哥林多後書 2
2
1因為恁樣,𠊎決心下一擺正訪問你等,免得害你等再憂愁。 2若係𠊎害你等憂愁,有麼人能使𠊎快樂呢?敢毋係你這兜因為𠊎憂愁个人嗎? 3所以,𠊎寫該封信仔給你等,免得𠊎到你等該位个時,該兜應該使𠊎快樂个人反轉害𠊎憂愁。𠊎深信,𠊎个歡喜就係你等大家个歡喜。 4𠊎以前在憂傷痛苦當中,緊流目汁,寫該封信仔給你等,毋係愛害你等憂愁,係愛你等知𠊎係樣般痛惜你等!
赦免做毋著个人
5恁樣,若係有人害人憂愁,佢毋係害𠊎憂愁,係害你等大家憂愁,最少係害你等當中有兜人憂愁。𠊎恁樣講,係因為𠊎無愛對這種人講忒重个話。 6這種人被大部份人責備已經罅了。 7顛倒,你等愛赦免佢,安慰佢,免得佢忒傷心卻絕望。 8所以,𠊎勸你等,愛俾佢確實知你等惜佢。 9𠊎以前寫該封信仔給你等,係愛知你等係毋係有辦法贏過考驗,係毋係肯凡事順服𠊎。 10你等赦免麼人,𠊎就赦免麼人。若係𠊎赦免麼人,係因為你等个緣故在基督面前赦免佢, 11免得𠊎等被撒但較贏,因為𠊎等盡清楚撒但个詭計。
保羅个著急
12𠊎到特羅亞傳基督福音个時,主已經為𠊎打開工作个門。 13可惜,因為無堵到𠊎个兄弟提多,所以𠊎个心非常著急;𠊎就辭別該位个人,去馬其頓。
靠基督得勝
14總係,感謝上帝!佢時常帶領𠊎等,喊𠊎這兜被基督捉到个人有好參加基督勝利个行列。佢通過𠊎等將認識基督正有个香味傳到逐所在去。 15𠊎等可比基督獻給上帝个香味,傳到該兜得救个人身上㧯滅亡个人中間。 16對該兜滅亡个人來講,這氣味成做會害死人个臭味;對該兜得救个人來講,這氣味成做生命个香味。麼人做得擔當這重大个任務呢? 17盡多人將上帝个道理準做東西來賣;𠊎等毋係恁樣,因為上帝指派𠊎等,俾𠊎等在佢面前,用基督奴僕个身份,老老實實傳講。
Currently Selected:
哥林多後書 2: THV12Hdb
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2012
All rights reserved
© 台灣聖經公會版權所有 2012