Ma꞉tiu 3
3
Bapitaisi peao hayeke hali Dionima꞉ pi waleekeeki
(Maka 1꞉1-18, Luku 3꞉1-18, Dioni 1꞉19-28)
1Koto natena꞉ta꞉ mo hande bapitaisi peao hayeke hali Dionima꞉ mo Diudiana꞉ hapiki kenke pa꞉ta꞉ a꞉pa hata꞉ pi kini pea walolo alota꞉ 2Mo hande hepenina꞉ Kilu Tombuao Hala꞉ ekita꞉ teke pa꞉ta꞉ ya꞉la꞉ma꞉ ika꞉ hoke haumanu paeyao mina꞉pa꞉lao hoki wala꞉pa꞉peke leekeme. 3Do Dioni pa꞉ta꞉ta꞉ mo hande potopede hali Aisayama꞉ pi ma꞉nda꞉ la꞉ wiekeme. Koto la꞉ wieke pita꞉ dupa.
Ma꞉nda꞉ halima꞉ mo hapiki kenke pa꞉ta꞉ hata꞉ pi taka꞉lake lo hala꞉me.
Ipikana꞉ma꞉ alota꞉ Mo Tekehalina꞉ pota꞉ pilaowapa꞉peke.
Ipiki epeke alena꞉ yapena꞉ ipika꞉ pota꞉ wopu tikitiki yawapa꞉peke ala꞉me leekeme.
4Dioni ipika꞉ yameeke dauta꞉ mo kemolo itikima꞉ wepiki dau yameekeme. Ipika꞉ hakota꞉ kao yonkeleke wepiki hako yameekeme. Ipika꞉ ne manuta꞉ odouwamanu make mo pole pukini hapeke hanimanu make no hayekeme. 5Mo Diutuseleme da wanda꞉hali make Diudia kenke wanda꞉hali make mo Diodani ikali tea꞉na꞉ pelia peeke wanda꞉hali make ota꞉ paeyao ipiki pa꞉ta꞉ tayaemekeme. 6Kutupata꞉ mo wanda꞉halima꞉ ika꞉ hoke haumanu ka꞉la꞉polo liaena꞉ ikita꞉ Dionima꞉ mo Diodani ikali pa꞉ta꞉ bapitaisi peayekeme.
7Mo hande Pa꞉tisi tapake make Sa꞉dusi tapake make koto tapake yaapona꞉ haliweki wopu Dionima꞉ bapitaisi peaena꞉ epemekeeki handaa ipikana꞉ma꞉ iki pa꞉ta꞉ alota꞉ Ketoma꞉ handeke some hombo iki pa꞉ta꞉ mo Koda꞉ma꞉ a̱i̱ taapolo pa꞉la꞉ panisi tieke wendia꞉pekee pita꞉ epima꞉ lakia꞉pe. 8Mo ika꞉ hoke haumanu hoki walaa ota꞉ mina꞉pa꞉laaseme hau peneme yaasa꞉ ekimanu homeke pu hapa꞉peke. 9Eipoloha꞉ma꞉ta꞉ nika꞉ meie lomeka꞉na꞉ta꞉ mo Koda꞉ma꞉ kulu pa꞉la꞉ hoke yenkita꞉ wendulumekee hone na wia꞉pa꞉peke. Lono opie. Koda꞉ma꞉ta꞉ do ula꞉ toopimanu mea Eipoloha꞉ma꞉na꞉ wekiwandiki au lapeke ya꞉la꞉me alome. 10Mo timanu ika꞉ teke yoka꞉ poka꞉ bepe peaapeke teita꞉ do tikitiki yao ula꞉ handa꞉e. Ti homeke homekema꞉ ipika꞉ epeke kiliki na eiyo haya꞉ka꞉na꞉ta꞉ kota꞉ pokaa tina꞉ yankilieke.
11I̱ma꞉ta꞉ ika꞉ hoke haumanu mina꞉pa꞉laemekeeki peneme yaaluekema꞉ ikalima꞉ bapitaisi peaowalopate mo ya hoki nane ipilia꞉ halima꞉ta꞉ mo Holi Sipitidi pita꞉ ti tala꞉eki yaapoma꞉ iki bapitaisi pealieke. Mo someta꞉ I̱ ota꞉ lombeipiki some halekena꞉ ipika꞉ anke dake kone I̱ma꞉ mea tiaapeke ana꞉ na pa꞉la꞉me. 12Ipikana꞉ma꞉ mo hande widi kilikina꞉ ambuku napeke yaapo putupa alu puluekema꞉ pana꞉pulu pa꞉la꞉ sa꞉sata꞉ ipika꞉ kikina꞉ miniki hala꞉me. Ipika꞉ widi kiliki epekeeki paeyaota꞉ ipika꞉ widi napeke u hala꞉ da pa꞉ta꞉ momba꞉la wilieke. Pate mo ambuku paeyaota꞉ tina꞉ pana꞉pu yankilieke. Koto tita꞉ na paeyeke pa to halieke. Koto pi manuta꞉ Dionima꞉ iki pa꞉ta꞉ leekeme.
Yesu bapitaisi peayekeeki
(Maka 1꞉9-11, Luku 3꞉21-22)
13Koto pita꞉ma꞉ta꞉ Yesu mo Ka꞉lili kenke mina꞉pa꞉lao Dionima꞉ ipiki bapitaisi peaena꞉ mo Diodani ikali pa꞉ta꞉ epeekeme. 14Kutu piekepate Yesuna꞉ hone topo pina꞉yeke Dionima꞉ ipiki pa꞉ta꞉ dupa leekeme. Nakana꞉ma꞉ I̱ bapitaisi peapekealeo. Pa neketa꞉ I̱ma꞉ bapitaisi peano I̱ pa꞉ta꞉ epeka꞉ta꞉me leekeme. 15Koto leekepate Yesuma꞉ ipika꞉ pi hombo peaaso hata꞉ alota꞉ Pina꞉ma꞉ hone ma꞉nda꞉ na wiki. Do pulu polopa꞉ hauta꞉ Koda꞉na꞉ hone pa꞉la꞉ hauna꞉ pitolo pitolopa꞉me. Koto leekeeki Dionima꞉ opuaata꞉ A꞉pa꞉la꞉me bapitaisi peanoe leekeme.
16Yesu bapitaisi peao paeyeketa꞉ koto kone mo ikali mina꞉pa꞉lao tea꞉ nane yapeekeme. Kutu pitolo haena꞉ta꞉ koto kone oli ya akolopa wiaata꞉ mo hande Koda꞉na꞉ Sipitidi melipu tupa꞉ hola꞉pa꞉niao ipika꞉ loke manda tapepeekeeki handeekeme. 17Kutaa oli ya nanema꞉ pi ho̱la̱꞉make homekema꞉ pi alo alota꞉ Dota꞉ ya pukipiki wekie. I̱ma꞉ ipiki pa꞉ta꞉ ta꞉na꞉ma꞉ wopu homolome laa pi la꞉niaeyekeme.
Currently Selected:
Ma꞉tiu 3: SEMB
Highlight
Share
Copy
Want to have your highlights saved across all your devices? Sign up or sign in