哥林多後書 3
3
新約个僕人
1𠊎等敢係再一擺推薦自家嗎?敢講𠊎等也愛像有兜人恁樣,需要拿推薦書給你等,抑係對你等討推薦書係麼? 2你等就係𠊎等个推薦書,寫在𠊎等个心內,係大家所知、大家所讀个。 3非常明顯,你等就係基督所寫个信仔,𠊎等係傳送个人。這封信仔毋係用墨汁寫在石版頂个,係用永生上帝个靈寫在人心肚个。
4𠊎等通過基督在上帝个面前有這種信心。 5這毋係講,𠊎等自家有麼介才調好做這個工作;𠊎等个才能係對上帝來个。 6係佢使𠊎等有才能好做新約个僕人;這約毋係字面上个法律,係聖靈个約。字面上个法律所帶來个係死,總係聖靈所賜个係生命。
7法律係用文字刻在石版頂个,頒佈个時,有上帝个榮光顯現出來。雖然射在摩西面頂个榮光漸漸消失,佢面頂个光還係恁強,使以色列人無法度注目看佢。這帶死來个事工有恁大个榮光, 8恁樣,聖靈个事工敢毋係還較有榮光嗎? 9連定人死罪个事工有榮光;該宣佈人無罪个事工當然還較有榮光! 10其實,𠊎等做得講,既然這下有過較大个榮光,該頭擺有榮光个,就毋算麼介了。 11連漸漸失效个也有榮光,這長存个就當然有還較大个榮光。
12既然𠊎等有這種个盼望,𠊎等就還較大膽。 13𠊎等毋使像摩西恁樣,佢的確愛用面帕幪等自家个面,使以色列人無法度注目看佢个面,直到該光漸漸消失。 14總係佢等个心思卻硬化掉去;到今晡日,佢等讀舊約个時,佢等个心還係幪等共樣个帕仔。因為人只有同基督結連,佢心中个帕仔正會掀開。 15就係在今晡日,佢等逐擺讀摩西个法律,佢等个心還係幪等帕仔。 16總係,人幾時轉向主,帕仔幾時就掀開 #3:16 「總係…掀開」抑係譯做「總係,像聖經所講:『摩西轉向主个時節,佢面頂个帕仔就掀開』。」。 17這位所講个「主」就係聖靈。主个靈在㖠位,㖠位就有自由。 18𠊎等大家个面全部無幪帕仔,就反射 #3:18 「反射」抑係譯做「看到」。主个榮光;主 — 就係聖靈 — 所發出个榮光緊改變𠊎等,使𠊎等成做佢个樣式,越來越有榮光。
Currently Selected:
哥林多後書 3: THV12Hdb
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2012
All rights reserved
© 台灣聖經公會版權所有 2012