Mattá 6
6
Hayrát
1Habardár! Wati nékén kárán mardománi chamdidá makanét. Agan pa é maksadá nékén kár bekanét ke mardom begendant, shomárá cha ásmáni Petay némagá hecch mozzé narasit. 2Wahdé taw chizzé hayráta kanay, gorhá dhohl majan. Doru o dopóstén mardom kanisah o bázárán é dhawlá kanant tánke mardom áyán satá bekanant. Shomárá rásténa gwashán, áyán wati mozz raset. 3Wahdé hayráté cha rástén dastá dayay, chappén dast sahig mabit, 4tánke tai dátagén hayrát chér o sarpósh bebit. Gorhá tai ásmáni Pet ke chérén kárána gendit, tai mozzá dant.
Dwá
(Luká 11:2–4)
5Wahdé dwá kanét, doru o dopóstén mardománi dhawlá makanét, chéá ke áyán kanisaháni tahá o shahray chárráháni sará óshtag o dwá kanag dósta bit, tánke mardom áyán begendant. Shomárá rásténa gwashán, áyán wati mozz raset. 6Harwahdá ke dwá kanay, lógay andarén jáhéá beraw, lógá band kan o cha wati ásmáni Petá ke cha chammán chér o andém ent, dwá belóth. Gorhá tai Pet ke chérénána gendit, tai mozzá dant. 7Wahdé dwá kanét, darkawmén mardománi dhawlá mopt o náhudagén#6:7 Náhudag, bezán bépáedag. habarán takrár makanét. Darkawm hayála kanant ke cha géshén takrárá áyáni dwá gósh dáraga bit. 8Áyáni paymá mabét, chéá ke shomay ásmáni Pet cha shomay lóthagá pésar wata zánt ke shomárá kojám chizzáni hájat ent.
9Shomá chó dwá belóthét:
‘Oo may Pet, ke arshá ay!
Tai pákén nám sharapdár bát.
10Tai bádsháhi byáyát.
Tai erádah o wáhag#6:10 Wáhag, bezán lóth, talab, hájat. zeminay sará ham hamá dhawlá purah o sarjam bát ke ásmáná puraha bit.
11May maróchigén rezk o rózigá maróchi márá beday.
12May radián bebaksh, anchosh ke má hamá sajjahén mardom bakshetagant ke gón má badiesh kortag.
13Márá ázmáesh o chakkásá#6:13 Chakkás, bezán ázmáesh, emtehán. dawr maday o cha sherr o Shaytáná berakkén#6:13 Rakkénag, bezán neját dayag, bacchénag..’#6:13 Lahtén daznebeshtá átkag: “Chéá ke abadmánén bádsháhi o wák o zór o shán o shawkat taig ant. Ámin.”
14Chéá ke agan shomá mardománi radkárián bebakshét, gorhá shomay ásmáni Pet shomárá ham bakshit, 15bale agan shomá mardománi radkárián mabakshét, gorhá shomay ásmáni Pet ham shomay radkáriána nabakshit.
Róchag
16Wahdé shomá róchaga bét, doru o dopóstén mardománi dhawlá watá molur o gamig makanét. Á wati démá chótha kanant ke mardom begendant ke á róchag ant. Shomárá rásténa gwashán, áyán wati mozz raset. 17Wahdé taw róchaga bay, wati sará thél bejan o démá beshód, 18tánke mardom mazánant ke taw róchag ay, tahná tai ásmáni Pet ke cha chammán chér o andém ent, hamá bezánt. Á wahdi tai ásmáni Pet ke chérén kárána gendit, tai mozzá dant.
Áyókén jahánay tóshag
19É donyáyá pa wat mál o maddhi#6:19 Maddhi, bezán ganj o hasti. ambár makanét, ke edá warók o ramézesha#6:19 Warók o raméz, bezán gwandhén kerm o lullok ke dár o poccha wárt. warant yá zanga gerant yá dozza poterant o barantesh. 20Pa wat ásmáná mál o maddhi ambár bekanét ke ódá na warók o ramézesha warant, na zanga gerant o na dozza poterant o barantesh. 21Parchá ke hamódá ke tai mál ent, tai del ham hamódá bit.
Badanay cherág
(Luká 11:34–36)
22Chamm badanay cherág ant. Agan tai chamm sharr ant, tai sajjahén badan rozhná bit. 23Bale agan tai chamm haráb ant, tai sajjahén badan tahára bit. Nun agan tai bátenay rozhn wat tahárié bebit, gorhá á tahári sakkén mazanén tahárié bit.
Ásudagén zend
(Luká 12:22–31)
24Hechkas do wájahay golámiá korta nakant, yá gón eshiá naprata kant o áiá dósta dárit, yá gón eshiá wapádára bit o áiá mána nayárit. Chó buta nakant ke shomá Hodáay golámiá ham bekanét o zarray golámiá ham. 25Paméshká shomárá gwashán, pa wati zendá paréshán mabét ke ché bwarén yá ché benóshén, na pa wati badaná ke ché bepóshén. Zend cha waráká o badan cha pósháká démáter ent. 26Ásmánay démá báli morgán bechárét, na keshant o na ronant o na ambára kanant, bale angat shomay ásmáni Pet áyán rezk o róziga dant. Shomay arzesh cha áyán báz géshter ent. 27Hechkas pa pegr o parésháni wati zenday róchán damáné ham gésh korta nakant.#6:27 Yá: “wati báládá yakk dasté borzter korta nakant.” 28Gorhá pa pocch o pósháká chéá paréshán ét? Gyábánay gol o polláni némagá delgósh kanét ke chóna rodant. Na zahmaté kasshant o na résant o gwapant, 29bale shomárá gwashán ke Solaymáná gón wati mazanén shán o shawkatá é polláni dhawlén póshák gwará nabutag. 30Oo kambáwarán! Wahdé Hodá gyábánay káhán ke maróchi hastant o bándá taruná sóchaga bant, chó brahdára kant, gorhá shomárá allamá sharterén pósháka dant.
31Paméshká paréshán mabét o magwashét ke ché bwarén yá ché benóshén yá ché bepóshén. 32Hodánábáwarén mardom é sajjahén chizzáni randá tachant, bale shomay ásmáni Peta zánt ke shomárá é chizz pakár ant. 33Cha drostán pésar, Hodáay bádsháhi o áiay dátagén páki o palgáriay#6:33 Palgári, bezán sáp o sallahi, bepólengi. shóházá bebét, gorhá é sajjahén chizz ham shomárá dayaga bant. 34Pa bándátigén róchá gam makanét, chéá ke bándátigén róch wati gamá wata kant. Pa maróchigá, maróchigén janjál bass ant.
Currently Selected:
Mattá 6: HPKB
Highlight
Share
Copy
Want to have your highlights saved across all your devices? Sign up or sign in
© 2015-2022, Wycliffe Bible Translators, Inc. and the Balochi Bible Translation Team. All rights reserved.