MIKA 3
3
Bagolo le baporofeta ba tlo otlwa
1A nke le theetšeng, lena bagolo ba Jakobo, lena babuši ba moloko wa Isiraele! A ga se lena bomatsebe ba moahlolelo? 2Fela, le bahloyabolo, le baratabobe; le bua batho letlalo, le ba ebola nama marapong. 3Ke bolena ba le jago nama ya setšhaba sa ka, le se khumola letlalo, le roba marapo a sona, la a rathela pitšeng, sa etša nama moruswing. 4Mohla ba tlogo tsoša mantšu ba llela Morena, a ka se arabe; mohla woo o tlo ba gerula, ka ge mediro ya bona e le e mebe.
5Morena o boletše a era baporofeta ba go fora batho ba ka, ba e rego ba ne tša go iša ka menong, ba goe ba re: Khutšo! E a sa ba fego sa go iša ka ganong, yena ba mo epele dira. 6Ka wona molato woo le tlo tlelwa ke bošego bo se nago pono; le tlo welwa ke leswiswi le se nago porofeto; baboni bao ba tlo dikelelwa ke letšatši; mme mosegare o tlo ba fifalela. 7Baboni ba tlo lewa ke dihlong; didupe di tlo šegama; bohle ba tlo iša atla diledung, ge phetolo ya Modimo e se gona.
8Ge e le nna, ka kgonthe ke tletše maatla a Moya wa Morena; ke filwe kahlolo le bogale bja gore ke botše Jakobo phapogo tša gagwe, Isiraele ke mmotše dibe tša gagwe. 9A nke le theetšeng, lena bagolo ba moloko wa Jakobo, lena babuši ba moloko wa Isiraele, lena bailabolo, bamenetšatoko. 10Le aga Tsione ka madi; Jerusalema le go aga ka bokgopo. 11Bagolo ba gona ba buša ka go bona tsogolekobong; baperisita ba gona ba ruta ba bona moputso; baporofeta ba gona ba porofeta ba rekilwe. Le ge go le bjalo ba ithekga ka Morena, ba re: Ka kgonthe, Morena o na le rena; re ka se welwe ke bošula.
12Ka wona molato woo wa lena Tsione go tlo lengwa ya ba tšhemo; Jerusalema e tlo ba mokgobo wa maswika; mme thaba ya Ntlokgethwa ya ba thabana tša lerobo.
Currently Selected:
MIKA 3: NSO51
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1986. Used with permission. All rights reserved.