1 Kumpite 1
1
Adonijah Amahmah Kumpi Kisuaksak
1Kumpi David tekta-a a kum kicing ta in puan a silhsak ciang nangawnun a khua lum thei lo hi. 2 Tua ciangin a nasemte in a kiangah, "Nungakno bit khat kumpipa kem dingin ka zong ding uh hi. Tuanu a pangah lum leh ka kumpipa uh a khua lum ding hi," a ci uh hi.
3 Tua ciangin amaute in Israel gam sung teng nungakno melhoih khat zong uh a Shunam-te Abishag mu in kumpipa kiangah a puak uh hi. 4 Nungakno melhoih mahmah a, amah in kumpipa kemin cinga kumpipa in a luppih zo nawn kei hi.
5 Tu-in a nu Haggith tapa Adonijah amah le amah kikausiphumin, "Kumpi ka suak ding hi," a ci hi. Tua ciangin amai-a tai ding mi sawmnga, sakol-lengte le sakolte a#1.5 Ahikeh sakol-tuangte tawh a kithawisak hi. 6 (A pa in, "Bang hangin na ut banga ta na hi hiam?" ci-in a tai ngei kei hi. Amah zong a mel hoih mahmah a Absalom zoma suak ahi hi.)#2Sa 3:4; 15:1
7 Adonijah in Zeruiah tapa Joab le siampipa Abiathar hih thu donga amaute in a thukimpih uh hi. 8 Ahi hangin siampi Zadok, Jehoiada tapa Benaiah, kamsangpa Nathan, Shimei le Rei b#1.8 Ahikeh le a lawmte le David cing tuamte in Adonijah a pawlpih kei uh hi.#2Sa 20:25; 23:8; 1Ku 2:22, 28
9 Tua ciangin Adonijah in En Rogel kiang Zoheleth Suangpi ah tuu, bawng le bawngno vakthaute biakna-in a pia hi. Amah in a sanggamte khempeuh, kumpi tapate le kumpi ulian ahi Judah mi khempeuh sam napi 10 ahi hangin kamsang Nathan ahi-a, Benaiah ahi-a, a cing tuamte ahi a, a sanggampa Solomon ahi zongin a sam kei hi.
11 Tua ciangin Nathan in Solomon nu Bathsheba kiangah, "I topa David theih loh kalin Haggith tapa Adonijah kumpi a suah lam za lo na hi uh hiam?" ci-in a dong hi. 12 "Tua ahi ciangin tu in nangma nuntakna le na tapa Solomon nuntakna na hotkhiat theih nadingin ngaihsutna khat kong pia ding hi. 13 Kumpi David kiangah lut inla, ‘Ka to kumpipa aw, na nasemnu tungah: "Kei khita kumpi sem ding na tapa Solomon hi a, ka kumpi tokhom ah a tu taktak ding hi," ci-in hong kiciam hi lo na hi hiam? Bang hangin tu-in Adonijah kumpi suak ta ahi hiam?’ ci-in gen in. 14 Kumpipa tawh na kihoho laitakin kei hong tumin na gensate kong kipsak ding hi," a ci hi.
15 Tua ciangin a tekta kumpipa va mu dingin inndei sungah Bathsheba lut-a, Shunam-te Abishag in a na kem hi. 16 Kumpipa mai-ah Bathsheba kunsukin a khukdin hi.
Kumpipa in, "Bang deih na hiam?" ci-in a dong hi.
17 Tuanu in ama kiangah, "Ka topa aw, TOPA na Pasian lo-in na nasemnu keima tungah: ‘Kei khita kumpi suak ding na tapa Solomon hi a, ka kumpi tokhom ah a tu ding hi,’ ci-in nangmah nong kiciam hi. 18 Ahi hangin tu-in Adonijah kumpi suak khin a, tua thu nangmah ka to kumpipa in na thei kei hi. 19 Amah in ganhon tampitak, bawngno vakthau le tuute go a, kumpipa tapa khempeuh, siampi Abiathar le galkap mangpa Joab sam napi na nasempa Solomon a sam kei hi. 20 Ka to kumpipa khitteh kumpi tokhom tungah kua tu ding cih a theih nadingun Israel khempeuhte’ mit nang tung hong tu hi, ka to kumpipa aw. 21 Tua hi kei leh ka to kumpipa a pate tawh tawlnga dinga a kisialkhawm phetin kei le ka tapa Solomon mawhna neite bangin hong kibawl pah ding hi," a ci hi.#tg 13,30; Tp 31:16; 1Ku 2:10
22 Tuanu kumpipa tawh a kihoho laitakin kamsangpa Nathan a tung hi. 23 Tuateh amaute in kumpipa kiangah, "Kamsangpa Nathan hih lai-ah om hi," ci-in a gen uh hi. Tua ciangin kumpipa mai-ah amah pai-a leilam nga-in a kunsuk hi.
24 Nathan in, "Ka to kumpipa aw, nang khitah Adonijah kumpi suakin na kumpi tokhoma tu dingin na pulak mah ahi hiam? 25 Tuni-in amah paisuk khinin biakna-in ganhon tampi, bawngno vakthau le tuute a pia hi. Kumpipa tapa khempeuh, galkap mangte le siampi Abiathar a sam khin hi. Tu mahmah in amaute in amah tawh nekhawm dawn khawm uh a, ‘Kumpi Adonijah khansawt hen!’ ci uh hi. 26 Ahi hangin na nasempa kei, le siampi Zadok, le Jehoiada tapa Benaiah, le na nasempa Solomon hong sam lo hi. 27 Ka to kumpipa in ama nasemte hong theisak loin ka to kumpipa khitah a tokhoma tu ding na hihsa ahi hiam?" a ci hi.
David in Solomon Kumpi Suaksak
28 Tua ciangin Kumpi David in, "Bathsheba hong tumsak un," a ci hi. Tua ciangin amah kumpipa omna-ah lutin a mai-ah a ding hi.
29 Tua ciangin kumpipa kiciam a: "Ka lungkhamna khempeuh pana hong hukhiapa TOPA nuntakna lo-in ka cih inah 30 TOPA Israel Pasian ah kiciama nang tungah: Kei khitin na tapa Solomon kumpi suak dinga ka kumpi tokhom keima munah a tu ding hi, ka cihsa tuni-in ka tungsak taktak ding hi," a ci hi.
31 Tua ciangin Bathsheba niamtakin lei lamah kunsuk a, kumpipa mai-ah khukdin sa in, "Ka topa Kumpipa David nungta tawntung hen!" a ci hi.
32 Kumpi David in, "Siampi Zadok, kamsang Nathan le Jehoiada tapa Benaiah hong lutsak un," a ci hi. Amaute kumpipa mai a tun uh ciangin 33 amah in amaute kiangah: "Na topa nasemte tonpih unla ka laa tungah ka tapa Solomon tuangsakin Gihon ah paipih suk un. 34 Tua lai-ah siampi Zadok le kamsangpa Nathan in Israel kumpi dingin sathau a nilh ding uh hi. Pengkul mut unla, "Kumpi Solomon khansawt hen!" ci-in awng un. 35 Tua ciangin amah tawh tonto unla amah ka kumpi tokhom ah tu-in kei munah a mang ding hi. Israel le Judah a ukpa dingin amah ka seh khin hi," a ci hi.#1Sa 10:1; 2Sa 15:10
36 Jehoiadah tapa Benaiah in, "Amen! TOPA ka to kumpipa’ Pasian in tua bangin ci ta hen. 37 TOPA in ka to kumpipa a ompih bangin Solomon ompih in ka topa Kumpipa David tokhom sang nangawnin a tokhom liansakzaw ta hen!" ci-in a dawng hi.
38 Tua hi-a siampi Zadok, kamsang-pa Nathan, Jehoiada tapa Benaiah, Kereth-te le Peleth-te paisuk uh a, Kumpi David laa tungah Solomon tuangsakin Gihon ah a paipih suk uh hi. 39 Siampi Zadok in puanbuk siangtho panin sathau koihna saki la a Solomon a nilh hi. Tua ciangin amaute in pengkul mutin mi khempeuh in, "Kumpipa Solomon khansawt hen," ci-in a awng uh hi. 40 Tuateh mi khempeuh in a nung zui to uh a, tamngai mut kawmin nuam a sa mahmah uh hi; amaute awging in lei a lingsak hi.
41 Adonijah le a ompih a lenglate khempeuh a pawi bawl uh a man kuanun hih thu a za uh hi. Pengkul ging a zak ciangin Joab in, "Khuapi sunga gamlumnate khempeuh bang ahi hiam?" ci-in a dong hi.
42 Amah a paupau laitakin siampi Abiathar tapa Jonathan a tung hi. Adonijah in, "Hong tum in. Nang bang mi gina khat in thu hoih hong puak pelmawh niteh maw," a ci hi.#2Sa 18:26
43 Jonathan in, "Hi peuhmah kei! I Kumpipa David in Solomon kumpi suaksak khin ta hi. 44 Kumpipa in amah tawh siampi Zadok, kamsangpa Nathan, Jehoiada tapa Benaiah, Kereth-te le Peleth-te sawlin amaute in kumpipa laa tungah tuangsak uh a, 45 siampi Zadok le kamsangpa Nathan in Gihon ah amah sathau nilh zo uh hi. Tua lai panin amaute gualnuamin paito uh a khuapi sung teng a thawn hi. Na zak gamlumna tua ahi hi. 46 Tua banah Solomon in a kumpi tokhom luah khin hi. 47 Kumpi ulian te zong i to David Kumpipa a lungdampih dingin pai khin uh a, ‘Na Pasian in nang min sangin Solomon min thangsak zaw henla nang tokhom sangin amah aa liansakzaw ta hen!’ ci uh hi. Tuateh kumpipa a lupna tungah kunin bia-a, 48 ‘Tuni-in kei za laih ding ka tokhom tunga tu ka mita hong musak TOPA Israel Pasian kiphat ta hen,’ " a ci hi.#tg 37; 1Ku 3:6
49 Tua tak ciangin Adonijah lenglate khempeuh lauthawngin dingto uh a, a kikhen-thang uh hi. 50 Ahi hangin Adonijah in Solomon kihta a, biakna-tau kite a pom hi. 51 Tua ciangin Solomon kiangah, "Adonijah in Kumpipa Solomon kihta a biakna-tau kite a pom hi. Amah in: ‘Kumpipa Solomon in a nasempa namsau-a hong thah loh nadingin tuni-in hong kiciam hen,’ ci hi," ci-in kigen hi.#1Ku 2:28
52 Solomon in, "Amah mi gina ahina a lah theih nak leh a samzang khat zong lei lakah kia lo dinga; ahi zongin ama sungah siatna a kimuh leh a si ding hi," ci-in a thuk kik hi. 53 Tua ciangin Kumpipa Solomon in mi sawla biakna-tau pan a lasuk uh hi. Tuateh Adonijah pai-in Kumpipa Solomon mai-ah kun-a, Solomon in, "Na inn ah ciah in," a ci hi.#1Kh 29:21-25; 1Sa 14:45
Currently Selected:
1 Kumpite 1: ZIV
Highlight
Share
Copy
Want to have your highlights saved across all your devices? Sign up or sign in
Copyright 1994 Myanmar Center for World Mission