MARK 5
5
Yesu dik fuli suu cona ki kay sana
(Matiye 8.28-34; Luk 8.26-39)
1Yesu u suu mamsina tew ha ki ŋgoo lumma Galilena hu mbassa vi suu Gerasenna. 2Yesu ɗiŋ ay ki kaŋga hu lumba ɗiŋi, san dew kal ay ki duk ussa, ŋgaf u namu. 3Sa namma u fuli suu cona kamu, nam kaki ni duk ussa. Li ni u galina lay, sa ka ndak a njunum kaŋgaɗi. 4Tew tew ni asi gam kinjiŋŋa semu, asi njunum kom u galina lay. Kinjiŋ ma semma nam kusum ki lay, gali ma del komma nam jaam ki lay. Sa ka tew egem a balam kaŋgaɗi. 5Tew tew njeŋge, faali lay, nam poy kolo kay ɦinira duk ussa, sawalla, dak tam u gogoyra lay.
6Nam wi yesu ay ki day ni, ndi liŋŋa egemu, goɓ gaa fokomu. 7Nam sawalla kolo eŋga ana, «Yesu Goŋ Lo ma kolona, aŋ a min mi egen ge? An joɓoŋ fok Lona, aŋ lasanɗi.» 8(Nam di na ni, kay Yesu ɦam gaɗta ana, «Ful ma cona kal ay gi hurumu.») 9Yesu joɓ sana ana, «Seŋ ana mege?» Nam hoŋom dira ana, «Bolowo, kay ami bolow cocoo.» 10Nam joɓ Yesu sem bolowo ana dikisi ki hu mbassa daŋgaɗi.
11Hu li namma kosoŋŋa moli hu cocoo, ti tlena kay ɦinira. 12Fuli suu cona joɓ Yesu ana, «Hinimi, ami cuk hu kosoŋŋa.» 13Yesu hinisiya, fuli suu cona sel ay ki hu sana, cuk hu kosoŋŋa gaw. Kosoŋŋa ii va ma bup bup mba', yow ay liŋŋa kay ɦinira, mba cuk ki duk mbona, ba kaŋga halaŋ gaw.
14Suu taa kosoŋŋa yow ay liŋŋa, mba di boy namma ki maŋ suuna hu zi ma ŋgolna u ma gorira halaŋ. Suuna yow ay a gol dlara li ndaɗta. 15Asi mba eg Yesu, fi sa ma fulina ay kamma kaki u baraw mamma egem nje. Nam ɗigil kiyo. Tasi mbuɗ ndaana. 16Suu wi boy namma u irisina njaɗasi kay sa fulina li ay kamma u dlara li eg kosoŋŋara lay. 17Asi gijaŋ ɦuum ana nam tuɗa hinisi mbas masira.
18Hu li ma Yesu taɓa koloo hu lumba taɓa ni, sa ma fulina li ay kamma joɓom ana hinim nam tuɗ umu. 19Yesu hinim kaɗi. Nam dam ana, «Hoŋ voo eg somoyoŋu, dasi kay tlesuu Bu Suuna laŋsina egeŋŋa u jivi mamba waŋ hahawaŋga.» 20Sana gi tam tuɗ di ki hu mbas mamba, Zi ma Doogona, kay tlesuu Yesu lasi egemma halaŋ. Suu hum boy namma halaŋ lak jim, saa kay boy namma.
Goŋ Jayrussa u cara ŋgen baraw ma vi Yesuna
(Matiye 9.18-26; Luk 8.40-56)
21Yesu hoŋ hu lumba a tuɗ keŋ hiŋŋa. Suuna moli egem ndiŋ ndiŋ. Nam coli fun lum ma ŋgolna tok. 22Sa ŋgolna hu Zira Tokka sem ana Jayrus mbaa, hu li ma nam wi Yesu nam goɓ kaŋga fokomu. 23Nam tii tam egem ana, «Goonda ka tuguɗiyo, hin tok a miɗna. An ceneŋu, aŋ mbay tin koŋ kaɗu, a ndaɗ mbuɗ ki jiviya, tuguɗira hiniɗ kiyo.» 24Yesu tuɗ umu, suuna mbay um bolow cocoo, ɦeɓem koloo.
25Cara dukusi dew fi busuna li basara doogo yam mba'. 26Ndaɗ wi hawra ko suu laɗ kumuna cocoo. Begera koɗta daɓ ki basa halaŋ. Nam ka hiniɗɗi lay, zul ay egeɗ zuli na ɗow ɗow. 27Ndaɗ hum dla Yesu na ni, ndaɗ tuɗ duk suu ŋgoromma, ŋgenem baraw mamma. 28Ndaɗ di ana, «Lini an ŋgenem baraw mamma ɦawa lay ni, tan hinin kiyo.» 29Hu li namma busuna ka uɗ gaw. Ndaɗ wi kaɗ ana nam hiniɗ ki wa. 30Hu li namma gaw ni Yesu wi ana saɓak ma egem maa kal ki wa. Nam pereɗ irim eg suu ŋgoromma ana, «Saa ŋgenen baraw manna ni gege?» 31Suu haɗi mamsina hoŋom dira ana, «Aŋ wi ana suuna ɦeɓeŋ kolo duku may ni, aŋ hin di ana, Sa ŋgeneŋ baraw maŋŋa ni gege, ni nanage?»
32Nam gol irim ki payam halaŋ a wi ana sa li dla ndaɗta ni gege? 33Ndaɗ cara wi ana dla ndaɗta li ni koɗu ni, taɗ mbuɗ dlak jik jik ko ndaana. Ndaɗ mba goɓ kaŋga fokomu, dam gasira ki bel bel. 34Yesu hoŋ daɗu, «Goonda, huruk vi kan jiviya ni, ndak suɗ ki wa. Tuɗ u heɓpa, tuguɗi makka hinik ki wa.»
35Vun Yesu bay ndi kaŋga tu may ni, suu sunda col ay vi mulna Jayrus mba di ana, «Sa ŋgolna, goroŋga miɗ ki may ni, aŋ loɓ ta Malaŋ Haɗta ni nana olo ge?» 36Yesu noy ɓak namma na ni, nam di maŋ sa ŋgolna Jayrus ana, «Li ndaaɗi. Tin huruŋ kan ɗow.» 37Nam hin sa daŋ ka a tuɗ umbi, tuɗ ummi Piyer may, Jak u wayamma Jaŋ may. 38Asi tew vi sa ŋgol ma hu Zira Tokkana tew ni, Yesu hum tiina tum na kuu, suu sawalla lay na. 39Nam kal ha vo dukusi kal ni, dasi ana, «Agi tum vunna may, tii may ni, kay mege? Goora ka miɗiɗi. Ndaɗ buu ni senna ɦawaa.» 40Suuna hum na ni, gijaŋ san umu. Nam selesi ay ki bunsu halaŋ, hin ummi bu goora u suɗu, suu ay umma may. Asi cuk hu zira goora gi hura. 41Nam tli ko goora komu, daɗ ana, «Talita kum.» U vun masina ni ana, «Goowayra, an daku, col koloo.» 42Goora col koloo, gi taɗ tuɗta gaw. Goo ndaɗta basaɗaɗ doogo yam mba'. Suu egemma wi na ni, asi mbuɗ lakira na jim. 43Yesu dlaɗasi humusi ana, «Dlara an laɗ wandara, agi daɗ ki maŋ saɗi.» Nam dasi ana asi ɦaɗ va ma tiya.
Currently Selected:
MARK 5: BMS
Highlight
Share
Copy
Want to have your highlights saved across all your devices? Sign up or sign in
Bible Moussey © Bible Society of Chad, 2002.