Tobit 14
14
Jaku Ajar Tobit Ti Penudi
1-2Tobit beumur 62 taun lebuh mata iya buta, tang udah iya ulih meda baru, iya idup senang lantang. Sekali da iya enggau gerah jari meri utai ngagai orang ke seranta, lalu iya mengkang muji Allah Taala sereta becheritaka pemesai kuasa Iya. Tobit parai enggau ati lantang lebuh umur iya 112 taun, lalu iya dikuburka enggau penuh basa di Nineweh.
3Tang sebedau Tobit parai, iya ngangauka anak iya Tobias lalu bejaku ngajar iya, 4 “Anak, bai anak nuan angkat diatu ngagai Media. Aku arap bendar ke ukum Allah Taala amat deka ninggang Nineweh munyi ti dipadahka nabi Nahum. Semua utai ti dipadahka nabi Allah Taala ngagai Israel pasal Nineweh enggau Asiria deka nyadi. Semua nya amat deka nyadi, ba maya ti ku Allah Taala. Aku arap amat ke semua utai ti dipadahka Allah Taala endang deka nyadi. Allah Taala enda bulaka semaya Iya. Likun agi nuan diau di Media ari ti diau di Asiria tauka di Babilon.
Semua bala kitai ke bansa Judah ke diau di Israel deka pambar pendiau sereta diburu ari menua ti manah, lalu dibuai ngagai endur bukai. Serata menua Israel deka nyadi menua puang; Samaria enggau Jerusalem deka nyadi nengeri ti ditinggalka orang. Rumah Sembiang Allah Taala deka ditunu retung, lalu rusak enda lama. 5Tang Allah Taala deka kasihka nembiak Iya baru, lalu mai sida pulai ngagai menua Israel. Sida deka nirika Rumah Sembiang nya baru, tang enda ngemadas iya ke dulu suba sebedau maya ti patut. Tang lebuh maya nya datai, semua orang Israel deka pulai ari endur sida dibuai. Sida deka ngaga baru nengeri Jerusalem sebaka enggau pemanah iya ke suba. Sida deka nirika Rumah Sembiang Allah Taala nya baru di Jerusalem, nitihka padah bala nabi Israel.
6“Udah nya, semua bansa di dunya deka pulai ngagai Allah Taala. Sida deka nyembah Iya siku aja, Allah Taala ti amat, lalu ngelengkaka engkeramba ti mai sida tesat. 7Semua bansa di dunya deka muji Allah Taala lalu ngereja pengawa nundaka peneka Iya.
“Lebuh maya nya, Allah Taala deka nyelamatka semua orang Israel ke udah talukka Iya. Iya deka mai sida ngagai Jerusalem, lalu ngasuh sida bempu menua Abraham. Dia sida deka diau likun belama iya. Semua orang ke rinduka Allah Taala enggau pengabis ati enggau semengat, deka gaga, tang orang bedosa enggau orang ke jai deka dibuai ari dunya.
8“Diatu, anak, titihka ajar aku. Sembah Allah Taala enggau ati ti lurus, lalu kereja meh pengawa ti ngerinduka Allah Taala. 9Ajar meh anak nuan ngereja utai ti manah. Ajar sida enda tau enda meri utai ngagai orang ti seranta, lalu asuh sida ingat belama muji Allah Taala enggau ati ti lurus.
10“Anak aku Tobias, angkat nuan ari Nineweh. Anang diau ditu. Udah nuan nguburka indai nuan tisi aku, angkat meh enggau jampat. Anang bemalam semalam da dalam kandang nengeri tu. Nengeri tu jai sereta penuh laban orang ke ngereja pengawa ti kamah. Orang ditu enda nemu malu. Ingatka pengawa ti dikereja Nadab ngagai aya iya Ahikar ke ngibun iya. Iya nguji munuh Ahikar lalu mejal iya bejalai ba pendam. Ahikar pulai ngagai penampak Allah Taala tang Allah Taala muai Nadab ngagai pemetang ke selama iya ketegal pengawa ti udah dikereja iya. Ahikar lepas ari panjuk pemati ke ditan Nadab, laban Ahikar udah enggau gerah jari meri utai ngagai orang ke seranta. Tang Nadab kena sintak pemarai lalu nya ti ngerusak iya. 11Nya alai diatu anak, nuan meda utai ti nyadi ba orang ti kiruh ke orang bukai, lalu baka ni pemarai nganti orang ke ngayahka orang bukai. Tang diatu aku nyau lemi bendar.”
Udah nya sida ngalika Tobit ba peninduk iya. Iya parai sereta dikubur enggau basa ti besai. 12Lebuh bini Tobit parai, iya ditumbak berimbai enggau laki iya. Udah nya, Tobias enggau bini iya pindah ngagai Ekbatana di Media, seduai iya diau enggau Raguel, mentua Tobias. 13Tobias ngibun Edna enggau Raguel ke udah tuai enggau basa ti besai. Ke pengujung iya seduai parai lalu Tobias nguburka seduai iya di Ekbatana. Tobias bempu reta Raguel baka iya ke ngempu reta apai iya Tobit.
14Tobias nya orang ke dibasa orang mayuh, lalu iya parai lebuh umur iya 117 taun. 15Laban iya gayu, Tobias ulih ninga pasal pengerusak Nineweh, lalu meda Siasares raja menua Media ke nangkap orang, lalu ngaga sida nyadi ulun. Tobias muji Allah Taala ketegal Iya udah ngukum orang Nineweh enggau Asiria. Sekumbang iya idup, Tobias meri terima kasih ngagai Allah Taala ketegal pengawa ti udah dikereja Iya ngagai Nineweh.
Currently Selected:
Tobit 14: BK
Highlight
Share
Copy
Want to have your highlights saved across all your devices? Sign up or sign in
Hakcipta © 2011, The Bible Society of Malaysia
Copyright © 2011, The Bible Society of Malaysia