BAROMA 2
2
Timelo ya Bajuda ge ba kgantšha Molao
1Šedio ge, wena motho, le ge o ka ba mang, wena o ahlolago tša ba bangwe, ga o na mo o kago phema; gobane ge o ahlola tša e mongwe, e ba go ipea molato, ka ge le wena o dira tše o di solago. 2Gomme re tseba gore kahlolo ya Modimo, ba ba dirago tše mpe tšeo, e tlo ba tlela ka therešo. 3Bjale wena motho, a o re ge o sola ba ba di dirago, mme le wena wa di dira, a o re o tlo phonyokga kahlolo ya Modimo? 4A o nyatša bogolo bja botho bja Modimo, le bja go se fele pelo, le bja kgotlelelo ya gagwe? A ga o tsebe ge botho bja Modimo bo go otelela go itšhola? 5Tseba gore ka go thatafala ga gago, le ka go se itshole, o ikobela bogolo bja bogale bja mohla wa bogale, ge go tlo bonagala kahlolothereši ya Modimo. 6Ke yena a tlogo nea bohle se se lebanego mediro ya bona. 7Ba ba kgotleletšego go dira tše botse, ba nyaka letago le tumišo le tše di sa senyegego, bona o tlo ba nea bophela bjo bo sa felego. 8Ba ba ganago, ba se kwe therešo, ba ya ba kwana le bokgopo, ba tlo bona pefelo le bogale. 9Tše di tlogo wela moya wa motho mang le mang e a dirago bobe ke ditlaišego le tlalelo, tša tlo thoma ka Mojuda, tša tlo wela le Mogerika. 10Tše di tlogo tlela mang le mang e a dirago botse, ke letago, le tumišo, le khutšo; tša tlo thoma ka Mojuda, tša tlo tlela le Mogerika. 11Gobane Modimo ga a bebe difahlogo.
12Ba ba dirilego dibe go se na Molao, ba tlo lahlega go se Molao. Ba ba dirilego dibe ba na le Molao, ba tlo ahlolwa ka wona Molao. 13Ba ba lokago pele ga Modimo ga se bao ba go kwa Molao ka ditsebe; ba go tlo thwe ba lokile ke badiri ba Molao. 14Gobane bantle ba ba se nago Molao wo, ge ka noši ba dira tše di bolelwago ke wona Molao, ke go re mo go bona Molao o gona, le ge ba se ba wona Molao. Molao wa bona ke bona beng; 15ba šupetša gore mo dipelong tša bona go ngwadilwe se Molao o ratago ge se dirwa; matswalo a bona a ba hlatsela gotee le megopolo ge e begana, le ge e emelana. 16Di tlo bonala mohla Modimo a tlogo ahlola dithopa tša batho ka Jesu Kriste. E reyalo Ebangedi ya ka.
17Bjale ge o re o Mojuda, o ipata ka Molao, wa kgantšha Modimo; 18o tseba thato ya Modimo, o hlaologanya se e lego tabataba, gobane o rutilwe Molao; 19o itira mosepediši wa difofu; o re: Ke seetša sa ba lego leswiswing; 20o re: Ke moeletši wa ba ba sa tsebego, ke moruti wa ba e lego bana, ka ge o swere yona tsebo le therešo e paala ka Molao. 21Bjale wena, o rutago ba bangwe, o reng o sa ithute? 22O iletša go utswa, wa tla wa utswa. O iletša go otswa, wa tla wa otswa. O hlaswa medimo ya diswantšho, wa tla wa thopa tša nywakong ya medimo. 23O kgantšha Molao, wa tla wa goboša Modimo ka go senya Molao. 24Gobane go ngwadilwe gwa thwe: Ina la ka le hlwa le goboga ka bolena mo go bantle.
25Ge o le Mojuda ka lebollo, o tla holega ge o dira Molao; fela, ge o senya Molao, gona lebollo la gago e ba go se bolle. 26Ge motho e a sa kago a bolla, a ka loka ka go ya ka Molao, go se bolle ga gagwe a go ka mo thibela go bapetšwa le Mojuda wa lebollo? 27Yena eo a tswetšwego e se Mojuda wa lebollo, ge a phetha tše di boletšwego ke Molao, o tlo sekiša wena o senyago Molao mola o na le lengwalo la Molao. 28Gobane Mojudajuda ga se eo wa lebopo; lebollo ga se leswao leo la go bonala mmeleng; 29Mojudajuda ke wa teng; lebollobollo ke la pelo, ke tiro ya Moya; ga se go fo ya le lengwalo; ga se go retwa ke batho; ke go retwa ke Modimo.
Currently Selected:
BAROMA 2: NSO51
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1986. Used with permission. All rights reserved.