Matthew 2
2
Pi’in nrabad ko ngek ni ngar guyed Jesus
1I Jesus e ni gargeleg u lan e binaw nu Bethlehem, ni bay u lan e nug nu Judea, ko ngiyal’ ni Herod e pilung. De n’uw nap’an ni kan gargeleg Jesus me yib boch e girdi’ u ngek nga Jerusalem, ni girdi’ ni manang murung’agen e t’uf, miyad fith ni be lungurad, 2“Bu uw fare tir ni kan gargeleg ni ir e nge mang pilung rok piyu Israel? Ya kug guyed t’ufan ko ngiyal’ ni m’ug u lan e ngek, me ere kugbad ni nggu siro’gad ngak.” 3Ma fa’ani rung’ag Herod ni Pilung ni aram rogon me rus, ma ku errogon urngin e girdi’ nu Jerusalem. 4Me ulunguy Herod urngin e pi tolang ko prist nge pi tamchib ko Motochiyel nge fithrad ni ga’ar, “U uw e yira gargeleg fare Messiah riy?” 5Miyad fulweg ngak ni lungurad, “U lan e binaw nu Bethlehem, ni bay u lan yu Judea. Ba’aray e tin ni yoloy e profet ni ga’ar:
6‘I gur e binaw nu Bethlehem, ni ga bay u lan e nug nu Judah,
gathi gur e th’abi sobut’ u fithik’ e pi binaw ni pilung u lan yu Judah;
ya gur e bay yib be’ rom ni ir e nge gagiyegnag e girdi’,
ni ir e nge pow’iy e girdi’ rog ni yu Israel.’ ”
7Me pining Herod fapi girdi’ nrabad ko ngek ni ngar guyed Jesus ngar mu’ulunggad ngak nde nang be’, me fithrad Herod ko re ngiyal’ i n’en ni m’ug fare t’uf u lanelang. 8Me l’oegrad ni ngranod nga Bethlehem me ga’ar ngorad, “Marod ngam fal’eged i gayiy e re tir nem, ma fa’an gimed ra pir’eg mi gimed guy rogon nggu nang, nge yag ni ku gu wan gu siro’ boch ngak.” 9Ma aram miyad yan, ma nap’an ni ka yad be yan miyad guy fare t’uf ni ka fare t’uf nra guyed u lan e ngek — me ere i m’on rorad nge yan i taw nga puluwon fa gin’em ni bay fare tir riy, me tal. 10Ma ngiyal’ nra guyed e re t’uf nem e rib gel e felfelan’ ni yib ngorad! 11Miyad chuw nga naun miyad guy fachi tir ni bay rok Maria ni chitiningin. Miyad ragbug ngar siro’gad ngak; miyad bing e tutuw rorad miyad tow’athnag ko gol, nge frankincense, nge myrrh.
12Me yog Got ngorad u malik’ay ndab kur sulod ngak Herod; ma aram miyad sul nga taferad u yugub pa’ e kanawo’.
Mil ntay nga Egypt
13Nap’an ni kar chuwgad me m’ug ba engel rok Somol ngak Josef u malik’ay ni be ga’ar ngak, “Mu od, mfek fare tir nge chitiningin ngam milnagrow nga Egypt, ma ga par u rom nge mada’ ko ngiyal’ ni bay gog ngom ni ngam chuw u rom. Ya bayi gay Herod e re tir nir ni nge li’ ngem’.”
14Me sak’iy Josef, nge fek fare tir nge chitiningin, nge yan ni kab neap’ nga Egypt, 15ni aram e gin ni par riy nge mada’ ko ngiyal’ ni yim’ Herod.
Ren’ey e nrin’ ni aram rogon ni fan e nge yib i m’ug nib riyul’ e pin’en ni yog Somol u l’ugun fare profet ni ga’ar, “Kug pining Fakag u Egypt.”
Bitir nli’rad ngarm’ad
16Ma fa’ani nang Herod ni fa pi’in nrabad u ngek e kar ban niged, me ri damumuw. Me pi’ e thin ni ngan li’ ngem’ urngin e bitir ni pumo’on u lan yu Bethlehem nge yungi n’en ni bay u to’oben yu Bethlehem, ni bitir ni l’agruw e duw yangren nga but’ — nike yan i puluweg ko fa ngiyal’ ni ba’aram ni m’ug fare t’uf riy ni bod rogon ni weliy fa pi’in nrabad u ngek ngak.
17Ma aram me yib i m’ug nib riyul’ e tin ni yog Jeremiah ni profet ni ga’ar:
18“Kan rung’ag ba lam u Ramah,
ni laman e dololoy’ nge meyor nib gel.
I Rachel e be yornag pifak,
be yor ndabiyag i fal’eg laniyan’,
ya go’ karm’ad.”
19Fa’ani yim’ Herod, me m’ug ba engel rok Somol ngak Josef u malik’ay u Egypt, 20me ga’ar, “Mu od, ngam fek fare tir nge chitiningin, ngam sulod ko nam nu Israel, ya fa pi’in ur guyed rogon ni ngar li’ed e re tir nir ngem’ e karm’ad.”
21Ma aram me sak’iy Josef, me fek fare tir nge chitiningin, ngar sulod ko nam nu Israel.
22Ma nap’an ni rung’ag nike yan Arkelaus ko liw rok Herod ni chitamngin ni ir e kemang pilung nu Judea, me tamdag Josef ni nge par u rom. Minog ngak u malik’ay e tin nge rin’, ma aram me yan ko nug nu Galile, 23me yan i toy e naun rok ngalan bbinaw nike lunguy yu Nazareth. Me rin’ ni aram rogon ni fan e nge yib i m’ug nib riyul’ e n’en ni yog e pi profet ni lungurad, “Bay nog ni be’ u Nazareth.”
Currently Selected:
Matthew 2: YAP
Highlight
Share
Copy
Want to have your highlights saved across all your devices? Sign up or sign in
© 2007 Bible Society of Micronesia. Released under the Creative Commons CC-BY-SA license 4.0.