哥林多後書 10
10
保羅為佢个職務辯駁
1𠊎 — 保羅親自勸話你等。你等認為𠊎同你等共下个時節盡謙和，無在你等中間个時節就盡嚴；這下，𠊎用基督个溫柔㧯慈悲求你等： 2𠊎去到个時節，拜託毋好迫𠊎對你等無客氣；該兜批評𠊎等係憑血氣行事个人，𠊎會對佢等毋客氣。 3𠊎等雖然生活在世間，總係𠊎等毋係憑血氣戰爭。 4因為𠊎等相㓾所用个毋係這世間个武器，係上帝大能个武器，能毀滅堅固个城堡。𠊎等毀滅一切虛假个辯論， 5打橫所有興起來阻擋人認識上帝个自高个論說；𠊎等也捉轉逐個人个思想來歸順基督。 6等到你等完全順服个時節，𠊎等就愛責罰一切毋順服个人。
7你等係看事情个外表定定。若係有人自認係屬基督个，佢應該再想看仔，佢屬基督，𠊎等乜共樣屬基督。 8主賜給𠊎等个職權係愛造就你等，毋係愛破壞你等。所以，就算𠊎忒過份誇口這個職權，𠊎也毋會感覺見笑。 9你等毋好認為𠊎寫信仔係愛嚇你等。 10有人講：「保羅寫信仔，話講到恁嚴重恁強；總係，佢本人看起來又恁軟弱，講話恁粗俗！」 11講這種話个人愛知，𠊎等無在你等該位个時，在信仔底背樣般講話，去到你等該位个時，也會恁樣行事。
12𠊎等當然毋敢同該兜自命不凡个人擺共下，抑係同佢等比。佢等實在真無智識，竟然用自家个標準量自家，拿自家同自家比！ 13若係𠊎等，𠊎等毋敢誇口過頭，只有在上帝交託𠊎等个工作範圍底背誇口；你等也係在這個範圍底背。 14因為𠊎等早就將基督个福音傳給你等，所以你等係在這個範圍底背；既然恁樣，𠊎等就毋算超過範圍。 15在𠊎等个範圍以外，該兜別人所完成个工作，𠊎等毋敢誇口。𠊎等只有希望你等个信心緊來緊大，使𠊎等在自家个範圍內越發擴展在你等中間个工作； 16恁樣，𠊎等做得將福音傳到你等以外个其他地區去；因為𠊎等無愛拿別人範圍內所完成个工作來誇口。 17像聖經所講：「愛誇口个人，就愛誇口主！」 18因為受接納个，毋係稱讚自家个人，係主所稱讚个人。
Currently Selected:
哥林多後書 10: THV12Hdb
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2012
All rights reserved
© 台灣聖經公會版權所有 2012