Mateo 1
1
Jesuspa ñawpa tatankunaj sutinku
(Lc 3.23-38)
1Kayqa Jesucristoj ñawpa tatankunaj mirayninmanta sutinkuna. Jesusqa Davidpa mirayninmanta karqa, Abrahampa mirayninmantawan.
2Abrahamqa Isaacpa tatan karqa, Isaactaj Jacobpata. Jacobtaj Judajta, wawqenkunajtawan tatanku karqa. 3Judaqa Farespata, Zerajtawan tatanku karqa, mamankutaj Tamar karqa. Farestaj Esronpata tatan karqa, Esrontaj Arampata. 4Aramqa Aminadabpa tatan karqa, Aminadabtaj Nasonpata, Nasontaj Salmonpata. 5Salmonqa Boozpa tatan karqa, mamantaj Rajab. Booztaj Obedpa tatan karqa, Obedpa mamantaj Rut, Obedtaj Yesejpata tatan karqa. 6Yesetaj kuraj kamachej Davidpa tatan karqa.
Kuraj kamachej Davidqa Salomonpa tatan karqa, Salomonpa mamantaj Betsabé karqa, pichus Uriaspa warmin karqa, chay. 7Salomonqa Roboanpa tatan karqa, Roboantaj Abiaspata, Abiastaj Asajpata. 8Asaqa Josafatpa tatan karqa, Josafattaj Joranpata, Jorantaj Uziaspata. 9Uziasqa Yotanpa tatan karqa, Yotantaj Ajazpata, Ajaztaj Ezequiaspata tatan karqa. 10Ezequiasqa Manasespa tatan karqa, Manasestaj Amonpata, Amontaj Josiaspata. 11Josiasqa Jeconiaspa tatan karqa, wawqenkunajtawan, maypachachus israelitakuna Babiloniaman apasqa karqanku, chaypacha.#2 R 24.14-15; 2 Cr 36.10; Jer 27.20.
12Israelitakuna Babiloniaman apasqa kasqankumantaña Jeconiasqa Salatielpa tatan karqa, Salatieltaj Zorobabelpata. 13Zorobabelqa Abiudpa tatan karqa, Abiudtaj Eliaquinpata, Eliaquintaj Azorpa tatan karqa. 14Azorqa Sadocpa tatan karqa, Sadoctaj Aquinpata, Aquintaj Eliudpata. 15Eliudqa Eleazarpa tatan karqa, Eleazartaj Matanpata, Matantaj Jacobpata. 16Jacobqa Josejpa tatan karqa, Josetaj Mariaj qosan karqa, Mariataj Jesuspa maman karqa, Jesustaj Diospa kachamusqan Cristo sutichasqa karqa.
17Ajinaqa Abrahammanta Davidkama chunka tawayoj miraykuna karqa. Davidmantapacha israelitakuna Babiloniaman apachikusqankukama, chunka tawayoj miraykuna karqa. Chaymantataj Cristokama waj chunka tawayoj miraykuna kallarqataj.
Jesucristoj paqarikusqan
(Lc 2.1-7)
18Jesucristoj paqarikusqan kay jina karqa: María mamanqa mañaqasqa karqa Josewan casarakunanpaj.#Lc 1.27. Chaywanpis manaraj khuska tiyakushajtinku, Mariaqa wijsallisqa rikhurerqa Santo Espíritoj atiyninwan. 19María wijsallisqa kasqanta yachaspa, Joseqa cheqan runa kasqanrayku, María warminta pakayllamanta saqerpayayta munasharqa, mana p'enqaypi payta rikhurichinanrayku. 20Joseqa Mariata saqerpayayta yuyashajtintaj, Diospa angelnin payman mosqoypi rikhurispa, nerqa: José, Davidpa ayllunmanta kaj, Mariawan casarakullay, amataj p'enqakuychu, imaraykuchus pay wijsallisqa kashan Santo Espíritoj atiyninnejta.#Lc 1.35. 21Mariaqa qhari wawayoj kanqa, chay wawatataj Jesús sutiwan sutichanki, imaraykuchus payqa ayllunta juchankumanta qhespichenqa, nispa nerqa chay angelqa.#Sal 130.8.
22Chay tukuy ima karqa, imaynatachus Dios ujnin sut'inchajninnejta sut'inchasqa, chayman jina junt'akunanpaj:
23Qharej mana chayasqan uj sipas wijsallikonqa,
uj qhari wawatataj paqarichikonqa.
Chay wawata Emanuel sutiwan sutichanqanku.
Chay suti niyta munan: Diosqa noqanchejwan,#Is 7.14; 9.6-7; 8.10. nispa.
24José puñusqanmanta rijch'arispa, Diospa angelninpa kamachisqanman jina ruwarqa. Mariawan casarakuspataj, paywan khuska tiyakorqa. 25Chaywanpis Joseqa María warminwan mana puñuykorqachu, María wawanta paqarichikunankama. Josetaj chay wawata Jesús sutiwan suticharqa.
Currently Selected:
Mateo 1: DQDC
Highlight
Share
Copy
Want to have your highlights saved across all your devices? Sign up or sign in
Revisión Biblia Quechua Boliviano © Sociedad Bíblica Boliviana, 2017.