MALAKHI 2
2
1U Trai Badonbor Baroh u ong ha ki lyngdoh, “Kane ka hukum ka long na ka bynta jong phi: 2Phi dei ban burom ïa nga da kaei ba phi leh. Lada phim shahshkor ïa kaei kaba nga ong, te ngan wallam ka jingtim ha phi. Ngan buh ïa ka jingtim ha kiei kiei kiba phi ïohpdiang na ka bynta ka jingkyrshan ïa phi. Ha ka jingshisha, nga la dep buh lypa ka jingtim ha ki, namar phim shym pdiang sngewkhia ïa ka hukum jong nga. 3Ngan pynshitom ïa ki khun jong phi bad kyllan ïa ki durkhmat jong phi ha ka jakhlia jong ki jingri kiba phi kñia — bad yn ïalam ïa phi sha ka kynton jakhlia. 4#Jkhñ. 3:11-13Nangta phin ïoh tip ba nga la ai ha phi ïa kane ka hukum, khnang ba ka jutang jong nga bad ki lyngdoh, ki khun ki ksiew u Lebi, kan ym dkut noh.
5 #
Jkhñ. 25:12
“Ha ka jutang jong nga, nga la kular ha ki, ïa ka jingim bad ka jingmanbha, bad kane ka long kaei kaba nga la ai ha ki, khnang ba kin lah ban burom ïa nga. Ha kito ki sngi ki la burom bad sheptieng ïa nga. 6Ki la hikai ïa kaei kaba dei, ym ïa kaei ka bym dei. Ki la im ha ka jingïadei basngewtynnat bad nga; ki la leh ïa kaei kaba dei ym tang ha lade, hynrei ki la ïarap ruh ïa kiba bun ban sangeh na kaba leh ïa kaba sniew. 7Ka dei ka kamram ki lyngdoh ban hikai ïa ka jingtip bashisha ïa U Blei. Ki briew ki dei ban leit sha ki ban tip ïa ka mon jong nga, namar ki long ki nonglamktien jong U Trai Badonbor Baroh.
8“Hynrei mynta ma phi ki lyngdoh phi la phai noh na ka lynti kaba dei. Ki jinghikai jong phi ki la ïalam ïa kiba bun ban leh ïa ka bym dei. Phi la pynkheiñ ïa ka jutang kaba nga la pynlong bad phi. 9Te nga, da kaba phai pat, ngan pynlong ïa ki paid Israel ban ibeiñ ïa phi namar phim shym kohnguh ïa ka mon jong nga, bad haba phi hikai ïa ki briew jong nga, phim shym ñiew kumjuh ïa baroh.”
Ka jingbymïaineh jong ki briew ha U Blei
10Hato baroh na ngi ngim don ujuh u kpa? Hato ym dei ujuh U Blei uba la thaw ïa ngi baroh? Te balei ngi pynkheiñ ïa la ki jingkular iwei ïa iwei pat, bad balei ngi ñiewbeiñ ïa ka jutang kaba U Blei u la pynlong bad ki kpa tymmen jong ngi? 11Ki paid Judah ki la pynkheiñ ïa ka jingkular jong ki sha U Blei bad ki la leh ïa kaei kaei kaba shyrkhei ha Jerusalem bad ha ka ri baroh kawei. Ki la pynjakhlia ïa ka Templ kaba U Trai u ieit. Ki rangbah ki la shongkurim ïa ki kynthei kiba mane ïa ki blei nongwei. 12To ai ba U Trai un weng noh na ka jaitbynriew Israel ïa kito kiba la leh ïa kane, bad ban ym shah ïa ki lano lano ruh ban ïashim bynta ha ki jingainguh kiba ka hima jong ngi ka wallam sha U Trai Badonbor Baroh.
13Kane ka long kawei pat kaba phi leh. Phi pynjhieh ïa ka duwan U Trai da ki ummat, da kaba ïam bad kyang namar um shym pdiang shuh ïa ki jingainguh kiba phi wanrah sha u. 14Phi kylli balei ba um shym pdiang shuh ïa ki. Ka long namar u tip ba phi la pynkheiñ ïa ka kular jong phi ïa ka tnga kaba phi la shongkurim mynba phi dang khynraw. Ka la long ka paralok jong phi, bad phi la pynkheiñ ïa ka jingkular jong phi ïa ka, wat la phi la kular ha khmat U Blei ba phin ïaineh bad ka. 15Hato U Blei um shym la pynlong ïa phi kawei ka met bad mynsiem bad ka? Kaei ka jingthmu jong u ha kane? Ka long ba phi dei ban don ki khun kiba long ki briew jong U Blei da shisha. Te pynthikna ba yn ym don na phi uba pynkheiñ ïa la ka jingkular ha ka tnga jong u. 16“Nga isih ïa ka jingpyllait tnga,” ong U Trai U Blei ki Israel. “Nga isih ïa ka haba uwei na phi u leh ïa kaba kum kata ka kam runar ïa la ka tnga. To pynthikna ba phin ym pynkheiñ ïa la ka jingkular ban long uba ïaineh bad la ka tnga.”
Ka Sngi ka jingbishar ka la jan
17Phi la pynlwait ïa U Trai da ki jingkren jong phi. Hynrei phi kylli, “Da kumno ngi la pynlwait ïa u?” Da kaba ong, “U Trai Badonbor Baroh u pyrkhat ba baroh ki nongkamsniew ki long kiba bha; ha ka jingshisha u sngewtynnat ïa ki.” Lane da kaba kylli, “Hangno don U Blei uba dei ban long uba lehhok?”
Currently Selected:
MALAKHI 2: KHACLBSI
Highlight
Share
Copy
Want to have your highlights saved across all your devices? Sign up or sign in
Khasi CL Bible
Copyright © Bible Society of India, 2016.
Used by permission. All rights reserved worldwide.