MATEO 2
2
Yachaysapa runakunaq wawata watukusqan
1Rey Herodes kamachikushaqtinmi Judea provinciapi kaq Belén llaqtapi Jesusqa nacerqan. Chay qhepatataq inti lloqsimuy lado suyumanta Jerusalén llaqtaman chayamurqanku ch'aska qhawaypi yachaysapa runakuna. 2Hinaspan tapukurqanku: —¿Maypitaq kashan Judío runakunaq reynin naceqri? Ch'askantan inti lloqsimuy ladopi rikumuyku, chaymi payta yupaychaykuq hamushayku, nispanku.
3Chayta uyarispanmi rey Herodesqa hawapi-ukhupi sonqoyoq karqan, kaqllataq Jerusalén llaqtapi llapan runakunapas. 4Chaymi llapan sacerdote umallikunata, kamachikuy simita yachachiqkunatawan huñuspa, paykunata tapurqan maypichus Diospa Akllasqan Cristo nacenan karqan chayta. 5Paykunataq reyta nirqanku: —Judeapi kaq Belén llaqtapin. Kay hinatan profetaqa*f** qelqarqan:
6Qanqa, Judá Suyupi Belén llaqta,
Judapi kamachikuqkuna purapiqa hatunmi kanki,
qanmantan huk uma qollana lloqsimunqa,
paytaqmi Israel llaqtayta michinqa, nispa, nispanku.
7Hinaqtinmi rey Herodesqa ch'aska qhawaypi yachaysapa runakunata sapaqllaman waqyarqan, hinaspan paykunata allin-allintapuni tapurqan hayk'aqchus ch'askaq rikhurisqanta. 8Chaymantataq paykunata Belén llaqtaman kachaspa nirqan: —Riychis, hinaspa wawamanta allin-allintapuni tapukamunkichis, tarimuspaykichistaq willawankichis, ñoqapas rispay yupaychaykamunaypaq, nispa. 9-10Paykunataq reyta uyariykuspanku pasapurqanku, inti lloqsimuy ladopi rikusqanku ch'askata rikuspataq sinchi kusisqa q'ochukurqanku. Chay ch'askaqa ñawpaqenkutan rirqan, wawaq kasqanman chayaspataq altonpi sayaykurqan. 11Wasiman haykuspataq wawata rikurqanku maman Mariatawan, hinaspan qonqoriykukuspa wawata yupaychaykurqanku. Alforjankuta kicharispataq regalokunata wawaman qorqanku: qorita, inciensota, mirratawan*f**. 12Chaymantataq Herodesman ama kutinankupaq mosqoypi willasqa kaspanku wak ñanninta llaqtankuman kutipurqanku.
Egiptoman wawata ayqechisqanku
13Ch'aska qhawaypi yachaysapakuna ripuqtintaq, Señor Diospa angelninqa mosqoypi Joseman rikhurispa nirqan: —Sayariy, wawata mamantawan pusarikuspa Egipto suyuman ayqey, hinaspa chaypi tiyamuy ñoqaq huktawan qanman willanaykama, rey Herodesmi wawata wañuchinanpaq maskhanqaña, nispa.
14Hinan chay tutapacha Joseqa rikch'arispa wawata mamantinta pusarikuspa Egipto suyuman ripurqan. 15Chaypin tiyamurqan rey Herodespa wañunankama, Señor Diospa nisqan hunt'akunanpaq. Señor Diosmi profetanwan nirqan: —Egipto suyumantan Churiyta waqyamuni, nispa.
Qhari wawakunata wañuchisqanku
16Hinan Herodesqa k'arakta phiñakurqan, ch'aska qhawaypi yachaysapakunaq q'otusqanta reparaspa. Chaymi Belén llaqtapi lliw muyuriqpiwan manaraq iskay watayoq llapan qhari wawakunata wañurachinanpaq kacharqan, ch'aska qhawaypi yachaysapakunaq willasqan tiempoman hina. 17Ahinapin profeta*f** Jeremiaspa nisqan hunt'akurqan, paymi nirqan:
18Ramá llaqtapin huk kunka uyarikurqan,
manchay yupakuy, waqay, hik'ipakuypiwan.
Raquelmi wawankunamanta waqashan,
sonqochasqa kaytan mana munanchu
wawankunaq manaña kapusqanrayku, nispa.
19Rey Herodes wañuqtintaq Señor Diospa angelninqa Egiptopi Joseman mosqoypi rikhurispa 20nirqan: —Israel llaqtaman ripuy wawata mamantawan pusarikuspa, wawata wañuchiyta munaqkunaqa wañupunkuñan, nispa.
21Chaymi Joseqa sayarispa wawata mamantawan pusarikuspa Israel suyuman kutimpurqan. 22Herodespa churin Arkelao taytanpa rantinpi Judea provinciapi kamachikushasqanta yachaspataq, chayman riyta manchakurqan. Mosqoypi Diospa willasqan kaspataq Galilea provinciaman ripurqan. 23Hinaspan chayman chayaspa Nazaret llaqtapi tiyarqan, profetakunaq: Nazir*f** runan kanqa, nisqanku hunt'akunanpaq.
Currently Selected:
MATEO 2: QC88
Highlight
Share
Copy
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.