Mateo 3
3
Bautizaj Juan qhespichejmanta willaran
(Mc 1.1-8; Lc 3.1-9,15-17; Jn 1.19-28)
1Chaymanta unaynejman Bautizaj Juan rikhurimuspa, Judeaj ch'innejpi qhespichejmanta willarayta qallarerqa. 2Paytaj nerqa: Diosman kutirikuychej, imaraykuchus janaj pachamanta Dios kay pachapi kamachinanpaj wakichisqaña kashan,#Dn 2.44. nispa.
3Diosmanta ñawpa sut'inchaj Isaías kay Juanmanta ajinata nisqa:
Ch'innejpi uj runaj qhaparisqan uyarikun:
Tata Diospaj ñanta pichaychej,
purinantataj cheqanyachiychej,#Is 40.3. nispa.
4Juanqa camello millmamanta ruwasqa p'achawan p'achallisqa karqa, qara chumpiwantaj chumpiykusqa. Paytaj phinki phinkikunata, lachiwana misk'itawan ima mikhoj. 5Qhespichejmanta Juan willarajtin, ashkha runakuna payta uyarej jamoj kanku Jerusalenmanta, Judeamanta, tukuy Jordán mayoj muyuyninmanta ima. 6Chay runakunataj juchankuta rimarejtinku, Juanqa Jordán mayupi paykunata bautizaj.
7Ashkha fariseokuna, saduceokunawan ima Juan bautizasqanta rikoj jamullarqankutaj. Juantajrí paykunata rikuspa, nerqa: Katarikunaj miraynin, pitaj nisorqachej Diospa jamoj, k'araj phiñakuyninmanta ayqenaykichejtari? 8Allinta puriychej ari. Ajinata juchallisqaykichejmanta Diosman kutirikusqaykichejta sut'ita rikuchinkichej. 9Amataj niychejchu: Noqaykoqa qhespichisqa kasqayku Abrahampa miraynin kasqaykurayku,#Jn 8.33-39; Ro 2.28-29; 4.12. nispa. Noqa sut'ita niykichej: Diosqa kay rumikunamantapis Abrahampaj wawakunata rikhurichiyta atinman. 10Jachaqa ñapis wakichisqaña kashan sach'akunata saphinmanta k'utunanpaj. Chayrayku mana allinta poqoj tukuy sach'akunaqa k'utusqa kanqanku, ninamantaj enqhaykusqa.
11Noqaqa yakuwan bautizaykichej, Diosman kutirikusqaykichejmanta yachayta qospa. Qhepayta jamojrí noqamanta aswan atiyniyoj, noqataj mana paypa wata runan kanaypaj jinallapischu kani. Payqa Santo Espirituwan, ninawan ima bautizasonqachej. 12Jorcapis makinpiña kashan, erapi trigota wayrachinanpaj. Chantá pirwaman trigota jallch'anqa, pajatatajrí mana thasnukoj ninaman enqhaykonqa. Ajinata nispa, Juanqa runakunaman willararqa.
Jesús bautizachikun
(Mc 1.9-11; Lc 3.21-22)
13Chantá Jesús Galileamanta Jordán mayuman rerqa, Juanwan bautizachikoj. 14Juantajrí ni imarayku Jesusta bautizayta munaspa, nerqa: Noqachá qanwan bautizachikunay kanman. Imaraykutaj qan noqawan bautizachikoj jamunkiri? nispa.
15Jesustajrí kuticherqa: Saqeway kunan bautizachikojta, imaraykuchus ajinata Diospa tukuy kamachisqanta junt'asunchej, nispa. Chantá Juanqa Jesusta bautizarqa. 16Jesús bautizachikuytawan yakumanta llojsishajtin, janajqa kicharikorqa. Jesustaj Diospa Espiritunta urpi jina paypa patanman urayk'amushajta rikorqa. 17Jinallapitaj janaj pachamanta Dios nimorqa: Qanmin munasqa Churiy kanki, qanwantaj sonqo junt'asqa kani,#Is 42.1; Mt 12.18; 17.5; Mc 9.7; Lc 9.35. nispa.
Currently Selected:
Mateo 3: DQDC
Highlight
Share
Copy
Want to have your highlights saved across all your devices? Sign up or sign in
Revisión Biblia Quechua Boliviano © Sociedad Bíblica Boliviana, 2017.