KOLOSÉ 4
4
1 O kekat pengeja'au, jian keh maneu' kekat éh jian ngan éh teneng ngan kekat irah éh lem nihau keh. Mai keh ngelepan, pengeja'au keh pu'un éh tong seruga.
Tong kuraa' sohoo' Paulus
2Jian keh gahang sebayang pah avéé' keh omok jam Allah mipa ha' keh, ngan mavaa' kenat péh bara' jian kenin kepéh ngan Néh. 3Jian keh ngelayau sebayang tong améé', menyat Allah mukap jalan ngan améé' ke' mé' omok perengah Rengah Jian Néh dokoo' bara' tong pengeloo' kenin Néh lem Kristus. Uban neu' Rengah Jian inah, kenat akeu' pu'un tong lamin tutup hun iteu'. 4Jian keh sebayang menyat Tuhan nolong akeu' bara' ha' tebaraa' Néh ngan lenaa' mu'un, barei' éh tekep naneu' ké'.
5 Jian keh jam seruh dalem kekat penganeu' ngan barék keh belah kelunan éh bé' ngelan, ngan pakai kekat bi'en éh pu'un ngan jian-jian. 6Jian kekat ha' ané keh ngelayau pu'un jian, éh mihin kenin kelunan keloo' menéng ha' keh, ngan jian keh seruh mipa siget-siget ha' réh éh neteng keh tong pengelan keh.
Tong pengega' ha' Paulus
7 La'ah padéé' lu' Tikhikus éh penika lu', éh tigéh lem kekat kereja' néh ngan Tuhan, éh bakéh ké' dalem kereja' Tuhan, iah omok bara' kekat rengah ké' ngan keh. 8Uban Kenat akeu' nyohoo' iah tai ngan keh dokoo' néh omok ngejian kenin keh. 9 La'ah Onésimus, padéé' lu' éh tigéh ngan éh penika lu', éh pemung tana' ngan ka'ah, iah pu'un kivu éh tai. Rawah omok bara' kekat rengah améé' siteu' ngan keh kepéh.
10 La'ah Aristarkhus bakéh ké' éh pu'un tong lamin tutup pemung ngan ké' siteu', iah bara' tabi' ngan keh, kenat péh Markus, padéé' pata Barnabas. Pu'un keh lepah alaa' surat éh bara' tong Markus nah, éh nyohoo' keh alaa' éh hun mah éh avéé' sinah. 11Iah péh bara' tabi' ngan keh. La'ah réh teleu' inah awah éh jin pohoo' Yahudi éh bakéh ké' éh kereja' pemung ngan ké' dokoo' mihin kelunan ngelan tong Allah ngan tai lem nihau Néh, pinaa' kereja' réh teleu' nolong akeu'.
12 La'ah Epapras iah péh pemung tana' ngan ka'ah, ngan éh sohoo' Kristus Yésus, iah péh bara' tabi' ngan keh. Ngelayau iah gahang sebayang tong ka'ah dokoo' keh omok reken kenin ngan sukup kenin ngan jam seruh ngan ngelayau kivu pengeloo' Allah. 13Akeu' péh jam iah kereja' muruh ke' néh nolong keh, kenat péh irah tong Laodikia ngan tong Hierapolis. 14 La'ah Lukas, lakei' éh kereja' nawan, éh penika mé', ngan Demas, rawah inah péh bara' tabi' ngan keh.
15Jian keh bara' tabi' ngan kekat padéé' mé' éh tong Laodikia ngan tabi' ngan Nimpa ngan tabi' ngan sidang éh pu'un tong lamin redo inah. 16La'ah la'o keh purung surat ké' iteu', jian keh purung éh kepéh tong sidang tong Laodikia, ngan jian keh purung surat éh tuai jin sidang tong Laodikia kepéh. 17 La'ah jian keh bara' ngan Arkhipus, Jian ke' pesukup kereja' ko' éh nena' Tuhan ngan ko'.
18La'ah akeu' tengéé' nyurat ha' ké' iteu', Tabi' jin Paulus. Mai keh ngelepan akeu' pu'un kejeret réh tong lamin tutup iteu'.
Jian penika Allah pu'un pemung ngan keh.
Currently Selected:
KOLOSÉ 4: PNT
Highlight
Share
Copy
Want to have your highlights saved across all your devices? Sign up or sign in
Irah éh suai © 2009, Pengepemung irah éh suai Surat Tahun tong Malaysia (The Bible Society of Malaysia) Copyright © 2009 The Bible Society of Malaysia
Éh Keruwah koléé senuai © 2011 Pengepemung irah éh suai Surat Tahun tong Malaysia (The Bible Society of Malaysia) Copyright 2011 The Bible society of Malaysia