Yowann 5
5
An Yaghheans yn Poll Bethesda
1Wosa hemma yth esa goel dhe'n Yedhewon, ha Yesu eth yn-bann dhe Yerusalem.
2Yma yn Yerusalem poll ryb Porth an Deves, henwys yn Ebrow Bethzatha,#5:2 Bethzatha: War-lergh re a'n dornskrifow Bethesda Bethsaida, Belzetha. ha dhodho pymp portal. 3Ynna yth esa ow krowedha myns meur a glevyon, dall, evredhek ha palsyes, ow kortos gwayans an dowr.#5:3 ow kortos gwayans an dowr: Nyns usi an geryow ma yn re a'n dornskrifow. 4Rag el an Arloedh e yn-nans y'n poll herwydh an seson ha trobla an dowr; ha'n kynsa den ow mos ynno wosa gwayans an dowr a veu yaghhes a by kleves pynag esa dhodho.#5:4 Nyns usi an wers ma yn re a'n dornskrifow. 5Hag yth esa ena unn den ha dhodho kleves etek blydhen warn ugens. 6Yesu pan y'n gwelas ow krowedha, hag ow kodhvos ev dhe vos hirneth yndella, a leveris dhodho, ‘A vynnydh bos yaghhes?’ 7An den klav a worthybis dhodho, ‘Arloedh, nyns eus genev denvyth a'm gorro y'n poll pan vo troblys an dowr; mes, ha my ow tos, den arall a yn-nans a-dheragov.’ 8Yn-medh Yesu dhodho, ‘Sav, kemmer dha weli yn-bann, ha kerdh.’ 9Ha desempis an den a veu yagh, hag a gemmeras y weli yn-bann ha kerdhes.
Ha'n jydh na o sabot. 10Ytho an Yedhewon a leveris dhe'n den a veu yaghhes, ‘An sabot yw, ha nyns yw lafyl dhis ty dhe dhoen dha weli.’ 11Ev a worthybis dhedha, ‘Ev neb a'm yaghhas, an keth henna a leveris dhymm, “Kemmer dha weli yn-bann, ha kerdh.” ’ 12I a wovynnas orto, ‘Piw yw an den a leveris dhis, “Gwra y gemmeres yn-bann, ha kerdh”?’ 13Mes ny wodhva an den a veu yaghhes piw o, rag Yesu re omdennsa, drefenn bos routh y'n tyller na. 14Wosa hemma, Yesu a'n kavas y'n tempel, hag a leveris dhodho, ‘Otta, ty yw yaghhes; na wra begha namoy, ma na hwarvo dhis neppyth gweth.’ 15An den eth dhe-ves, ha derivas dhe'n Yedhewon, Yesu dhe vos neb a wrussa y yaghhe. 16Ha rakhenna an Yedhewon a helghyas Yesu, rag ev dhe wul hemma y'n sabot. 17Mes Yesu a worthybis dhedha, ‘Ow Thas a ober bys lemmyn, ha my ynwedh a ober.’ 18Rakhenna ytho an Yedhewon a hwila dhe voy y ladha, ny veu henna yn unnsel rag ev dhe derri an sabot, mes ynwedh rag ev dhe elwel Duw y Das, orth y omwul par dhe Dhuw.
Awtorita an Mab
19Ena Yesu a worthybis ha leverel dhedha, ‘Yn hwir, yn hwir y lavarav dhywgh, ny yll an Mab gul travyth y honan, marnas an pyth a wel ev an Tas dhe wul; rag pypynag a wra ev, an Mab ynwedh a'n gwra. 20Rag an Tas a gar an Mab hag a dhiskwa dhodho pup-tra a wra ev y honan; hag ev a dhiskwa dhodho oberow moy es an re ma, rag may kemmerrowgh marth. 21Rag kepar dell wra an Tas drehevel an re varow ha ri dhedha bewnans, yndella ynwedh an Mab a re bewnans dhe biwpynag a vynno. 22Rag ny vreus an Tas denvyth, mes ev re ros breus oll dhe'n Mab, 23may hwrello peub enora an Mab, kepar dell enorons an Tas. Neb na enor an Mab ny enor an Tas neb a'n dannvonas. 24Yn hwir, yn hwir y lavarav dhywgh, ev neb a glew ow ger hag a grys yn neb a'm dannvonas, yma dhodho bewnans heb diwedh, ha ny dheu dhe dhampnasyon, mes re dremenas a vernans dhe vewnans.
25‘Yn hwir, yn hwir y lavarav dhywgh, an eur a dheu, ha lemmyn yth yw, pan glew an re varow lev Mab Duw, ha neb a glew, bewa a wrons. 26Rag kepar dell eus dhe'n Tas bewnans ynno y honan, yndella ynwedh ev re wrontyas dhe'n Mab kavoes bewnans ynno y honan. 27Hag ev a ros dhodho galloes dhe vreusi, rag ev dhe vos Mab an den. 28Na gemmerewgh marth a hemma, rag an eur a dheu pan glewvydh y lev peub eus y'n bedhow, 29hag i a dheu yn-mes; an re a wrug da bys yn dasserghyans bewnans, an re a wrug drog bys yn dasserghyans dampnasyon.
30‘Ny allav vy ow honan gul travyth; kepar dell glewav y hwrav vy breusi, ha'm breus yw ewn, rag ny hwilav ow bolonjedh ow honan, mes bolonjedh ev#5:30 bolonjedh ev: War-lergh re a'n dornskrifow bolonjedh an Tas. neb a'm dannvonas.
Dustunioryon a-barth Yesu
31‘Mar tustuniav ahanav ow honan, nyns yw ow dustuni gwir. 32Yma nebonan arall neb a dheg dustuni ahanav, ha my a woer an dustuni a wra ev y dhoen ahanav dhe vos gwir. 33Hwi a dhannvonas dhe Yowann, hag ev a dhug dustuni a'n gwiryonedh. 34Mes ny dhegemmerav an dustuni dhiworth den, mes my a lever hemma rag may fowgh hwi selwys. 35Ev a veu lugarn ow leski hag ow splanna, ha hwi a vynnas bos pur lowen pols yn y wolow. 36Mes yma dhymm dustuni brassa es dell esa dhe Yowann; rag an oberow a ros dhymm an Tas dhe gowlwul, an oberow na a wrav, i a dheg dustuni ahanav, an Tas dhe'm dannvon. 37Ha'n Tas neb a'm dannvonas, ev y honan re dhustunias ahanav. Ny glewsowgh hwi y lev bythkweth, na gweles y furv. 38Ha nyns eus dhywgh y er trigys ynnowgh, rag ny grysowgh ynno ev neb a wrug y dhannvon.
39‘Hwi a hwila an skryptors, rag ynna y tybowgh hwi dhe gavoes bewnans heb diwedh. Hag i aga honan yw an re a dheg dustuni ahanav; 40mes ny vynnowgh dos dhymmo vy rag may fo bewnans dhywgh. 41Ny dhegemmerav enor dhiworth tus, 42mes my a'gas aswonn, nag usi kerensa Duw ynnowgh agas honan. 43My re dheuth yn hanow ow Thas, ha ny wrewgh ow degemmeres: mes mar teu nebonan arall yn y hanow y honan, henna a dhegemmerowgh. 44Fatell yllowgh hwi krysi, neb a dhegemmer enor an eyl dhiworth y gila, mes ny hwilowgh an enor na dheu marnas a Dhuw? 45Na dybewgh my dh'agas kuhudha a-rag an Tas; Moyses yth yw neb a wra agas kuhudha, ev neb re drestsowgh ynno. 46Rag mar kwrellewgh krysi yn Moyses, hwi a gryssa ynnov vy; rag ev a skrifas ahanav. 47Mes mar ny grysowgh y skrifow ev, fatell grysowgh ow geryow vy?’
Currently Selected:
Yowann 5: ABK
Highlight
Share
Copy
Want to have your highlights saved across all your devices? Sign up or sign in
© Kesva an Taves Kernewek 2004, 2023
© Cornish Language Board 2004, 2023