Judit 1
1
Perang Entara Raja Nebukadnesar enggau Raja Arpaksat
1Rambau Raja Nebukadnesar merintah menua Asiria ari indu nengeri Nineweh, Raja Arpaksat merintah menua Media ari indu nengeri Ekbatana. 2Ngelingi Ekbatana Raja Arpaksat ngaga dinding 35 meter peninggi, lalu penebal iya 25 meter digaga ari lampang batu ti dipat, pemesai iya 1.5 meter lalu pemanjai iya 3 meter. 3Ba tiap pintu penama iya ngaga siti rumah peninjau peninggi 50 meter, lalu geladak iya 30 meter. 4Tiap pintu penama 35 meter peninggi, lalu buka iya 20 meter ngambika ulih ditengah bala soldadu raja nyengkaum bala soldadu ti bebaris mansa nya.
5Dalam taun ti keduabelas Raja Nebukadnesar nyadi raja, iya beperang ngelaban Raja Arpaksat ba emperan besai ngelingi nengeri Rages. 6Mayuh bansa bukai nyaup Raja Arpaksat, iya nya, semua sida ke diau ba menua ke bebukit, sida ke diau ba pemanjai Sungai Tigris, Sungai Eupratis, Sungai Hidaspes enggau sida ke diau ba emperan diperintah Raja Ariok ari Elam. Mayuh bansa bukai begulai enggau soldadu orang Heleud.
7Udah nya Raja Nebukanesar ari Asiria ngirumka pesan ngagai orang Persia enggau bansa bukai ke diau di barat, di menua Sisilia, Damaskus, Lebanon, Antilebanon, sida ke diau di tebing tasik, 8enggau ba kandang menua di Karmel, Gilead, utara Galili enggau Lebak Jesril. 9-10Pesan nya mega ditujuka ngagai orang ke diau di Samaria enggau nengeri ti ngelingi iya, enggau nuju sida ti di barat Sungai Jordan sampaika ngagai nengeri Jerusalem, Betani, Chelos, Kades enggau pelilih menua Gosen. Pesan nya mega dibai ngagai mayuh nengeri di Ejip baka Tapanes, Rameses, Tanis enggau Mempis enggau endur ba ulu Sungai Nile sampai ngagai entara menua Etiopia. 11Tang bala ke diau ba pelilih menua nya enda pedulika peminta Raja Nebukadnesar, lalu enggai enggau iya beperang laban sida enda takutka raja. Dalam penemu sida, raja nya nadai peluang menang. Orang ke dikirumka raja dikeleseka, lalu pulai puang enggau ati ti malu. 12Nya alai Raja Nebukadnesar ringat amat lalu besumpah ngena kuasa iya deka malas semua sida nya. Iya besumpah deka munuh semua orang ke diau di Sisilia, Damaskus, Siria, Moap, Amon, Judah enggau Ejip--semua orang ari Tasik Tengah ngagai Teluk Persia. 13Ba taun ti ketujuh belas Raja Nebukadnesar megai perintah, iya nguluka soldadu nyerang Raja Arpaksat. Semua soldadu Raja Arpaksat nyengkaum sida ke ngena kuda enggau sida ke ngena kereta kuda alah magang. 14Udah nya Raja Nebukadnesar nguasa semua nengeri dalam menua Media, lalu nyerang nengeri Ekbatana. Semua menara nengeri dialahka, semua pasar dirumpak, lalu pemanah gaya nengeri dirusak. 15Raja Arpaksat ditangkap lalu dibunuh di bukit ngelingi Rages. Udah Arpaksat dibunuh, 16Nebukadnesar enggau bala soldadu pulai ke Nineweh mai perapasan ti diulih sida ngayau. Dia sida belelak lalu begawai pengelama empat bulan.
Currently Selected:
Judit 1: BK
Highlight
Share
Copy
Want to have your highlights saved across all your devices? Sign up or sign in
Hakcipta © 2011, The Bible Society of Malaysia
Copyright © 2011, The Bible Society of Malaysia