Nasepte 8
8
1Saul zong tua lai-ah om a, ama sihna a thukimpih hi.
Pawlpi Kibawlsia a, Kithehthang
Tua ni-in Jerusalem ah pawlpi kibawlsiatna lianpi om a, sawltakpite longal adangte khempeuh Judea le Samaria gam sung tengah a kithehhthang uh hi. 2 Pasian a zahtak mite in Stephen vui uh a, amah a kah ngutngut uh hi. 3 Ahi hangin Saul in pawlpite suksiat ding a kipan hi. Inn khat pan inn khatah pai-in numei hitaleh pasal hitaleh kaikhia gawpin amaute thong ah a khum hi.
Samaria ah Philip
4 A kithehthang mite in amau paina peuhpeuh ah thu a hilh uh hi. 5 Samaria gam khuapi khatah Philip paisuak a, tua lai-ah Christ a#8.5 Ahikeh Messiah thu a tangko hi. 6 Mihonte in Philip thugen za uh a, a limlamdang bawlte a muh ciangun amaute khempeuh a kiangah va pai-in a thugen limtakin a ngai uh hi. 7 Mi tampi sung pan kha gilote b#8.7 Greek ah nin kiku vangvang in paikhia uh a, pumzawte le mipoite tampi a dam uh hi. 8 Tua ahi ciangin tua khuapi sungah lungdamna lianpi a tung hi.#Ns 6:5
Dawi-ai Tawipa Simon
9 Simon kici mi khat, khuapi sungah tawlkhat sung oma, ai sanin Samaria mi khempeuh in lamdang mahmah a sa uh hi. Amah mi lian khatin kingaihsun-a a kisial hi. 10 Mi lian mi neu, mi khempeuh in ama thu ngai-in, "Hih mipa, Vangliatna Lian kici Pasian vangliatna ahi hi," ci-in a thangsak uh hi. 11 Amah in amaute sawtveipi a mitphial bawlna lamdang sasak mahmah ahi manin, amah a zui uh hi. 12 Ahi hangin Philip in Pasian gam thupha le Jesu Christ min thute a hilh ciangin um uh a, a numei a pasalin a kibaptise uh hi. 13 Simon mahmah in zong uma a kibaptise hi. Amah in a lian lim lamdang le a nalamdang a muhte lamdang sa in Philip a zui kawikawi hi.
14 Jerusalem a sawltakpite in, Samaria ah Pasian thu kisang ta cih a zak uh ciangin amaute kiangah Peter leh John a sawl uh hi. 15 Amaute a tun uh ciangin Khasiangtho a ngah nadingun amaute thu a ngetsak uh hi. 16 Bang hang hiam cih leh amaute khat beek tungah Khasiangtho a tung nai kei hi; amaute Topa Jesu min sungah c#8.16 Ahikeh in a kibaptise pan bek uh hi. 17 Tua ahi ciangin Peter le John in amaute tungah a khut uh nga uh a, Khasiangtho a ngah uh hi.#Mt 28:19; Ns 6:6
18 Simon in sawltakpite khut ngakna tawh Kha kipia cih a muh ciangin amaute sum tah a, 19 "Ka khut ka ngaknate in Khasiangtho a ngah theih nadingin hih, hihtheihna kei zong hong pia un," a ci hi.
20 Peter in, "Na sum tawh mangthang khawmta in! Bang hang hiam cih leh Pasian letsong sum tawh lei theih dingin na ngaihsut hi. 21 Pasian mai-ah na lungtang maan lo ahi manin hih nasepna sungah tanh ahi a, panna ahi zongin na nei kei hi. 22 Hih tatsiatna pan kisik inla, Topa tungah thu ngen in. Na lungsungah tua bang ngaihsutna na neih, amah in hong maisak kha thei ding hi. 23 Ahang in, khaatna tawh na kidim a, mawhna sila-in na om cih kong mu hi," ci-in a dawng hi.#2Ku 5:16
24 Tua ciangin Simon in, "Na gensate kei tungah bangmah hong tun loh nadingin Topa tungah thu hong ngetsak in," ci-in a dawng hi.#Pk 8:8; Ms 21:7
25 Peter le John in Topa thu teci pangin a thansak khit uh ciangin Samaria gam khuaneu tampi ah lungdamna-thu a hilh kawmun Jerusalem ah a ciah kik uh hi.
Philip le Ethiopia Mipa
26 Tu-in Topa vansawltak khat in Philip tungah, "Jerusalem pana Gaza lama paisuk - gamlak lamneu ah leitaw-lam manawhin pai in," a ci hi. 27 Tua ciangin amah kipankhia a, lampi ah Ethiopia mi d#8.27 Tua pen Nile kual saklam teng cil kigetpa, Ethiopia kumpinu Candace gou khempeuh a uk kumpi nasem ulian pa tawh a kituak hi. Hih mipa Jerusalem ah Pasian bia dinga va pai hi-a 28 inn lamah ciah kikin sakolleng tungah tu-a, kamsangpa Isaiah laibu a sim hi. 29 Philip kiangah Kha in, "Sakolleng va naih inla, a kiangah va om in," ci-in a gen hi.#1Ku 8:41-43
30 Tua ciangin Philip in tua sakol leng a va delh leh tua mipa in kamsangpa Isaiah laibu a sim a za hi. Philip in, "Tu-a na lai sim na theitel hiam?" ci-in a dong hi.
31 Amah in, "Mi khatpeuh in hong hilhcian kei ngal leh bangci theih ding ka hi hiam?" a ci hi. Tua ciangin amah in Philip kahto-a amah tawh a tukhawm dingin a sam hi.#Isa 56:3-7
32 Tua cilgehpa in:
"A gopa kianga kipaipih tuu bangin amah kipaipih a,
a mul metpa mai-a a ham lo tuuno bangin
a kamka kei hi.
33 Amah kizahlaksakin thutang ahina kisuhsak hi.
Ama nuntakna leitang pan kilaksak ahi manin
asuan a khakte thu kua in gen thei ding hiam?" a#8.33 Isa. 53:7, 8 cih Laisiangtho mun a sim laitak ahi hi.
34 Cilgehpa in Philip kiangah, "Nong hehpihna in, hih kamsangpa amah le amah kigen ahi hiam, ahi keileh mi khatpeuh thu gen ahi hiam hong hilh dih in," ci-in a dong hi. 35 Tua ciangin Philip in tua Laisiangtho mun tektek mah pansanin Jesu tawh kisai lungdamna thu a genpih hi.#Lk 24:27
36 A paipai laitakun tui omna mun khat tung uh a, cilgehpa in, "En in, hih lai-ah tui a om hi. Bang hangin kibaptise lo ding ka hi hiam?" a ci hi. 37 Philip in, "Na lungsim khempeuh tawh na up leh na kibaptise thei hi," a ci hi. Cilgehpa in, "Jesu Christ, Pasian Tapa hi, cih ka um hi," b#8.37 Khutgelh pawlkhat ah tg. 37 na om lo ci-in a dawng hi. 38 Tua ciangin sakolleng a khawl nading thu a pia hi. Philip le cilgehpa tui sungah paisuk khawm uh a, Philip in amah a baptise hi. 39 Tui sung pan a paikhiat toh uh ciangin Topa Kha in Philip lakhiamang pah a, cilgehpa in a mu kik nawn kei hi. Ahi hangin lam tawntungah lungnuamtakin a pai hi. 40 Philip ahileh Azotus ah kilang a, zin kawikawi-in Caesarea a tun dong khuapi khempeuh ah lungdamna-thu a hilh hi.#Ns 2:38
Currently Selected:
Nasepte 8: ZIV
Highlight
Share
Copy
Want to have your highlights saved across all your devices? Sign up or sign in
Copyright 1994 Myanmar Center for World Mission