TSEFANYA 2
2
Dikotlo tše di tlogo tlela ditšhaba
1Itlhatheng le hlathe, lena setšhaba sa bahlokahlong! 2Le dire bjale molao o sešo wa tswala, letšatši le sešo la feta wa moko. Le sešo la fihlelwa ke bogale bo tukago bja Morena, le sešo la fihlelwa ke letšatši la kgalefo ya Morena. 3Nyakang Morena, lena babotla bohle ba lefase, lena le yago ka molao wagwe. Tsomang toko, le tsome boikokobetšo; mohlomongwe le ka efošwa mohla woo wa bogale bja Morena.
4Gobane Gatsa go tlo tlogwa; Asikaloni e tlo ba marope; Asidodo ba lelekwa mosegare o monana; Ekirioni go a tomolwa. 5Joo, ba ba agilego mo mešikong ya lewatle, setšhaba sa Bakereti, lena ba naga ya Kanana, le tlo tlelwa ke tše Morena a di boletšego, lena ba naga ya Bafilisita. Ke tlo le fediša, gwa se šale e a agilego moo. 6Mešiko ya lewatle e tlo ba ga mafulo le didiba tša badiši le meraka ya dihuwsa. 7Mešiko ya lewatle e tlo ba ya mašalela a ba gaJuda; ba tlo diša gona, bošego ba lala mo nyakong ya Asikaloni; gobane Morena Modimo wa bona o tlo ba gopola, a buša mathopša a bona.
8Maroga a Moaba ke a kwele, le leepo la ba ga Amoni, ge ba roga tšhaba sa ka, ba itheta ba nyatša mellwane. 9Morena wa mašaba Modimo wa Isiraele bjale o re: Ka bophelo bja ka, Moaba o tlo dirwa tša Sodoma, ba ga Amoni ba tlo dirwa tša Gomora; e tlo ba ditshehlong, moepo wa letswai, lešope la go ya go ile. Ba tlo hlakolwa ke mašalela a tšhaba sa ka; bohwa bja bona bo tlo lewa ke ba ba šetšego ba setšhaba sa ka.
10Dilo tše di tlo ba tlela ka molato wa boikgodišo bja bona, ba gobošitše tšhaba sa Morena wa mašaba, ba itira ba bagolo ba se nyatša. 11Morena ba tlo mmona a šiiša, a fetša medimo ka moka ya lefase le; mang le mang a khunamela yena mo a lego gona, le ba dihlakehlake tša lewatle.
12Le lena Bakuše le tlo bolawa ke lerumo la ka.
13O tlo emiša letsogo a šupa leboa, a senya Asuri, Ninife a go dira felo ga mašope, gwa oma boka lehanata. 14Mo o lego gona go tlo ba mahutamo a mehlape le a phoofolo tša mehutahuta; le maribiši le dinoko di tlo lala dihlogong tša dikokwane tša gona; makgotlo a lla diphaong, direpoding gwa dula magukubu, ka gobane go tlo ba go thubogile mamati a matsaka. 15Ke tšona tša motse wola wa mekgolokwane, wa go ipshina ka modula, wo pelong o bego o re: Ke nna e; ga go sa le o mongwe! -- Joo, bjale ke lešope, matšaba a dibata. Bohle ba go feta felo fao ba letša molodi, ba go šupašupa ka seatla.
Currently Selected:
TSEFANYA 2: NSO51
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1986. Used with permission. All rights reserved.