ISAI 30
30
Izipt toh kizopna bawlte tung agih hi
1“Mangpa’n ta helhatte tung agih hi,” achi hi, “Mi dangte lemguotna ala ua, kei ahing dong sih uh, sil tup leh guon anei ua, Keima hagau akipat ahi sih hi, Khelna tunga khelna abelap theina ding bep uh ahi. 2Izipt gam ah a peisuh ua, ka thuhilna hing donglou in, Pharaoh hatna a kisuhat ding leh Izipt limbel ding muongin, achi hi. 3Tuaziehin Pharaoh thahatna khu na zumna uh ahi ding a, Izipt limbel ding na muonna ulah na zalatna uh ahi ding hi. 4Aziehpen alamkaite uh Zoan ah a um ua, apalaite uh Hanes ah ahing tung uhi. 5Amaute aphattuompilou ziehun, mipite zousie azum ding ua, ahisihleh panpina hilou, phattuomna hilou, hinanleh zumna leh minsietna ahi zaw ding hi.”
6Simlam gamsate tunggihna buoina leh lungkhamna gam, tuana kipat in humpibahnei nu leh humpibahnei, gul gupha leh gulpi leengtheite ahing pawtdoh ua, ahausatnate uh sabiltung hatlai tungah apuo ua, tualeh sangawngsau thu-vum tungah agoute uh posahin, ama ua dinga phattuomna neilou mite kung lam ah apeipi uhi. 7Iziptte panpina khu phattuomna bei leh bangmalou ahi dinga, tuaziehin Izipt khu “Rahab-Hem-Shebeth”#Rahab Hem Shebeth: Bangma bawlneilou Rahab ahisih leh Rahab sip dildela tounu china. ka chita hi.
8Tuin pei inlen, amasang ua suongpeh tungah giel inlen, laibu ziel sungah giel in, tuakhu hun hing tung dingte a, kumtawn tan a chiemtena ahiden theina dingin. 9Aziehpen amauh mi helhatte, ta zuoutheite leh Mangpa dan ngaikhe nuomlou tate ahi uhi. 10“Mutheite kunga mu sih un,” guolneite kunga “Genlawhna dihtah hing hil sih un, azahnop huoi lamlam gen unlen, kisolna thuzuou genlawh un. 11Lampi dih nuasie unlen, lamdih apat kiheimang unlen, Israel Mi Siengthoupa ka masang ua kipat sumang un chi ngitnget te.” 12Tuaziehin, Israelte Mi Siengthoupa’n tambangin agen hi; “Tam thu na simmaw zieh uleh nuoisie na leh suhgentheina na muon ziehun tuate ah na kinga uhi. 13Tuaziehin tami gitlouna khu noute a dingin kulbang sangtah khi khang chim dinga kisa puoh kengkung thakhat a chim ding bang ahi ding hi. 14Tualeh aman belkhengpa bel asatguoi dimdem bangin asatguoi ding a, akhawisih ding hi; tuachi’n athemnengte lungthukhua apat mei luohna ding leh tuikhuh akipat tui sawhna ding athem nangawn umlou,” bang ahi ding hi.
15Aziehpen Mangpa Pasian Israelte Mi Siengthoupa’n tambangin agen hi. “Nua kia unlen khawldam in um ulachin hundam in na um ding ua, dai dide a muonna leh gintatna in na hatna uh ahizaw ding hi; hinanleh na ut sih uhi.” 16Nouten, “Hilou e! Sakol tunga tuongin hattah in ka taimang zaw ding uhi,” na chi uhi, tuaziehin taimang ngut ve ua, “Tualeh sakol hattah tungah i tuong ding nachi u’maw!” Tuaziehin nou hing nuadelten hattah in ahing nuadel ding uhi. 17Mi khat phawn in mi sangkhat ataizah ding ua, mi nga phawn in na taimang ding uhi; muol vum a diellap khaina mung kiphut bang leh muol tunga puonlap kinuasie bang na hi masangsie un na taizah ding uhi. 18Tuaziehin noute ahing hepi theina dingin Mangpa’n noute ahing ngah ding a, tuaziehin na tung ua lainatna anei theina dingin tawisangin a um ding hi. Aziehpen Mangpa khu dihna Pasian ahi a, Ama ngah zousie ahampha uhi.
Tunua chienga Israel hamphatna
19Jerusalem a teng Zion mite aw, na kap nawn sih ding uhi. Aman na kaa ging husate ua pat in pellou in ahing hepi mama dinga, azahtah chiengin ahing dawng ding hi. 20Mangpa’n lungkham mangbatna ann leh gimthuohna tui hing na pe nanleh, nou hing zilsah na Siete uh akibu nawnsih ding ua, na mit un noute hing hil na siete uh amuta ding hi. 21Na zietlam uh ahiei na veilam uh ahiei a na pieltah chiengun, “Tami lampi ahi tanah pei un,” tami zuiun chiin na nualang ua pat na bil un aw khat na za ding uhi. 22Tualeh dangka tui a na luon uh na milimte uleh sana tui a na milim khenthute uh na zepna uh na buasah ding ua, sil nieh bangin na paimang ta ding ua, amaute kungah “Peimangun” nachita ding uhi. 23Tuachi’n Aman buchi lei a natu dingte ua dingin guotui ahing pe dinga, lei a silpiengte apat ann hoitah, pungtah leh atam atam ahi dinga, tua ni chiengin na ganta honte uh gamtatna mun lienpi ah agamta ding uhi. 24Tuamabangin bawngtalte leh sabiltung loukaiten ann chisawsa, suohdul leh phazapa kizap siengsa ane ding uhi. 25Kithana thupitah ni chienga, galvenna inn sangte achip ni chiengin, taang sang chinteng leh muol sang chinteng tungah luipite leh luitate aluong ding hi. 26Tuathamlouin Mangpa’n amite kisuhliemna maa atuom pieh a, aliemna maa uh asuhdampieh ni chiengin, ha vah khu ni vah abang dinga tualeh ni vah zong alesagi in, ni sagi vah kigawm bang tuh in avah ding hi.
Assiria sietna
27Ngaiun, Mangpa min khu gamlapi akipat in alungthahna meikuong leh apuohgih tahtoh ahing pei hi; akam khu thangpaina in adim a, tualeh alei zong mikatum thei meikuong bang ahi. 28Anah hu khu luitui luonglet ngawng chieng tum bang ahi ding a, manthaina lawpi a sep a, namchinteng khenzah dingin, namchin kam ah suhkhel sahna kamkaina khau avaw dinga tuami’n mite apielmangsah ding hi. 29Pawi siengthou zan lai a na bawl lai ua, la kisa bangin la nasa ding ua, tualeh Mangpa muol siengthou a, Israel Mihatpa kunga tung dinga, theile toh apei lai ua, lungsim kipahna anei bangun lungtang kipahna nanei ding uhi. 30Mangpa’n a aw thupitah akiza sahta dinga, alungthahna huoisetah toh, mi katumthei meikuong toh, huipi leh guopi toh, tualeh gielpi toh akhut a ami vuoh dan ahing ensahta ding hi. 31Mangpa aw thupitah ziehin, khetbuha misat zelpa Assiria khu susiet dimdem in a umta ding hi. 32Tualeh Mangpa’n gawtna chienga amauh asatna mun tengah khuong leh zam ging abang ding a, tualeh kidouna ah akhuttumin adou ding hi. 33Aziehpen Mangpa’n lai peh akipat Tophet#Tophet: Gehena, gawtmun china ahi. Tophet um dan khu khuong china ahia, hinanleh hun nukhia lam ah Hinnom guom a mihinga kithoina mun khu a min in ang nei uhi. aguotsa ahi, Ahi leengpa a dinga guot ahia; athuh athuh, a let alien a ana bawl ahi. Asil koikhawm khu mei leh singtampi ahia; kaat luiluong bangin Mangpa huu in akuong sah vapual ding hi.
Currently Selected:
ISAI 30: ZOUBSI
Highlight
Share
Copy
Want to have your highlights saved across all your devices? Sign up or sign in
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.