MARK 2
2
Yesu col sa gugufura ki koloo
(Matiye 9.1-8; Luk 5.17-26)
1Li buuna ŋgoo dagan ca ni, Yesu hoŋ Kapernaum olo, suuna humum dlam ana nam kal ay vo wa. 2Suuna tok ay na ndiŋ ndiŋ, gak gak asi ka fi li ma col oloɗi, ha ki fun goŋga ni na lay. Nam dasi boy ma vi Lonna. 3Suuna u tasi fiɗi tli sa gugufura ay kasi ganiya. 4Asi ka fi li kal a tinim fok Yesuɗi, ko suuna moli cocora. Asi co duk zira hu li ma Yesu coli huna. Asi sii sa gugufura ay u dlaɗ mamba. 5Hu li ma Yesu wi ana hu suu asina vi kamu ni, nam di sa gugufura ana, «Goonna, cooŋga daɓ ki wa.» 6Duk suu molina, suu may suu wi magaara ɦiw saa kasi ana, 7«San wanni di na amege? Nam pan ni Lona. Sa ma daɓ cora kina ni gege? Ni Lona dewɗi su?» 8Yesu wi ki ana asi saa hurusi kurufu na ni nam dasi ana, «Agi saa hurugi kurufu na ni kay mege? 9Dlara loɓma ni u taarage? Kay dam ana cooŋga ki daɓiyara ɗowba col koloo, tli dlaɗ maŋga kaŋu, tuɗ u seŋura su? 10Agi wi ki anaba, Goŋ Sanna u saɓak ma daɓ cora vi suu kay ndaŋgarana egemu.»
Nam di sa gugufura, 11«An daŋu, col koloo, tli dlaɗ maŋga kaŋu, hoŋ vo varaŋu.»
12Nam col kolo gaw, tli dlaɗ mamba tli ni, gi tam tuɗta ii suuna halaŋ. Asi wi na ni, ŋgususi paɗ ki kasi na fakat. Asi geleɗ Lona ana, «Ay day day ni, wi dlara na ka dewɗi.»
Yesu yi Levi umu
(Matiye 9.9-13; Luk 5.27-32)
13Yesu kal ay ki doŋ lum ma Galilena olo. Suuna halaŋ tok ay egemu, nam haɗasi may. 14Hu li ma nam a jaka wanni, nam wi Levi, goŋ Alfena, kaki hu zira taara. Nam dam ana, «Tuɗ ay unu.» Levi col koloo, gi tam um gaw.
15Yesu kakira a ti funa vi Levi. Suu vi taara u suu cona laki ko tasi u Yesu u suu haɗi mamsina, ti funa. Asi bolow cocoo, tuɗ u Yesu. 16Hu li ma suu wi magaara u suu Farisenna wi Yesu ti funa u suu vi taara u suu cona na ni, asi ɓak maŋ suu haɗi suu vi Yesuna ana, «Nam ti funa u suu vi taara u suu cona ni nanage?» 17Yesu hum na ni, nam dasi ana, «Suu may suu tasi ka tasiɗina, ka tuɗ hu li ma hal kumunaɗi. Suu tuguɗira halammi asiya. An mbay ka a yi suu hurusi ɗegeenaɗi. An mbay ni kay suu cona.»
Suuna joɓ Yesu kay laara
(Matiye 9.14-17; Luk 5.33-39)
18Fali ta dew suu haɗi suu vi Jaŋŋa u suu Farisenna li laara. Suuna mbay joɓ Yesu, «Suu haɗina vi Jaŋ u suu haɗi suu Farisenna, li laara ni, suu maŋsina ka liɗi ni kay mege?» 19Yesu hoŋosi dira ana, «Suu mba vogodona li laara hu li ma njuf cara kaki egesina su? Ҥawaa. Njuf cara li kaki dukusiya ni, asi ka li laaraɗi. 20Falira njuf cara kaɗira, asi hin li laara tuwa.
21«Sa ka jak baraw ma wilina fun tam u ma basinaɗi. Kay ma wilina hin haa ma basina ki olo, haa ndaɗta mbuɗ ŋgol suwa. 22Aŋ sana ka sel sum veŋ ma wilina hu mbumbu yo ma basinaɗi. Li ka naɗi ni, sum veŋŋa ndi wani, mun mbumbu yona kiyo. Summa may mbumbuna may hin ɓeŋ ki ko tasi jak. Aŋ sel sum ma wilina ni, hu mbumbu yo ma wilina.»
Yesu u buu ma vi Lonna
(Matiye 12.1-8; Luk 6.1-5)
23Hu buu ma vi Lonna, Yesu jak tuɗta duk senena. Suu haɗi mamsina kus yam wana#2.23 wana ble. kosiya. 24Suu Farisenna di Yesu ana, «Aŋ gola! Asi li tlesuu doo ki kasi hu buu ma vi Lonna ni nanage?» 25Yesu hoŋosi dira ana, «Dlara David laɗ u suu mamsinara agi bay waɗ hu magaara tu su? Va ti ka kosiɗi, mayra casi lay. 26Nam kal hu Ziŋ Lonara, ti fu ma li ɓivunna maŋ Lona u namma. Hu li namma Abiatar ni mul ŋgol ma li ɓivunna. Gaɗ mayra hin suu li ɓivunna a ti funa wani asi doy holna, David tlam tani, ɦam maŋ suu mamsina.» 27Yesu dasi olo ana, «Buu ma vi Lonna li ni maŋ sana. Sana ka maŋ buu ma vi Lonna ɗowɗi. 28Ni kay ndaɗta Goŋ Sana ni malaŋ buu ma vi Lonna.»
Currently Selected:
MARK 2: BMS
Highlight
Share
Copy
Want to have your highlights saved across all your devices? Sign up or sign in
Bible Moussey © Bible Society of Chad, 2002.