DANIOL 2
2
Nipi di Nobukadnisar
1Tontok di koduwo nod toun di Raja' Nobukadnisar do momorinta', om pongipi no iyau. Om atangkabo tomod diri iyau do kosorou di nipi dau, gisom dot a' no iyau koodop. 2Om lohowo' noddi dau i mogogontong, om i piro-piro bobolian, om i mogogontong do nasip, om it ongoilo do limu', do mongoi poilo dau do komoyon di nipi dau'ddi. Om soira'ddi minongoi rapou di raja' i piro-piro tulun diri, 3om boros ka dau dot id diyolo', “Atangkabo tomod oku do kosorou di nipi ku. Om mokiilo oku ondung nunu o komoyon diri,” ka.
4Om boros ka diyolo' do minomoros do boros dot Aram, “Maha' daa om otogui o raja'! Susuyo' no ino nipi nu om poboroson i' dahai o komoyon diri dot id diya',” ka diyolo'.
5Om boros ka di raja' dot id diyolo', “Natantu' ku no dot id suang do ginawo ku dot iyokoyu o monusui di nipi ku om sunudan oku nogindo do komoyon diri. Ondung a' kou koilo, om pogitobilang-bilangon ku nopondo o tinan dokoyu om huyason ku o walai dokoyu. 6Nga' ondung koilo kou do momisunud doho' di nipi ku om i komoyon diri, om somulian ku nondo iyokoyu dot ipuhawang om pangkat dot asawat. Sunudai oku nod dinondo ondung nunu i nipi ku'ddi om ondung nunu o komoyon diri,” ka dau.
7Om boros ka kawagu diyolo' dot id raja', “Ondung susuyan daa iyahai do Tuan Raja' di nipi'ddi, om posunudon i' dahai o komoyon diri,” ka.
8Om boros ka di raja', “Otopot no kopio i tosorou ku! Orohian kou nod mangayi'd maso, tu' noilaan no dokoyu do nokopomusorou oku no dot 9iyoon ku o pomohukum dokoyu ondung a' dokoyu posusuyon dot id doho' i nipi ku. Nokopogipapakat kou no do mongudut doho' tu' mogondos kou nopo daa do posimbanon ku i natantu' mantad ku. Sunudai oku pogi' di nipi, om oilaan ku nogindo do milo kopio kou do posunud do komoyon diri,” ka dau.
10Om boros kaddi di mogogontong dot id raja', “Iso' piya'd tulun do pointongkop diti pomogunan nga' aiso' i' o milo do posunud dot id Tuan Raja' di pokionuon nu. Aiso' i' o nokoumbal dot ongoiso' piya'd raja', dot iri piya it agayo om it okoris kopio, do monuhu' di mogogontong, om i bobolian, om it ongoilo do limu', do momonsoi'd miagal diti. 11Iti nopo ponuhuan do Tuan Raja' om adalaan no kopio kapagon, om aiso' no songulun piya do milo'd momonsoi'ddi do suwai ko' kinorohingan, nga' a' i' iyolo' poingiyon dot id rolot do tulun,” ka diyolo'.
12Om gowoi poddi do kotogod no tomod i raja' do nokorongou'ddi. Om ponuhu' no iyau do mamatai ngai' di tulun dit ongoilo kopio do hilo'd Babil. 13Om poboroso' noddi di raja' i tisuhu' dau do mamatai ngai' diyolo', om kohompit nogi' i Daniol om iri ngai' i tambalut dau do patayon.
Pinointalang do Kinorohingan dot id di Daniol i Nipi om Komoyon di Nipi
14Om ongoi noddi i Daniol solowot di Ariok, i boyoon do madtatamong di raja', om i nosuhu' do mongoi pamatai. 15Om boro-boros noddi iyau dot opian do minuhot di Ariok ondung nokuro tu' minonuhu' i raja' do momonsoi'd miagal kopio'ddi karaat. Om sunudai nod i Ariok i Daniol di nosiliu.
16Om tilombus nopoddi i Daniol do minongoi pokianu'd maso dot anaru-naru do mongoi solowot di raja' om osunudan i' dau i raja' do komoyon di nipi'ddi. 17Om uli' noddi i Daniol do minongoi pomisunud di piro-piro tambalut dau: i Hanania, i Misail om i Asaria, di nosiliu'ddi. 18Om sunudai no dau iyolo' do sumambayang dot id Kinorohingan di hilo'd surga do mokiinsian dau om potudukon i' dau i nipi dit a' oilaan diri dot id diyolo', om a' indo iyolo' apatai do kotonggoi di tulun do suwai dot ongoilo do hilo'd Babil. 19Om totuong poddi om pointalango' nod Kinorohingan it a' oilaan diri dot id di Daniol dot id pinointalang. Om royoho' noddi dau i Kinorohingan do hilo'd surga. 20Boros ka dau,
“Kinorohingan nopo om kitoilaan i' om kisinundu,
royohon no iyau do gisom dot alaid.
21Iyau no i manantu' do maso om kooyu-oyuo' do talun,
om iyau o posiliu om iyau o mongidu' do raja'.
Iyau no i manahak do toilaan,
om pomusarahan di kosuhut.
22Popointalang iyau di songinlisok dit angaralom kopio.
Oilaan i' dau i poinlisok dot id totuong,
om nosorilian iyau do tanawau.
23Royohon ku iya', om pusohon ku iya',
oi Kinorohingan di komolohingan ku.
Nonuan oku diya' do toilaan om kokorisan,
om nosimbar nu o sambayang ku.
Om notudukan nu iyahai ondung nunu o posunudon dahai dot id raja',” ka dau.
Sinusui di Daniol i Nipi di Raja' om Pinoboros Dau o Komoyon Diri
24Om ongoi noddi i Daniol solowot di Ariok, i sinuhu' di raja' do mongoi pamatai di tulun dot ongoilo'ddi. Om boros kad i Daniol dot id di Ariok, “Kada' iyolo' patayo'. Ngoyo' oku posolowoto' di raja', om sunudan ku i' iyau do komoyon di nipi dau,” ka dau.
25Om tilombus nopo i Ariok do minongoi posolowot di Daniol di Raja' Nobukadnisar, om sunudai no dau i raja' do poingkaa, “Haro o nabantalan ku'd iso' di tulun do Yohudi di nangatanggayan do hiti do koilo'd posunud do komoyon di nipi do Tuan Raja',” ka dau.
26Om boros ka di raja' dot id di Daniol, i pinungaranan dot i Biltisasar, “Milo ko i' do momisunud doho' di nipi ku om komoyon diri?” ka dau.
27Om boros kad Daniol, “Oi Tuan Raja', aiso' i' o tulun dit oilo, om i mogogontong, om i mogogontong do nasip, om i mongingilo do komoyon do rombituon do milo'd posunud diri dot id Tuan Raja'. 28Nga' haro i' o Kinorohingan do hilo'd surga do popointalang do koinsanai di poillisok. Sinunudan ko dau, oi Tuan Raja', dit osiliu do koimbagu. Om sunudan ku nondo iya' di nipi, om i pinointalang do nokito nu di maso nu'd koodop.
29Tontok di koodop ko oi Tuan Raja', om nokoipi ko do pasal dit id dabantalan. Om pinointalangan ko'd Kinorohingan, i popointalang do koinsanai di poinlisok, dit osiliu do koimbagu. 30Om iri nopo i poinlisok daa'ddi nga' pinointalang i' dot id doho', om okon i' ko' aralom o toilaan ku ko' isai nopo, nga' popoilo no do Tuan Raja' do komoyon di nipi nu om kosuhut ko i' di pomusarahan do nosorou nu, oi Tuan Raja'.
31Oi Tuan Raja', id suang nopo di pinointalang do nokito nu'ddi om nokokito ko do tininganak dot agayo do poingkakat dot id toguang nu. Om mogulinau tomod iri, nga' koronob iddi kopio o kokitanan. 32Iri nopo tulu di tininganak diri nga' tamas di nosompipi' do winonsoi; om iri no kangkab om longon om pirok do winonsoi; om iri no tawak om poo om tambaga' do winonsoi; 33om iri nopo gakod om basi' do winonsoi, om iri no lapap om basi' do winonsoi o sampaping, om lagit do winonsoi o sampaping. 34Om soira'ddi poingontong ko daa di tininganak diri, om liid no o watu dot agayo do mantad hiri'd rungas, om aiso' i' o tulun do minongoi kimbir-kimbir diri. Om koonong no di watu'ddi i lapap do basi' om lagit di tininganak, om komumuk nopo. 35Om tontok iddi do nahaba' i tininganak diri, om nosiliu do kinotimungon do basi' om lagit, om tambaga' om pirok, om tamas, do miagal poddi pupuk do hilo'd pamagamasan do gandum do dongmagadau. Om kotilib ngai' nopo do tongus i pointimung diri, om aiso' no o noolu-olu'. Nga' suminiliu iddi do nuluhon i watu dot agayo, i minamahaba' di tininganak diri do gisom dot irad do nuluhon kagayo om nokoponu' diti pomogunan.
36Iri no i nipi nu'ddi, oi Tuan Raja', om sunudan ku nondo o Tuan Raja' do komoyon diri. 37Oi Tuan Raja', iya' no o raja' dit agayo kopio. Siniliu ko'd Kinorohingan di hilo'd surga do raja' dot id sawat do koinsanai'd raja', om nonuan ko dau diti pomorintaan diti, om nonuan ko do kuasa', om kokorisan, om kobontugan. 38Siniliu ko dau do pomorinta' do koinsanai'd kinoiyonon di kitulun do hiti'd pomogunan om pomorinta' dot id sawat do koinsanai'd tombolog om nintorusan do suwai. Iya' no i tulu do tamas di tininganak diri. 39Nga' opupusan nopondo o pomorintaan nu, om haro po kawagu o pomorintaan do suwai do sumusuhut, nga' a' no koiyo diti pomorintaan nu kagayo. Om sumusuhut noddi, om haro po o pomorintaan do kotolu, i pomorintaan dot i tambaga' o pinoiyaan, i momorinta' do pointongkop diti pomogunan. 40Om haro pondo o pomorintaan do kaapat, i miagal do basi' kokodou, tu' kababak om kopurok do nunu nopo. Om poingkuro nopo do momurok om mamaraag i basi' do nunu nopo, om miagal noddi i pomorintaan do kaapat diri do momurok om mamaraag do koinsanai'd pomorintaan do suwai. 41Om nokito nu nogi' iri dot i nopo lapap om i tunturu'd lapap do tininganak diri nga' lagit o sampaping om basi' o sampaping. Om komoyon nopodti nga' mibahagi' nondo o pomorintaan diri do koimbagu. Nga' haro i' o kokorisan do pomorintaan diri tu' kirolot i' do basi' i lagit. 42Iri nopo i tunturu'd lapap di basi' o wookon om lagit o wookon, om komoyon nopoddi nga' okoris o sombohogian di pomorintaan nga' oluhoi i' o sombohogian. 43Om nokito nu nogi' do pinorolot i basi' di lagit. Komoyon nopodti nga' mumbal daa i pomorinta' do pomorintaan diri do popogiso-iso' di sompiiyon diyolo', tu' mumbal daa iyolo' do mogikawin-kawin nga' aiso' i' o kotutukon di wonsoyon diyolo' do miagal diri, do miagal nod basi' tu' a' i' milo no do poroloton kopio'd lagit. 44Om tontok nondo do maso di piro-piro o raja'ddi do momorinta' do popoingkakat i Kinorohingan do hilo'd surga do pomorintaan dit a' milo dot opupusan do gisom dot alaid, om a' insan dot aala' dot isai nopo o bansa'. Om magayi-ayi' nopondo o pomorintaan diri do mamaraag do koinsanai'd pomorintaan di suwai. 45Om nokito nu nogi' do liid tomod nopo i watu do mantad hiri'd rungas, om aiso' i' o tulun do nokokimbir-kimbir diri, om minongoi diri otung di tininganak di basi', om tambaga', om lagit, om pirok, om tamas do winonsoi. Om kopurok nopoddi i tininganak diri. Sunudan ko do Kinorohingan dit agayo, dit osiliu dot id dabantalan. Om nosunudan ku no o Tuan Raja' do nipi do Tuan Raja'ddi, om nokoboros ku nogi' o komoyon diri dit otopot,” ka dau.
Sinomulian di Raja' i Daniol
46Om otud noddi i Raja' Nobukadnisar do hiri'd toguang di Daniol om ponuhu' di rayat do sumuwau om papatahak do porsombahan di sorobon dot id di Daniol, om papatahak do piro-piro o porsombahan do suwai. 47Om boros ka di raja', “Otopot no, dot iri no i Kinorohingan nu ot agayo kopio dot id pogialatan do koinsanai'd ponokokinorohingan do suwai, om iyau o pomorinta' dot id sawat do koinsanai'd raja', om i popointalang do koinsanai'ddi poinlisok. Oilaan ku no kopio iti tu' minilo ko i' do pinopotuduk do komoyon di poinlisok diri,” ka dau. 48Om onuwai noddi dau i Daniol do pangkat dot asawat, om pinuhawangan dau iyau do piro-piro o nipuhawang dit olumis, om siniliu iyau do gobunor di watas do Babil, om siniliu do boyoon dit id sawat kopio do koinsanai di gomponosihat di raja'. 49Om pokionuo' no di Daniol, om siliho' noddi di raja' i Sadrak, om i Misak, om i Abidnigo do pomorinta' di watas do Babil, om i Daniol nopo om minundorong i' do hiri'd walai di raja'.
Currently Selected:
DANIOL 2: BDK
Highlight
Share
Copy
Want to have your highlights saved across all your devices? Sign up or sign in
Hakcipta © 2007, Pertubuhan Bible Malaysia Copyright © 2007, Bible Society of Malaysia