HAGGAI 2
2
Sangŭn Ramin TUHAN adi Bauh
1Di andu adi 21 darŭm buran ju sawa anŭ, TUHAN minyu dinge so baba nabi Haggai. 2Ayŭh bada Haggai minyu di Zerubbabel adi gabenor Judah, di Joshua adi Imam Bās, ngga di bara daya, 3 “Agi kah di dupan angān adi babŭ dapŭd ingat munki masam sangŭn Ramin TUHAN dawŭ-i? Munki-i kiris ngan madin? Mun au-tarun kani ayŭh. 4Pak angān dŭhnyah asa, tadŭ tadŭ so angān. Ndai kraja ngan, amai Aku agi ngga angān. 5 Di andu angān ruah so Egypt, Aku bijanji nang Aku re ari agi ngga angān. Aku babŭ agi ngga angān, jadi dŭhnyah taru.
6 “Dŭm dŭh tui Aku re ngugoh rangit ngga ong, deyŭh ngga rawŭt. 7Aku re pitumbang sopŭrŭg bangsa, ka ratā ngara re dog taban kamati, ka Ramin Ku re puno ngga pinyikaya. 8Sopŭrŭg pirak ngga mas di ong inŭh jaku. 9Ramin Ku adi bauh re rabis sangŭn so anŭ adi amba, ka diginŭ Aku re nggen di daya Ku udip mujur ngga damai.” TUHAN Bisa-pŭrŭg mbŭh minyu.
Nabi Bisiken ngga Bara Imam
10Di andu adi 24 darŭm buran prii darŭm sawa adi duwŭh Darius jadi raja-empaya, TUHAN Bisa-pŭrŭg minyu dinge di nabi Haggai. 11Ayŭh nang, “Siken di bara imam ani pikir-kira ngara di kayuh adi mun ati: 12Nyamtadar-i agi daya tambit ndi pire dagin so sadis adi muko dog jugan ka TUHAN, ka makot-i ngga tŭbŭn jipo ambu-i ka taban-i ngga maad. Ka kambŭi ko anŭ ayŭh bada jipo ambu-i anŭ dog ruti, pinguman adi dog tanŭk, wain, inyo kanā, bait tadŭ tadŭ pinguman adi bŭkŭn, kudus kah dŭh meh pinguman anŭ bada-i?”
Kan ayŭh siken sakanŭ, bara imam nam, “Dŭh.”
13 Komŭnŭ Haggai siken, “Nyamtadar-i ndi naan daya sembar sabab ko tama tadang. Kambŭi ayŭh tama tadŭ tadŭ so pinguman anŭ, sembar kah dŭh pinguman anŭ bada-i?”
Bara imam anŭ nam, “Sembar.”
14Komŭnŭ Haggai nang, “TUHAN nang simŭnŭ inŭh kayuh di daya daya bangsa ati ka di sopŭrŭg kayuh adi ngara piruah; ngapŭi meh sopŭrŭg kayuh adi ngara jugan di tunduh mija-sambah inŭh sembar.”
TUHAN Bijanji an Nyiberkat
15TUHAN nang, “Dŭh kah angān rada kayuh adi mbŭh jadi di angān? Diŭ so angān piguru pari pijog Ramin Ku, 16angān di ka tugung gandom ka pikir adŭp ngan re dapŭd duwŭh ratus kilogram, pak diginŭ kaŭs-i siratus adŭ. Angān di nyauk siratus lita wain so tong wain, pak dapŭd pat puru lita adŭ. 17Aku pait sabak adi paras ngga ujen batuh bada pirusak sopŭrŭg kayuh adi angān purun, pak babŭ gŭh angān dŭh an marik pimudip ngan pari ka Aku. 18Andu ati inŭh adi duwŭh puru-pat darŭm buran prii, andu adi ngga pinagap-rasan Ramin TUHAN mbŭh kamas dog na. Ngatin ani re jadi so andu ati. 19Sunggu mating gandom dŭm, ka tŭngŭn anggor, tŭngŭn ara, tŭngŭn delima, ka tŭngŭn kanā bayuh buān, so madin Aku re nyiberkat angān.”
Janji TUHAN di Zerubbabel
20Di andu anŭ gŭh, andu adi 24 darŭm buran anŭ, TUHAN nggen dinge adi piduwŭh saba pinganang di Haggai 21yŭn Zerubbabel, adi gabenor Judah: “Dŭm dŭh tui Aku re ngugoh shorga ngga ong 22ka pitumbang pritah pritah ka nyirubuh kuasa-i. Aku re bada krita krita kuda tibarik samŭn bara adi pimanu-i; kuda kuda re kabŭs, ka bara pinunggang-i re bisiŭ dupan adŭp ngara. 23Di andu anŭ Aku re tambit kuu, Zerubbabel adi urun Ku, ka Aku re tijuan kuu bada mritah ngga adŭn Ku. Kuu inŭh adi Aku mbŭh mien.” TUHAN Bisa-pŭrŭg mbŭh minyu.
Currently Selected:
HAGGAI 2: TBVONT
Highlight
Share
Copy
Want to have your highlights saved across all your devices? Sign up or sign in
Hakcipta - Today's Biatah Version New Testament © The Bible Society of Malaysia, 2003.