เนหะมี 4
4
วิน-วั้ง ฒ้อ เหธย ฒี่ง หลาด เญย กง
1สันบานลัด ไฮ์ ก๊อง เยีย บัว เหธย ฒี่ง หลาด, นิ่น หฒะเก้ง! เฉีย เจี์ย ไห่. นิ่น หย่า ฮว้วด ยิวไท เมี่ยน. 2นิ่น ตอง เจี๊ยน นิ่น เญย ก๋อ-โย์ว เหธา สะมาเลีย เมี่ยน เญย แปง ก๊อง, “น้าย เต๋ย เผีย ไห่ เญย ยิวไท เมี่ยน โหฒว หาย หญู่ง แล่? นิ่น บัว ฮนั้ม อ๋อย กั้น เหธย เจี์ย น้าย นอม ฒี่ง ไฟ? นิ่น บัว อ๋อย เฒาะ กะน้าย เหฒี่ย ปุน ทิน-ฮู่ง? เหยียด ฮนอย ฮนั้ง นิ่น บัว อ๋อย โหฒว เถา เหฒียง? นิ่น บัว อ๋อย เฒาะ เยียม หละฟับ-ดุย หฒุ ปั๊ว เจี๋ย เญย หละเปย๊ย หล่ง เหธย ฒี่ง หลาด ไฟ?”
3อัมโมน เมี่ยน, โทบีอา, เยียม นิ่น เญย กะเฮลน ก๊อง, “อ๊า, นิ่น บัว เหธย เญย หละเปย๊ย-หลาด, สี ก๊อง เหยียด เต้า เฮยี่ย จู๊ ฝาว ฒู้ง งัด บาง เหฑ่ง อ๊ะ เหลาะ.”
4เยีย เต๋า เก๋า ก๊อง, “โอ เยีย บัว เญย ทิน-ฮู่ง อ่า, โท้ หมวัง เยีย บัว เหว่ย หฒุ เยีย บัว หฒุ เมี่ยน หมั่ง เผีย เยีย บัว. โท้ ปุน นิ่น บัว ฮว้วด เญย หว่า ด๊อด เหฌี่ย นิ่น บัว กั้น เญย มฆ้อง. โท้ เฒาะ นิ่น บัว จิว ปุน หฒุ เมี่ยน กว๊าด มี่ง เถา กั้น นอม เต่ย-ปูง โหฒว ฮนั้ง หฒุ ลู้ เญย กะน้าย. 5ไม้ ตู๋ง ปวัง เจี๊ยน นิ่น บัว โหฒว ต่อง เญย ฒุ์ย. หย่า ไม้ ตู๋ง ซ้อด กวั่ง เม่ย ปวัด นิ่น บัว โหฒว เญย ฒุ์ย, เหว่ย หฒุ นิ่น บัว หมั่ง เผีย ก๊อง โตะ#4:5 ไฟ “นิ่น บัว เยียม เหธย ฒี่ง หลาด เญย เมี่ยน เญย หฑะเฮมียน ธัวะ เม่ย เฉีย เจี์ย ไห่”. เหธย ฒี่ง หลาด เญย เมี่ยน.”
6เยีย บัว ฯฒฯ เหธย ฒี่ง หลาด ฝาว ฮลัง, ฝาว เถา ตุ๊ เหยียด ป่วน เหว่ย หฒุ แปะ ฝีง ม่าย เฮญี้ยว โหฒว กง.
7มป่า สันบานลัด, โทบีอา, อาหลับ เมี่ยน, อัมโมน เมี่ยน, เหธา อัดโดด เมี่ยน, ไฮ์ ก๊อง เยีย บัว หฒ่อ เยลูซาเลม เญย ฒี่ง หลาด กุ๊น โหฒว กุ๊น ฮลัง, หลาด ฆวะ เญย นอมๆ ต๋อง หย่า เบี๊ย เจี๊ยน อ๊ะ, นิ่น บัว เหยียด ฒู้ง เฉีย เจี์ย ไห่. 8นิ่น บัว ล่ม ฑ่อย ต๊า หฒะเอ๋ย อ๋อย เบ๊าะ เยลูซาเลม ฒี่ง, หย่า อ๋อย โธะ เมี่ยน หลุ่น เหฑ่ง. 9มป่า เยีย บัว เต๋า เก๋า โจ้ว เยีย บัว เญย ทิน-ฮู่ง หย่า พ้าย เมี่ยน เฒี่ยง ฮนอย เฒี่ยง ม์วน ฒั้ว เจี๊ยน บู้ง นิ่น บัว โหฒว เญย สี่.
10ยูดา เมี่ยน หย่า ก๊อง, “เปี้ยน กะน้าย เญย กง-เมี่ยน เญย ชะ เมา เจี๊ยน เหฌี่ย. บาง หว่าย เญย หละเปย๊ย-หม่วน ธั้ม ไห่. เยีย บัว ไม้ ไฮ่ หฒ่อ ไม้ ตุ๊ ฒี่ง หลาด อ๊ะ.”
11เยีย บัว เญย วิน-วั้ง หย่า เซีย เจี๊ยน หว่า ก๊อง, “นิ่น บัว ไม้ ฮิ้ว ไม้ ปวัด เญย เฒี่ยง โห่ บัว อ๋อย เปียะ นิ่น บัว บุด๋ง ไต๋ นิ่น บัว, ปุน นิ่น บัว เญย กง ตี้ง.”
12เยียม นิด วิน-วั้ง ฟัด เญย ยิวไท เมี่ยน ต้าย บั๋ว เยีย บัว ไม้ เฒ้ย เหฒียบ หฑุ่น, “นิ่น บัว อ๋อย เยียม นิ่น บัว เญย นอมๆ ต๋อง ต้าย เบ๊าะ บัว.”
13เหว่ย น้าย เยีย ฯฒฯ พ้าย แปะ ฝีง หฒิว นิ่น บัว เญย ปู้ง ป่วน, นั้น เจี๊ยน หฑุ ด๊าว, เหธา ธัง เหธา จวัง-หฒิน, เยียม ฒี่ง หลาด เก้า ไอ๊ เจี๋ย เญย ต๋อง เหธา ฆวะ ทง ค้วด เญย ต๋อง. 14เยีย ฒ่า ลิ์ว ฒี่ง หลาด ฯฒฯ ตอง เจี๊ยน โหฒว โฮล โหฒว เจียน เญย เมี่ยน เหธา โหฒว แปะ ฝีง เญย หฒวัง เมี่ยน ก๊อง, “ไม้ ตู๋ง กั้ม เหฑีย นิ่น บัว. จั๋ง เจี๊ยน เฒี้ยว เซ โฮล ไห่, บัวะ ฮ่อง ไห่. อ๋อย หฒุ เหว่ย เม่ย บัว เญย ก๋อ-โย์ว, เอ๊า-เจว๊ย น่าม โญ์ว, หย่า เหว่ย เม่ย บัว เญย เปย๊า เบ๊าะ จ๋า.”
15เยีย บัว เญย วิน-วั้ง ไฮ์ ก๊อง เยีย บัว ฮิ้ว ตุ๊ นิ่น บัว เญย หฒะเอ๋ย. นิ่น บัว หย่า ฮิ้ว ตุ๊ ทิน-ฮู่ง โหฒว ปุน นิ่น บัว เญย หฒะเอ๋ย หว่าย หมี่ อ๊ะ. เยีย บัว ฯฒฯ หฑวน เถา ฒี่ง หลาด, เก๊าะ-เมี่ยน โหฒว เก๊าะ-เมี่ยน เญย กง.
16เยียม หน่าย ฮนอย ต้าย, เยีย เญย เมี่ยน ม่าย เหยียด ป่วน โหฒว กง, ม่าย เหยียด ป่วน นั้น ธัง, นั้น ท้อง-ป้าย, นั้น จวัง-หฒิน, หย่า ฒุ เจี๊ยน เบ๊าะ จ๋า เญย ลุย-โหว. หฒวัง เปย๊ย เฒ้ย โซ้ว เจี๊ยน ยูดา แปะ ฝีง ฆะฮ้า แหมง ฒั้ว เจี๊ยน, 17หฒ่อ ฒี่ง หลาด เญย กง-เมี่ยน. เลี่ยม เปี้ยน กะน้าย เญย เมี่ยน หล่ง เหยียด เจี๊ยะ ปั์ว โหฒว กง, เหยียด เจี๊ยะ ปั์ว นั้น เจี๊ยน เบ๊าะ จ๋า เญย หวัวะ กิ่น. 18เต้าๆ เหธย ฒี่ง หลาด เญย กง-เมี่ยน ปุ๋ย เจี๊ยน นิ่น เญย หฑุ ด๊าว โหฒว กง. มป่า ปย๊ม จอง วั้ว เต้า เมี่ยน เหธา เยีย เยียม.
19เยีย แอ๋ง บั๋ว โหฒว โฮล โหฒว เจียน เญย เมี่ยน เหธา โหฒว แปะ ฝีง เญย หฒวัง เมี่ยน, “บัว เญย กง เซ โฮล ไห่. เยียม ฒี่ง หลาด โหฒว กง เญย เมี่ยน หย่า เยียม ตุ๊ หฑาน ไห่, ล่าน เล่ย ตุ๊ ล่าน โก. 20เม่ย บัว ไฮ์ จอง บุย หาย นอม ต๋อง, อ๋อย หฒุ ก๊าน มี่ง วั้ว เหธา เยีย บัว กั๊บ ฒุ้น. บัว เญย ทิน-ฮู่ง อ๋อย เหว่ย บัว เบ๊าะ จ๋า.”
21เยีย บัว ฯฒฯ โหฒว เจี๊ยน กง มี่ง. ม่าย เหยียด ป่วน กง-เมี่ยน นั้น เจี๊ยน ธัง. ลู่ง ดอม เฑี้ยว เบี์ยวๆ ฌัง เถา อ๊า ฮิด หฮมวัง เหฮลย ธ้วด เญย เฒี่ยง โห่ ฒั้ว เจี๊ยน. 22วั้ว หฒั่น เยีย แอ๋ง ก๊อง บั๋ว หฒวัง แปะ ฝีง, “เต้าๆ มจั่ง ตอน เหธา เถง นิ่น บัว โหฒว กง เญย เมี่ยน อ๋อย หฒุ ม์วนๆ ฮิด เยียม น้าย ฒี่ง. ลู่ง ม์วน หฒั่น นิ่น บัว ไฮ่ เถง บัว โหฒว ฒั้ว ฒี่ง เญย เมี่ยน. ลู่ง ฮนอย หฒั่น ไฮ่ โหฒว หฒ่อ ฒี่ง หลาด เญย กง.” 23เลี่ยม เยีย เหธา เยีย เญย ก๋อ-โย์ว เหธา เถง เยีย โหฒว กง เญย เมี่ยน เหธา ฒั้ว ฒี่ง เญย เมี่ยน ไม้ ไจ๊ ลุย-โหว. เก๊าะ-เมี่ยน หย่า ปุ๋ย เจี๊ยน เก๊าะ-เมี่ยน เญย หวัวะ กิ่น, เลี่ยม มี่ง ฒ่าง ววม.#4:23 เลี่ยม มี่ง ฒ่าง ววม น้าย โจ๋ว ฮิบลู หว่า เซ ไม้ หนั่ง เม่ง.
Currently Selected:
เนหะมี 4: IuMiTH
Highlight
Share
Copy
Want to have your highlights saved across all your devices? Sign up or sign in
Mien Bible (Thai Script) © Thailand Bible Society, 2007