Tõoma 4

Apɩyɛɛrɩ la Azã ze sarɩyaditba nẽŋam

1Apɩyɛɛrɩ la Azã ken tɔgra la nẽrba la lɛ, tɩ kãabgɔ kẽma, la Wẽnde-kãtɛ gu'urba nẽŋadãana, la Saduse dõma wa'am ba zẽ'am. 2Tɩ ba sũure yĩige la Tõntõnɩba la n zãsnɩ nẽrba la, dee mõola Azezi kũm vo'ore yelle pa'ala tɩ nẽr-sɛba n ki la wʋn vo'oge mɛ na. 3Tɩ ba yõgɛ ba ka yʋ, gu'ura tɩ beere wiige, se'ere n soe la, wẽnnɛ daan sobe mɛ. 4La nẽr-sɛba n daan wõm Nawẽnnɛ kõ-yẽlga la, ba zozo'e daan bɔ yetɔga la sɩra mɛ. Ba kãllɛ daan de wʋ tʋsanuu.

5La beere n wiige, tɩ Zifdõma nẽŋadõma, la kẽma, la lɔɔ karẽnsãandõma lagsɛ taaba Zerizalɛm pʋam. 6La A'annɩ n de kãabgɔ kẽma nẽŋadãana, la Akayifu, la Azã, la Alɛgsãndrɩ, la sɛba wuu n de kãabgɔ kẽma nẽŋadãana yir-dõma boe mĩ mɛ. 7Tɩ ba botɩ ba tarɩ ba wa'am wa ze'ele ba nẽŋam, tɩ ba soke ba yetɩ: «Ãne n bɔ yãma pãŋa la nõorɛ tɩ yãma ɩta bõn-bãna?» 8Tɩ Nawẽnnɛ Sɩa bɔ Apɩyɛɛrɩ pãŋa, tɩ a yele ba yetɩ: «Yãma Ɩsrayɛlɩ nẽŋadõma, la kẽma, 9yãma n sokrɩ tõma zĩna daarɛ wã tõon-sõŋ-sɛka tɩ tõma ẽŋɛ bɔ kɔɔrŋɔ la yelle, la bõn-sɛka n botɩ a yẽ ĩmã'asʋm na, 10dẽnɩ tɩ ya wuu, la Ɩsrayɛlɩ dõma wuu bãŋɛ tɩ la de la Azezi-krisi n ze'ele Nazarɛtɩ yʋ'ʋrɛ ĩyã tɩ nẽra wã n ze ya nẽŋam wã tarɩ ĩmã'asʋm. Ẽŋa tɩ ya daan ka lablɛ dɔ-puurŋa zuo kʋ, tɩ Nawẽnnɛ vo'oge ẽ. 11Ẽŋa ĩyã tɩ la gʋlsɛ Nawẽnnɛ gõŋɔ pʋam tɔgɛ yetɩ:

‹Kug-sɛka tɩ yãma mẽtba zagsɛ la,

lebge la kugre n botɩ deego la tara pãŋa.›

12Fãarɛ ka boe nẽra ayẽma zẽ'am, sãn dagna Azezi-krisi mã'a n tã wʋn fãagɛ nẽrba dũnia zuo basɛ.»

13Apɩyɛɛrɩ la Azã n yẽ bʋraanɛ tɔgra la, la di'ige nẽrba la mɛ, ban mi tɩ ba nini ka yo'oge, dee tɩ ba dagna gõn-mitba la, tɩ ba bãŋɛ tɩ ba daan boe la Azezi lɛ. 14La ban yẽ bʋraa la n yẽ ĩmã'asʋm zɛ ba zẽ'am na, ba ka mi ban wʋn lerge se'em bɔ ba. 15Tɩ ba yele ba sarɩyadia zẽ'am yetɩ ba yese. Tɩ ba yese. Dee tɩ ba bãm yele taaba yetɩ: 16«Tɩ wʋn ẽŋɛ nẽr-bãna la wãne? Nẽrba wuu n boe Zerizalɛm wã mi mɛ tɩ bãma n ẽŋɛ yel-kɩrga wã, tõma kãn tã'agɛ sɩ'ɩsɛ bõn-ẽna. 17La tõma n wʋn ẽŋɛ se'em tɩ ba tõoma la da le saagɛ sẽŋɛ nẽŋa, la de la tɩ zɛbɛ ba yetɩ, ba da le tɔgɛ Azezi yelle bɔ nẽra nẽra.» 18Bɛla tɩ ba wi ba yetɩ, ba da le sakɛ tɩ ba tɔgɛ, dee zãsʋm nẽrba Azezi yɛla.

19La Apɩyɛɛrɩ la Azã lerge ba mɛ yetɩ: «Tẽ'esɛ-ya bɩsɛ, la masɛ Nawẽnnɛ nẽŋam tɩ tõma sakɛ yãma nõorɛ gãnna Nawẽnnɛ nõorɛ mɛ bɩɩ? 20Tõma ka tã wʋn basɛ ka tɔgɛ sɛla tɩ tõma yẽ dee wõm na.» 21Tɩ ba le gɩ'ɩlɛ ba, dee basɛ ba tɩ ba fõrgɛ. Ba ka yẽ ba wʋn ẽŋɛ se'em botɩ ba sɩbgɛ ba, se'ere n soe la, nẽrba la wuu pẽgrɩ Nawẽnnɛ bõn-sɛka tɩ ba ẽŋɛ la ĩyã mɛ. 22Bʋraa la tɩ yel-kɩrga la ẽŋɛ tɩ a yẽ ĩmã'asʋm na, gãŋɛ yʋʋma pinaasɩ mɛ.

Sɛba n bɔ Azezi sɩra sose mɛ, tɩ Nawẽnnɛ bɔ ba bʋraanɛ

23La ban basɛ ba la, Apɩyɛɛrɩ la Azã sẽŋɛ la ba taaba zẽ'am ka tɔgɛ pa'alɛ ba kãabgɔ kẽma nẽŋadõma, la kẽma la n yele bãma se'em na wuu. 24La ban wõm bɛla la, tɩ ba naagɛ taaba pʋ'ʋsɛ Nawẽnnɛ la yɛm ayɩla yetɩ: «Zuudãana, fõn nãam saazuum la tẽŋa, la ko-kãtɛ, la bõn-sɛba wuu n boe ba pʋam na. 25Fõn yʋʋn botɩ tõma yaaba Adavidi n de fʋ tõntõnna la tɔgɛ la fʋ Sɩa pãŋa yetɩ:

‹Bẽm n ẽŋɛ tɩ dũnia buuri wuu sũure yĩige,

tɩ nẽrba tẽ'esra tẽ'es-yaalsɩ?

26Tɩ dũnia na'adõma mãasʋm zɛ,

tɩ tẽŋa la nẽŋadõma lagsɛ taaba

tɩ ba zɛbɛ la Zuudãana Nawẽnnɛ,

la Krisi tɩ a looge la?›

27La de la sɩra tɩ A'erɔdɩ, la Apõnsɩ-pilatɩ, la bu-zãŋsɩ, la Ɩsrayɛlɩ nẽrba lagsɛ taaba tẽn-ẽna wã pʋam zɛbɛ la fʋ tõntõn-sõŋɔ Azezi tɩ fʋ looge la. 28Bɛla ba ẽŋɛ la bõn-sɛka tɩ fõn yʋʋn põn dẽŋɛ looge yɛm la fʋ pãŋa bɔɔra tɩ la ẽŋɛ se'em na. 29Tɩ Zuudãana, lɛɛlɛ wã bɩsɛ ban zɛbrɩ tõma n de fʋ tõntõnɩba la se'em, bɛla ĩyã, bɔ tɩ pãŋa tɩ tɩ mõolɛ fʋ kõ-yẽlga la bʋraanɛ. 30La fʋ pãŋa, botɩ sɛba n bẽ'erɩ yẽ ĩmã'asʋm, dee tɩ tõon-yãlma la yel-kɩrsɩ ẽŋɛ, Azezi n de fʋ tõntõn-sõŋɔ la yʋ'ʋrɛ ĩyã.» 31Ban pʋ'ʋsɛ Nawẽnnɛ ba'asɛ la, zẽ'e-sɛka tɩ ba lagsɛ la mĩim mɛ. Tɩ Nawẽnnɛ Sɩa bɔ ba wuu pãŋa, tɩ ba tɔgɛ Nawẽnnɛ yetɔga la bʋraanɛ.

Sɛba n bɔ Azezi sɩra la, pʋtɩ ban tarɩ sɛla wuu la taaba

32Nẽr-kʋʋŋɔ la n daan bɔ Azezi sɩra la lagɩm tara la yɛm ayɩla, la sũure ayɩla. Tɩ ba nẽra baa ayɩla ka yetɩ, ẽŋa n tarɩ sɛla la de la ẽŋa mẽŋa mã'a bõnɔ, la de la ba wuu bõnɔ. 33La Tõntõnɩba la tɔgrɩ Zuudãana Azezi kũm vo'ore yelle la pãŋa zozo'e, tɩ Nawẽnnɛ yel-sõnnɛ bɔna ba wuu zuo. 34-35La sɛba n daan tarɩ deto bɩɩ vatɔ la, koose ba mɛ tarɩ ligri la wa'am wa ẽŋɛ Tõntõnɩba la nu'usum. Tɩ ba yãŋa ẽn pʋɩ bɔ nẽra woo ẽŋa n boorɩ sõŋrɛ masɛ se'em. Tɩ nẽra baa ayɩla ka bɔna ba pʋam tɩ sɛla pɔ'ɔgɛ ẽ.

36La Azozɛfʋ n de Leviti nẽra n yese Sipri so'olʋm tɩ Tõntõnɩba la sɩ a yʋ'ʋrɛ tɩ Abarnabasɩ. A yʋ'ʋrɛ la võorɛ de la: «Nẽra n bɔ'ɔrɩ nẽrba bʋraanɛ». 37Ẽŋa daan koose la a va'am dɩkɛ ligri la tarɩ wa'am wa ẽŋɛ Tõntõnɩba la nu'usum.

Currently Selected:

Tõoma 4: gurDBL

Highlight

Copy