哥林多後書 8
8
基督徒个樂捐
1兄弟姊妹啊,𠊎等希望你等知,上帝樣般恩待馬其頓个各教會。 2佢等堵到患難,受盡嚴重个考驗;總係佢等滿心歡喜,雖然非常窮苦,還係大方樂捐,像係有錢人。 3𠊎做得證明,佢等个樂捐係盡所能个,甚至超過佢等个力量。佢等自動自發, 4再三懇求𠊎等,俾佢等有份在救濟耶路撒冷个聖徒這件善事。 5佢等所做个超過𠊎等所希望个。佢等係先將自家獻給主,然後又照上帝个旨意㧯𠊎等𢯭手。 6像恁樣,𠊎等鼓勵提多繼續協助你等,完成佢所開始个這件善事。 7你等所有个,無論係信心、口才、智識、幫助人个熱誠,㧯對𠊎等个愛心 #8:7 「對𠊎等个愛心」有兜古卷係「𠊎等對你等个痛惜」。,全部恁豐盛;𠊎希望你等在這件善事上也愛特別出色。
8𠊎毋係對你等下命令,係愛你等知別人樣般熱心幫助人,用恁樣來考驗你等个愛心有實在無。 9你等知𠊎等主耶穌基督个恩典:佢本來係富足个,總係為到你等个緣故,佢使自家成做窮苦,目的係愛使你等因為佢个窮苦成做富足。
10這件事情,照𠊎看:你等舊年就開始个樂捐,最好目前愛完成。你等毋單淨最先開始進行,也係最先響應。 11你等所做个,愛即時做給它完成!你等愛用一開始發動該樣時个熱心,照你等這下所有个,來完成這件事。 12你等若真心樂捐,上帝一定會接納;佢愛你等獻你等所有个,毋係你等所無个。
13-14𠊎毋係想愛加重你等个負擔,來減輕別人个負擔。既然你等這下恁富足,就應該幫助該兜窮苦个。到佢等富足,你等有欠缺个時,佢等也會幫助你等。恁樣,雙方都有機會幫助對方。 15像聖經所講:
拈較多个無好賸,
拈較少个也無欠。
提多㧯佢个同工
16感謝上帝,佢使提多同𠊎等共樣恁熱心來協助你等! 17佢毋單係因為𠊎等个鼓勵,也係因為佢盡熱心,自動愛去你等該位。 18𠊎等另外派一個兄弟同佢共下去;這個兄弟在傳福音个工作上盡受各教會个稱讚。 19毋單淨恁樣,各教會也選派佢做𠊎等旅途个同伴,共同進行這件善事;恁樣做个目的係愛榮光主个名,也表示樂捐係大家歡喜甘願做个。
20𠊎等保管這筆出手大方个樂捐,一直非常細膩,免得惹人加講話; 21因為𠊎等決定做善事,毋單淨在主面前恁樣,在人面前也係恁樣。
22𠊎等又派另外一個兄弟同佢等共下去。這個兄弟,𠊎等考驗佢好多擺,知佢盡熱心幫助別人。這下,佢因為對你等有信心,盡想愛去幫助你等。 23論到提多,佢係𠊎个同伴,㧯𠊎共下協助你等。同佢共下去个另外兩個兄弟係各教會个代表,係基督个榮光。 24所以,你等愛在各教會个面前,將你等對佢等个痛惜實行出來,俾各教會知,𠊎等對你等个誇獎係確實个。
Currently Selected:
哥林多後書 8: THV12Hdb
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2012
All rights reserved
© 台灣聖經公會版權所有 2012