JOHANE 8
8
Mosadi wa seotswa. Jesu o fetolana le Bajuda
1Jesu a ya thabeng ya Mehlware. 2Ka meso a boela Ntlongkgethwa; batho ka moka ba tla go yena, mme a dula a ba ruta. 3Bamangwalo le bafarisei ba tla go yena ba tliša mosadi e a swerwego a otswa ba mmea gare. 4Ba bolela ba re: Moruti! Mosadi e o swerwe a sa tšo dira bootswa. 5Moshe ka Molao o re laetše gore ba bjalo ba thungwe ka mabje. Ge e le wena o reng? 6Ge ba realo e be e le go mo leka gore ba hwetše se ba kago mmea molato ka sona. Gomme Jesu a inamela fase, a ngwala mo fase ka monwana.
7Bjale ge ba phegelela go mmotšiša, a inamologa, a bolela a re: E a se nago sebe mo go lena, a e be yena a thomago go mo thuma ka lebje. 8A realo a buša a inama a ngwala mo fase. 9Bona ge ba mo kwile a realo ba tšwa ba šalane morago, ba solwa ke letswalo bohle, ba bagolo le banyane. Jesu a šala a nnoši; le mosadi eo a šala a sa eme moo ba mmeilego gare. 10Jesu ge a inamologa, a bona ge go se motho, ge e se mosadi eo; a mmotšiša a re: Mosadi, ba kae babegi ba gago? A ga go na e a go lahlilego?
11Mosadi a re: Aowa, Morena!
Jesu a re: Gona le nna ga ke go lahle. Sepela, mme o se ke wa hlwa o dira dibe.
12Jesu a buša a bolela le bona a re: Ke nna seetša sa lefase. E a ntatelago a ka se ke a sepela leswiswing; o tlo ba le seetša sa bophelo.
13Bafarisei ba re: Ke gona ge o itlhatsela gee, bohlatse bja gago ga se bja go rereša.
14Jesu a fetola a re: Le ge ke itlhatsela, bohlatse bja ka ke bja go rereša, gobane mo ke tšwago le mo ke yago ke a go tseba; mme lena ga le tsebe mo ke tšwago le mo ke yago. 15Lena le ahlola ka go bona mmele wa motho; mme nna ga ke ahlole motho. 16Le ge nka ahlola, kahlolo ya ka e tlo ba ya go rereša, gobane ga ke noši; go ne nna le Tate e a nthomilego. 17Gomme Molaong wa lena go ngwadilwe gore bohlatse bja batho ba babedi ke bja therešo. 18Ge e le nna ke hlatselwa ke nna mong, gomme le Tate e a nthomilego o a ntlhatsela.
19Bjale bona ba re: Tatago o kae?
Jesu a re: Nna ga le ntsebe, mme le Tate ga le mo tsebe, ge le ka be le ntseba, le ka be le tseba le yena Tate.
20Ditaba tše Jesu o di boletše mo go lego polokelo ya mahumo a ruta Ntlongkgethwa. Gwa se be le e a mo swarago, gobane e be e sešo ya ba lebaka la gagwe.
21A buša a bolela le bona a re: Ke a tloga, gomme le tlo nnyaka; fela, le tlo hwela sebeng sa lena. Mme mo ke yago, le ka se ke la fihla gona.
22Bajuda ba re: A e se be a tlo ipolaya, ge a re: Mo ke yago le ka se ke la fihla gona?
23Jesu a re: Lena le ba mono tlase; nna ke wa godimo. Lena le ba lefase leno, nna ga ke wa lefase leno. 24Ke sa tšo le botša ka re: Le tlo hwela dibeng tša lena. Gobane ga le dumele se nna ke lego sona, le tlo hwela dibeng tša lena.
25Bona ba re: O mang?
Jesu a fetola a re: Ke sa le se ke felago ke le botša sona. 26Ke na le tše ntši tša go le bolela ka tšona le go le ahlola; fela, e a nthomilego ke wa therešo, mme nna ke tsebiša lefase tše ke di kwilego go yena.
27Bona ba se hlaologanye ge a bolela a re: Tate. 28Ke mo Jesu a itšego: E tlo re ge le fegile Morwamotho, ke mo le tlogo lemoga se ke lego sona, le gore ga ke dire selo ka la ka, le gore ke bolela ka mo Tate a nthutilego. 29Gomme yena e a nthomilego o na le nna; Tate ga a ntahletše, gobane ke dira se se mo kgahlago.
30Ge a bolela ditaba tše, ba bantši ba na ba mo dumela.
31Bona Bajuda bao ba bego ba mo dumela Jesu o boletše le bona a re: Ge le nama le lentšu la ka, le barutiwa ba ka ka go rereša, 32la tlo tseba therešo, mme therešo ya tlo le lokolla.
33Ba fetola ba re: Rena re bana ba Aborahama; ga re ešo ra ba bahlanka ba motho le neng. O bolela bjang ge o re: Le tlo lokollwa?
34Jesu a fetola a re: Ruri, ruri, ke a le botša, mang le mang e a dirago sebe, ke mohlanka wa sona sebe. 35Mohlanka gomme a ka se dule ntlong go ya go ile; wa go dula go ya go ile ke Morwa. 36Ke gona, ge Morwa a le lokolla, ke mo le tlogo ba le lokolotšwe ruri. 37Ke tseba ge le le bana ba Aborahama. Fela le ntsoma gore le mpolaye, gobane lentšu la ka le hloka matseno go lena. 38Nna ke bolela se ke se bonego go Tate; mme lena le dira tše le di bonego go tataweno.
39Ba fetola ba re: Rena tatawešo ke Aborahama.
Jesu a re: Ge le ka be le le bana ba Aborahama, le ka be le dira mediro ya Aborahama. 40Ge bjale le ntsoma gore le mpolaye, nna motho wa go le botša therešo ye ke e kwilego go Modimo, le dira se Aborahama a sa kago a se dira. 41Mediro ye le e dirago ke ya tataweno.
Bjale ba re: Ga ra tswalwa ka bootswa; re na le Tatawešo, ke Modimo.
42Jesu a re: Ge Modimo e ka be e le yena Tataweno, le ka be le nthata, gobane ge ke tlile, setlogo sa ka ke yena Modimo. Ga ka itliša ke romilwe ke yena. 43Le šiišwa ke eng go hlaologanya se ke se bolelago? Ke ka gobane le sa kgone go kwišiša lentšu la ka. 44Tataweno yo le tšwago go yena ke Diabolo; mme le phegella go dira mediro ya yena tataweno eo. Ke yena senokwane go tloga mathomong, gobane mo go yena therešo ga e yo, ge a bolela maaka, o bolela tša gagwe; gobane ke yena moaketši le rragomoaketši. 45Mme nna le sa ntumele, ke ka gobane ke bolela therešo. 46Ke mang mo go lena a kago mpea molato wa sebe? Gomme ge ke bolela therešo, le sa ntumele le dirwa keng? 47Motšwa Modimong o kwa lentšu la Modimo. Ge lena le sa kwe, ke ka gobane le sa tšwe Modimong.
48Bajuda ba fetola ba re: A ga re bolele gabotse ge re re o Mosamaria, le gona ge re re o na le moyamobe?
49Jesu a fetola a re: E a nago le moyamobe ga se nna. Se se lego gona sese, ke godiša Tate, mme lena le a nkgoboša. 50Ga se nna ke nyakago gore ke godišwe. E a di nyakago le e a ahlolago o gona. 51Ruri, ruri, ke a le botša, ge motho a lotola lentšu la ka, a ka se ke a bona lehu go iša go sa felego.
52Bjale Bajuda ba re: Bjale gona re lemogile ge o na la moyamobe. Aborahama tatawešo o hwile; le baporofeta ba hwile; wena wa tla wa re: Ge motho a lotola lentšu la ka a ka se ke a kwa lehu go iša go sa felego? 53A o re o e mogolo go Aborahama tatawešo e a hwilego? Le baporofeta ba hwile. O itira mang?
54Jesu a re: Ge nka be ke ikgodiša, kgodišo ya ka e ka be e se ya selo. E a nkgodišago ke Tate, yo le rego ke Modimo wa lena. 55Gomme ga le ešo la mo lemoga. O tsebja ke nna. Ge nka re: Ga ke mo tsebe, nka ba wa maaka ka etša bolena. Gomme nna ke a mo tseba; mme ke lotola lentšu la gagwe. 56Aborahama tataweno o hlalaletše go tlo bona tšatši la ka, a le bona a thaba.
57Bjale Bajuda ba re: A o re o bone Aborahama mola nywaga ya gago e sešo ya ba e masome a mahlano?
58Jesu a fetola a re: Ruri, ruri, ke a le botša, mola Aborahama a sešo a tšwelela ke ge nna ke le gona.
59Bjale gona ba topa mabje a go mmetša. Jesu a ikuta, a tšwa Ntlongkgethwa a iphetela gare ga bona, a tloga.
Currently Selected:
JOHANE 8: NSO51
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1986. Used with permission. All rights reserved.