwa NTWA alinkunsetukila mụnjosị Josefụ mw'Egịpịtị alinkummbūla alinkuti: 20Sụmụkaga ummwege umwanịke nunna, abukege kukị̄su kya Ịsịlaelị, namanga aba bālōndaga ukunngoga umwanịke bafwịle. 21Po papo Josefụ alinkusụmụka alinkummwega umwanịke najunna, alinkubūka nabo nkị̄su kya bany'Ịsịlaelị. 22Lolị bo Josefụ apilị̄ke ukuti Alikilau ịkulagila ikị̄su kya mụ Jụtaị, ammwịngị̄lepo ugwịse Helotị alinkwenda nukutị̄la ukubūkamo; lolị lelo bo asokị̄gwe na Kyala mụnjosị alinkubūka nkị̄su kya mụ Galịlaị. 23Po papo lelo alinkwakujēnga nkāja ka mụ Nasaletị, po sịlinkwịsila papo isị bājobịle abakụ̄ngụlụka isị bātịle: Ịsakujobịgwaga ukuja gwa mụ Nasaletị.
Currently Selected:
Mataị 2: NYB96
Highlight
Share
Copy
Want to have your highlights saved across all your devices? Sign up or sign in
Nyakyusa Bible © Bible Society of Tanzania, 1996.