Exodus 11
11
Tuquniksraŋat Aŋayukłiuruat Iġnich
1Tavra Ataniq uqallaktuq Moses-mun, “Atausitualuvsaamik tatavsautiqaġniaqtuŋa Pharaoh-mun suli Egypt iñuŋiñun. Taaptuma aquagun aullaqtinniaġaasi. Uvvaami, aninniaġaasi iluqasi tamaaŋŋa. 2Uqautikkich iñuŋich Israel iluqaisa qasiḷitqulugich qiñiyunaqsautinik siḷalliimigniñ Egypt-miuniñ kaviqsuaniglu qatiqtuaniglu manigñik piḷianik.” 3Atakkii Atanġum Egypt-miuguruat iviġaumapkaŋasipkaġniġaich Israel-gum kiŋuvaaŋiññun. Tavra suli, Pharoah-m kivgaŋich Egypt iñuŋiḷḷu qiksigiliġniġaat Moses.
4Moses uqallaktuq Pharaoh-mun, “Ataniq uqaqtuaq inna, ‘Unnuaq qitiqqaqpan Egypt-kuaġniaqtuŋa, 5aasii iluqaġmiŋ aŋayukłiuruat iġñiŋich tuquniaqtut Egypt-mi. Kiŋuvaaksrauniaġaluaqtuamiñ aquppiutaqpaŋanun Pharaoh-m, iġñiŋanuaglaan kivgauruam akutchiruam palauvaksranik, tuquniaqtut. Aniqqaaŋaruaq aŋusalluq pamiqsaani tuquniaġmiut. 6Nipaturuanik qiaruaqaġniaqtuq iluqaani Egypt, nalautinŋaitchuamik qaŋaunnii naakkaunnii nalautitqikkumiñaitchuamik. 7Aglaan qirratiksraqaġniaŋitchut unnii Israel-gum kiŋuvaaŋich. Tuaksruitpaiḷḷuni qiḷuktuaqaġniaŋitchuq unnii. Tavra iḷitchuġiniaqtutin uvaŋa, Atanġuruaq, nalunaiqsaġiniaġitka Israel-gum kiŋuvaaŋich Egypt-miuniñ.’” 8Moses aġiusaaqami uqallaktuq, “Iluqaġmiŋ qaukłiuravsi ullagniaġaanŋa aasii pullutiŋ sivuġamnun, iŋiqsruġniaqtut aullaquluta iluqata. Tainnaanikpata, aullaġniaqtuŋa.” Tavra Moses qinnalipiallaŋavluni uniñŋagaa Pharaoh.
9Ataniq uqallaktuq Moses-mun, “Umialigum suli naalaġnisugniaŋitkaatin, savavsaaġumiñaqsiḷuŋa aliuġnaqtuanik Egypt-mi.” 10Moses-lu Aaron-lu savaŋaruk iluqaiññik tamatkuniŋa aliuġnaqtuanik sivuġaani Pharaoh-m, aglaan Atanġum uqayunaiqsinŋagaa, aasii aullaqtitchuŋiñŋagaich Israel-gum kiŋuvaaŋich nunamiñiñ.
Currently Selected:
Exodus 11: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)