2 KORINTNA 11
11
Pol u suu vovoɗta suu bay gasina
1Lini agi mina vi laɓara kagiya siɓ u anu. 2An li honira kagiya ni honira vi Lona kay agi ni ko goowayra an ŋgaɓaɗ a ɗumba maŋ sana dew ni Kristu. 3An li ndaana kay yal magina ɓeŋ kiɗi, a agi noyogi taɓ magira gasira teteɗta u Kristu kiɗi ni ko Eve na, hin taɗ guyna ganaɗ yaɗ u kaboyna. 4Lin sana mba egegiya di boy kay Yesu ma daŋŋa ka ma ami dagi kammaɗi ni, agi hini tok a fi ŋgussa daŋga u boy ma daŋŋa zeɗ u Boy ma Ayra ma agi fam funumina.
5An saa ana an ka kaɗaki duk suu vovoɗta suu ŋga tasi ana asi ni suu ŋgolonaɗi. 6Lini vunna ka ɓak ki funun jiviɗi lay an ka kaɗaki hu wiraɗi, ami takagi u tlena ki na halaŋ hu megelay hu wira lay.
7Hu li ma an dagi Boy ma Ayra vi Lona an ɦagina ni ɦawaa, an hoŋ tan ki kaŋga kay a wulugi koloo, an li na ni co su? 8Suu vina suu ɦiw an gasi ki hawra, vi warakŋa kosi kay a njun ugiya. 9Fali mayra an ka varagira wani sa ma njun un a ɦan gursu kaɗi, kay gorseygi suu ay Masedoinna ɦan tlesuu njun unna halaŋ kay ndaɗta an ŋgom tan gak gak tinigi nek manda ka kagiɗi an min tuɗ fok a ŋgom tuna gak. 10U gasira vi Kristu ta ka hurunda an ndak di ana bibiŋilla ndaɗta sa tlanda ka ki kan hu Gresɗi. 11An di ana ni kay mege kay an ka minigiɗi na su? Lona wi ki gasi ana an minigiya.
12An li ay na an min li cecemi na olo, kay doo dlara vi suu ana asi fi voɗta ŋga tasira wana ki halaŋ hin di ana, asi li ni ko ami lira na may. 13Suu asina ni suu vovoɗta suu bay gasina, asi kaboyna kay sun masira, mbuɗ tasi ana asi ni suu vovoɗta vi Kristu. 14Dlara gol ko dlara mbuɗ na ka huɗi kay Satanna kay tamba mbuɗ tam sa sunda huulona vi kiɗikka. 15Ni ka loɓ kay suu mam suu sunda a mbuɗ tasi suu sunda vi ɗegeeraɗi hu daɓpa ni asi hin mba fi warakŋa kay dlaasira asi laɗta.
Pol fi lassa ŋgolo kay nammi sa vovoɗta
16An di hu olo sa golon ko an sa laɓa naɗi ɗowba lini golon ko ndaɗta na van dukugi ko sa laɓana na kay an hin ŋga tan nde may. 17Va ma an dam cecemi wanna ni ka u minda vi Bu Suunaɗi kay boy namma an mbuɗ a ŋga tan wanni an ɓakŋi ko sa laɓana na. 18Suu hiŋŋa ka ŋga tasi na ni hu dlara vi sa warna, an may ni min ŋga tan na may. 19Agi suu neeyna siɓigi u suu laɓana. 20Lini sa gologi ko agi ni mborɓiina na lay ni agi siɓ u dlaamba ko va ma gusugi gusi na lay, sa ganagi yagi lay, lini sa ŋga tam kagi lay, lini cagi irigi lay, 21an li zolo kay a di boy namma, ami ay maŋi cocoo a li ko wani nara.
Kay ndaɗta lini sa ma min ŋga tam kay vaa, an ɓak ko an laɓana na, an may ni li na may. 22Asi ni suu Hebrena su? Anni na may, asi ni suu Israelna su? Anni na may, asi ni suu hu njafna vi Abrahamma su? Anni na may. 23Asi ni suu sunda vi Kristu su? Jiviya an di ko sa ma ka wi dlaɗina na an ni suusiya, an li sunda suusiya, an tew tew ay hu daŋgayna, an fi poŋga sen ŋgol suwa, an hin tok a miɗna miɗnara sen bolowo. 24Suu Juifna waɗan yasi vadl u waɗta dok hindi yam dleeŋe. 25Suu Romma can poŋga yasi hindi, yasi dew olo asi gigin u gogoyra a can kiyo, lumba dok ko goloŋ duk mbona u an kokora yan hindi, an buu duk mbona basa hura yan dew. 26An tuɗ koyra sen bolowo ta an fi lumma fokon tliya tliyara, suu kulna fan voɗo, gorsen suu Juifna mbaaran dlara baanda kanu, suu ka njaf suu Juifɗina gi u boy namma ay ni asiya, ay hu ɦoŋzi ŋgolna lay asi halan dlara baanda an fi dlara ba kira ŋgoo bagi hu fulla lay, ba ki duk lumma ŋgolna lay, ba ki gin duk gorsen suu bay gasina lay. 27An li sunda loɓma u dlara nekka fan tew tew, an buu bay senna tew tew lay, mayra u laara can lay tew tew, ni an kak bay ti vaa, semeɗna can ŋgolo ka fi baraw ma cuk kaɗi lay. 28Tlesuu ɦiw an hinisi bay ɓakasiya hu buuna tew tew an ka zii nekka vi suu vina. 29Lini sana maŋiya an li tan maŋi egem may, lini sana ndi kaŋga hu cora wa ni an mbuɗ tan hahawra may.
30Lini an ŋga tanu ni an ŋga tan ni tak ki ni kay maŋi manda. 31Lona, Bu Bu Suuna Yesu, geleɗta ka u sem a fafatɗa nam wi ana an ka kaboyɗi. 32An ay hu Damas mul ma li sunda vi mul ŋgolna Aretas, cuk suuna gol vun grekŋa ɦoŋzi ŋgolna kay a vanda. 33Asi kalan ay ki ii gulumunna kay ɦoŋzi ŋgolna, siirin ay ki kaŋga ni u kaalamba, an suɗ ay ki kommi na.
Currently Selected:
2 KORINTNA 11: BMS
Highlight
Share
Copy
Want to have your highlights saved across all your devices? Sign up or sign in
Bible Moussey © Bible Society of Chad, 2002.