Mateo 2
2
Yachaysapa runakuna Jesusta watukunku
1Jesusqa Belén llajtapi paqarerqa, chaytaj Judea jap'iypi karqa, kuraj kamachej Herodes kamachisharqa, chaypacha. Jinapi inti llojsimuynejmanta yachaysapa runakuna Jerusalenman chayamorqanku. 2Chantá tapurikorqanku: Maypitaj kashanman pichus judiokunaj kuraj kamachejnin kananpaj paqarikojri? Kayta niyku, imaraykuchus inti llojsimuynejpi ch'askanta rikorqayku. Chayrayku payta yupaychaj jamuyku, nispa.
3Kuraj kamachej Herodesrí chayta uyarispa, mancharikorqa, jinallataj Jerusalenpi tukuy kajkunapis. 4Jinapi Herodesqa kuraj sacerdotekunata, Diospa kamachisqanmanta yachachejkunatawan wajyachispa, taporqa: Maypitaj Cristo paqarikunan karqari? nispa. 5Paykunataj kuticherqanku: Belenpi, Judea jap'iypi, imaraykuchus Diosmanta sut'inchaj kay jinata qhelqarqa:
6Qanrí Belén, Judá jap'iypi kaj,
Judapi kaj llajtakuna ukhupi aswan uyarisqa kanki,
imaraykuchus qanmanta uj kamachej llojsenqa,
paytaj Israel aylluyta michenqa,#Miq 5.2. nispa.
7Chantá Herodesqa pakayllamanta yachaysapa runakunata wajyaspa, aswan allinta taporqa mayk'ajpunichus chay ch'aska paykunaman rikhurisqanta. 8Chaymantataj paykunata Belenman kacharqa: Jaqayman riychej, allintataj chay wawamanta yachamuychej. Wawata tarispataj, willawankichej, noqapis payta yupaychamunaypaj, nispa.
9Chay yachaysapa runakunaqa kuraj kamachejpa nisqanta uyariytawan, kachaykukorqanku. Jinallapi inti llojsimuynejpi rikhurimoj ch'askaqa ñawpaqenkuta Belennejman purirerqa. Chantá, wawa maypichus kasharqa, chaynejpi sayaykorqa. 10Yachaysapa runakunaqa chay ch'askata rikuspa, maytapuni kusikorqanku. 11Wasiman yaykuspataj, wawata, María mamantawan rikorqanku, qonqoriykukuspataj, wawata yupaycharqanku. Chantá, q'epinkumanta imatachus apamusqankuta orqhospa qorita, inciensota, mirratawan ima jaywarqanku.
12Chay yachaysapa runakuna ripunankupaj wakichikushajtinku, Diosqa mosqoypi paykunata nerqa ama Herodesman kutinankuta. Chayrayku waj ñannejta llajtankuman kutiporqanku.
Josewan wasi ayllunwan Egiptoman ayqenku
13Yachaysapa runakuna ripusqankumantaña, Diospa angelnenqa Joseman mosqoypi rikhurispa, nerqa: Sayariy, wawata, mamantawan pusariykukuspa, Egipto suyuman ayqey. Chaypitaj qhepakunki, noqa ujtawan willasunaykama, imaraykuchus Herodesqa wawata wañuchinanpaj mask'anqa, nispa.
14Jinallapi José jatariytawankama, wawanta, warmintawan tutapacha pusariykukuspa, Egiptoman riporqa. 15Chantá paykuna chaypi qhepakorqanku Herodes wañunankama. Ajinata Tukuyta Kamachej Dios sut'inchajninnejta imatachus nisqan junt'akorqa: Churiyta Egiptomanta jampunanpaj wajyarqani,#Ex 4.22-23; Nm 24.8; Os 11.1. nispa.
Herodes wawakunata wañuchinankuta kamachin
16Herodesqa yachaysapa runakuna payta ch'awkiyasqankuta yachaspa, maytapuni phiñakorqa. Chantá, ch'aska rikhurimusqanmanta yachajkuna willasqankuman jina, Herodesqa soldadonkunata kamacherqa Belén llajtapi, muyuyninpi ima tukuy qhari wawakunata wañurachinankuta iskay watayojmanta uraman. 17Ajinamanta Diosmanta ñawpa sut'inchaj Jeremiaspa qhelqasqan junt'akorqa:
18Ramá llajtapi uj qhapariy uyarikun, jatun waqay, jik'uytaj.
Raquelqa wawankunamanta waqashan,
manataj sonqochasqa kayta munanchu,
imaraykuchus wawankunaqa wañuchisqaña, nispa.#Jer 31.15.
19Aswan qhepaman Herodes wañusqanmantaña, Diospa angelnin Egiptopi mosqoypi Joseman watej rikhurerqa. Paytaj nerqa: 20Sayariy, wawata, mamantawan pusariykukuspa, Israel suyuman kutipuy, imaraykuchus wawata wañuchiyta munajkunaqa ñapis wañunkuña,#Ex 4.19-20. nispa.
21Chaymantá José jatariytawan, wawanta, warmintawan pusariykukuspa, Israel suyuman kutiporqa. 22Chaywanpis pay uyarerqa Judeapi Arquelao kamachishasqanta tatan Herodespa cuentanmanta. Chayrayku chayman riyta manchachikorqa. Jinapi Dios mosqoypi willasqanrayku, Joseqa Galilea jap'iyman rerqa. 23Nazaret llajtaman chayaspataj, chaypi tiyakorqa. Ajinapi imatachus Diosmanta ñawpa sut'inchajkunaj nisqanku junt'akorqa: Pay Nazaret llajtayoj nisqa kanqa,#Is 11.1. nispa.
Currently Selected:
Mateo 2: DQPC
Highlight
Share
Copy
Want to have your highlights saved across all your devices? Sign up or sign in
Revisión Biblia Quechua Boliviano © Sociedad Bíblica Boliviana, 2017.