加拉太書 1
1
1𠊎係使徒保羅。𠊎做使徒毋係對人个揀選，也毋係人所指派个，係耶穌基督㧯使佢對死復活个阿爸上帝所指派个。 2𠊎㧯同𠊎共下个兄弟姊妹寫信仔給加拉太个各教會。
3願𠊎等个阿爸上帝㧯主耶穌基督賜恩典、平安給你等！
4基督為到愛救𠊎等脫離這邪惡个時代，遵從𠊎等阿爸上帝个旨意，識為𠊎等个罪犧牲自家。 5願榮光歸給上帝，直到世世代代！阿愐。
惟一个福音
6𠊎盡著驚！你等樣會恁遽就離開通過基督个恩典呼召你等个上帝，去跈別个福音！ 7其實，該並毋係福音。𠊎恁樣講，因為有人來攪亂你等，想愛改變基督个福音。 8其實，就算係𠊎等，抑係天頂來个天使，若係對你等傳別个福音，同𠊎等頭擺所傳給你等个無共樣，佢就應當受咒詛！ 9𠊎等識講過，這下𠊎再講：無論麼人，若係對你等傳別个福音，同你等頭擺所領受个無共樣，佢應當受咒詛！
10𠊎恁樣講，敢係愛被人稱讚嗎？毋係！𠊎所愛个係上帝个稱讚！𠊎敢係愛得人个歡喜嗎？𠊎若係還想愛得人个歡喜，𠊎就毋係基督个僕人了。
保羅成做使徒个經過
11兄弟姊妹啊，𠊎愛你等知，𠊎所傳个福音毋係人想出來个。 12這個福音，𠊎毋係對人領受个，也毋係有麼人教𠊎个，係耶穌基督親自啟示𠊎个。
13𠊎頭擺信猶太教个時所做个，你等識聽過。𠊎迫害上帝个教會到盡厲害，盡所能愛消滅教會。 14共輩个猶太人當中，𠊎比大部份人較認真遵行猶太教个規矩，較熱心遵守𠊎祖先个傳統。
15總係，上帝施恩給𠊎，在𠊎出世以前，佢已經揀選𠊎，呼召𠊎來事奉佢。 16當佢樂意將佢个孻仔啟示給𠊎，喊𠊎在外邦人中間傳關係基督个福音，該樣時，𠊎並無去請教麼人， 17也無去耶路撒冷見該兜比𠊎先做使徒个人，反轉黏時去阿拉伯，然後再轉去大馬士革。 18三年後，𠊎正去耶路撒冷見彼得，同佢共下住十五日。 19𠊎無看到別个使徒，只有主个老弟雅各#1:19 原文看毋出「主个老弟」係毋係算使徒个一個。。
20𠊎所寫个係真實个；在上帝面前，𠊎毋敢講花撩。
21後來，𠊎去到敘利亞㧯基利家个一帶。 22該時，猶太省各教會个基督徒全部毋識𠊎。 23佢等單淨聽講：「該頭擺迫害𠊎等个人，這下反轉傳佢過去想愛消滅个信仰！」 24恁樣，佢等就因為𠊎个緣故頌讚上帝！
Currently Selected:
加拉太書 1: THV12Hdb
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2012
All rights reserved
© 台灣聖經公會版權所有 2012