2 BATHESALONIKA 3
3
Dithapelelo le go ila bobe
1Bana bešo! Ke sa re: Re rapeleleng gore Lentšu la Morena le tšwelele pele, le tumišege bjalo ka moo ga geno, 2Le gore re hlakodišwe bathong ba babe ba go se tsebalege; gobane tumelo ga se ya bohle.
3Morena yena ke mmotegi; o tlo le tiiša a le phemela tše mpe. 4Gomme rena re le holofetše ka Morena, gore tše re le laelago tšona le a di dira, mme le tlo fela le di dira.
5A Morena a etetše dipelo tša lena a di iše leratong la Modimo le kgotlelelong ya Kriste.
6Gomme re laela lena bana bešo, ka ina la Mong wa rena Jesu Kriste gore le ikaroganye le ngwaneno e mongwe le e mongwe e a arogago a se ye ka molao le ka taelo ye a e filwego ke rena. 7Lena beng le a tseba ka mo le swanetšego go etša rena ka gona, gobane ga ra ka ra šaetša re na le lena. 8Le go ja ga ra ka, ra ja bogobe bja go fo fiwa; sa rena e be e le go dira le go itapiša gore re se ke ra imetša motho wa lena. 9E se gore go babalelwa ga go a re swanela; e be e le gore le bone rena le tle le re etše. 10Le gona mola re na le lena re le laetše ra re: Moganamodiro, le go ja a lese.
11Ge re realo ke ka gore re kwele ge ba re: Ba bangwe ba lena ba tšea ka tsela ya go aroga, ga ba sware modiro, ba dira tše di išago bošaeding. 12Badiratšeo re a ba laela, re bile re ba kgopela ka Mong wa rena Jesu Kriste, gore ba sware modiro ba ikhomoletše, ba je bogobe e lego bja bona.
13Gomme lena bana bešo, le se ke la lapa go dira tše bolo. 14Ge go ka ba le e a sa ratego go kwa se lengwalo le le se bolelago, le lese go kopana nae, gore a hlabje ke dihlong. 15E se be go mo dira lenaba; e be go mo sola, ka gore ke ngwana bolena.
16Gomme yena Morena wa khutšo a a fele a le fa khutšo e lekanelago gohle.
17Tumedišo ya ka še, ye ke e ngwalago ka seatla sa ka, nna Paulo; ke lona leswao la ka mangwalong ka moka. Ke ngwala ka mokgwa woo.
18Kgaugelo ya Mong wa rena Jesu Kriste a e be le lena ka moka. Amene.
Currently Selected:
2 BATHESALONIKA 3: NSO51
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1986. Used with permission. All rights reserved.