1 TIMOTHEO 6
6
Bahlanka le beng ba bona. Baaroši. Moleko wa lehumo. Tlhabano ya tumelo
1Bohle ba e lego ba bohlanka bja go tlengwa, ba tsebe ge beng ba bona ba loketšwe ke kgodišo ka moka, gore ina la Modimo, le thuto, di se ke tša gobošwa. 2Ba ba nago le beng ba e lego badumedi, ba se ke ba ba nyatša, gobane ke bana babo; a ba tiiše go ba hlankela ka ge e le badumedi le baratiwa ba go setšwa ka mokgwa woo.
-- Ruta batho ka go realo, o ba eletše ka mokgwa woo. 3Ge motho a ka ruta tše šele a sa ye ka mantšu a Mong wa rena Jesu Kriste, ka mantšu a a se nago bolwetši, le ka thuto ye e amanago le borapedi, 4o foufetše ka boikgogomošo, mola a sa tsebe selo; bolwetši bja gagwe ke go bata dikgang le diphetolano tša go tsoša mona le tšhitano le maroga le kgonono tše mpe, 5le diphapang tša lefela tša batho ba ba senyegilego kgopolo, ba ba timetšwego ke therešo, ba ba rego borapedi a e be bja go inyakela leruo ka bjona. Ba ba bjalo kgaogana nabo.
6Gomme borapedi ke leruo le legolo ge bo na le go kgolwa ke tše o nago le tšona. 7Gobane mola re etla lefaseng, ga ra ka ra tla le selo; le go tloga re ka se kgone go tloga le selo. 8Ke gona, ge re na le dijo le diaparo, a re kgolweng ke tšona. 9Gobane ba ba ratago go huma ba wela melekong le mereong; ba ya le dikganyogo tše ntši tša bošilo tše di gobošago motho tša mo senya, tša mo tekesetša tshenyegong le tahlegong. 10Gobane megabaru ke wona modu wa bobe ka moka; gomme ba bangwe ba go kekela go tšona ba arogile tumelo ba ikobela mehlako e mentši.
11Gomme wena motho wa Modimo, tšhaba dilo tšeo; o phegelele toko, le borapedi, le tumelo le lerato, le kgotlelelo, le bonolo. 12Hlabana tlhabano e botse ya tumelo, o thope bophelo bjo bo sa felego, bjo o bileditšwego bjona, wa ipolela o botse pele ga dihlatse tše ntši. 13Ke go laya re le pele ga Modimo Mophedišatšohle, le pele ga Kriste Jesu e a ipoletšego pele ga Pilato ka bohlatse bjo botse. 14O tiiše go ya ka taelo ye e se nago senyalo le bosodi, go be go bonagale yena mong wa rena Jesu Kriste. 15Ke yona ponagalo e tlogo bonatša yena Ramašoto, Makgoneannoši, Kgoši ya dikgoši, Morena wa marena. 16Mong a bophelo boilalehu ke yena a nnoši; o agile seetšeng se se sa fihlelwego, yo go sego motho wa go mmona le go ka mmona, mong a theto le bogoši bja neng le neng. Amene.
17Bahumi ba mehleng ya bjale ba laele o re ba se ikgodiše, ba se holofele lehumo la go tla le go tloga; ba holofele Modimo e a phelago; e a re fago tšohle gore di re natefele. 18Ba laele o re ba hume ka mediro e bolo, ba rate go nea, ba abele ba bangwe. 19E be gona go ithuela, go thea motheo wa mehla e tlo go tla gore ba fihlele bjo e lego bophelo bja ruri.
20Timotheo! Diša tše di digetšwego wena. Ila merero ya lefela ye e sa holego selo, le diphetolano tša ba ba aketšago ba re ke yona tsebo. 21Ke tsebo ye ba bangwe ba ipolelago ka yona, mme ya ba go aroga tumelo.
A kgaugelo e be le wena! Amene.
Currently Selected:
1 TIMOTHEO 6: NSO51
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1986. Used with permission. All rights reserved.