ISAI 29
29
Ariel leh Jerusalem tunggihna
1Ariel aw Ariel David tenna khopi na tung agih hi, akum akum a belapin pawite avelvel in hing tung hen. 2Hinapiin Ariel ka lunggimsah nalai dinga, tuachi’n ka leh mauna a um dinga, tualeh tami kei a dingin Ariel kana bang ahi ding hi. 3Nangma douna dingin na kimkot ah giehphuol ka sat dinga, na kimkot ah leipal ka hing sekhum dinga, nangma douna dingin kulpite ka hing khokhum ding hi. 4Nang pen puasah in na um dinga, lei lah akipat na ham ding a, na thugen lei vui lah akipat in ngiemnou in ahing pawtkhe ding a, na aw pen leinuoi akipat dawi aisan siemte aw abang ding hi, tualeh na thugen khu leivui lah akipata dapham abang giap ding hi.
5Tuathamlou in nangma hing dou mipi tampite leivui nel bang ahi ding ua, mi zauhuoi mipite khu bushi leeng mang bang ahi ding uhi; Ahi, tuate khu mitphiet kaal in thakhat in ahing um ding hi. 6Galkapte Mangpa’n vanpi ging leh zilling leh thawmging ngaitah toh kithuo pingpei leh huipi hattah toh, katum thei meikuong a noute hing gawt ding ahi. 7Ariel dou nam zousie, ama leh akulpi doute zousie nangawn leh ama sulunggimte zanlai a manglam a mengmuna bang ahi ding hi. 8Mi gilkielten amang ua ann aneh ua, akhahlaw chieng ua agilva tuomlou bang ahi ding ua, ahisihleh dangta miten amang ua tui adawn ua, akhahlaw chieng ua aphattuomlou bangin Zion muol dou mite nam zousie mipite khu tuomi bang giap ahi ding uhi.
Israel thumanlouna leh mittawtna
9Um khinkhien unlen, lamdang sa un; na mitte uh tosah unlen mitto in um un, akham uh a, hinanleh zukham ahisih uhi, ahawi vadong ua, hinanleh zukham a hawi vadong ahisih uhi. 10#Rom. 11.8Aziehpen Mangpa’n imutduna hagau na tung uah ahing sungbuo hi; namit uh ahing singsahta a guolneite leh mutheite na lu uh ahing khukhumta hi. 11Tuachi’n mengmuna zousie nou a dingin laibu a um thu kikhakhum, tua laibu laisim theimi kungah pie henlen, “Hepitahin hing simpieh in” kichi leh ama’n, “Ka simthei sih, akikhakhum ahi,” achi sanbang ahita hi. 12Tuachi’n laibu khu laisim theilou mi khat kungah kipie in, “Hepitahin tam laibu sim vawi,” kichi leh ama’n “Lai kasiem sih,” achi zel hi.
13 #
Mat. 15.8,9; Mak. 7.6,7 “Tuaziehin Mangpa’n tam miten kam in ahing nai ua, akam un ahing pahtawi ua, hinanleh alungtangun ahing gamlat uhi, tualeh keima ahing giinna ulah mihing thupieh leh kihil thaw maimai ahibou hi. 14#1 Kor. 1.19Tuaziehin ngaiin, tam mite lah ah sil lamdang ka bawl dinga, nasep lamdang, thumahtah khat, aziehpen a mipilte uh pilna amangthai ding a, tualeh amilunggel siemte uh theisiemna uh phuolguhin a um ding hi,” achi hi.
15Athuhilnate uh Mangpa akipat a phuol dinga, thuhtah sui mite atung uh agih hi; anasepte uh miel lah abawl ahi a, koi ahiei ahing mu ding? “Koi ahiei ahing thei ding?” achi uhi. 16#Isai. 45.9; Rom. 9.20Adihtahin silzousie na lebul siengta uhi Belkhengpa khu atungman bang lel a ngaisut in a um ding amah? Sil siem in asiemtu khu, “Ama hing siem hikoi sing achi thei diei”? Ahisihleh silbawldoh in abawldohpa khu, “Theisiemna mawngmawng nei vawtsih achi ding amah”?
Israel hundamna
17Hun tomnoukhat nuachieng in Lebanon khu leihoi haichi pienna mun suohsah lou ding amah? Tua leihoi mun khu gammang lah banga ngaiin umlou ding ahiei mah? 18Tua ni chiengin bilbingten laibu a thu umte azata ding ua, tualeh mit tote mit in miel nuoi leh khomiel lah apat in amuta ding uhi. 19Mi kingaingiemten zong Mangpa ah kipahna thupizaw anei ding ua, mipite lah a mi zawngten Israelte Misiengthoupa ah anuomta ding uhi. 20Aziehpen migilou zauhuoi lah bangmalou a bawlin a umta a, mi simmawhatte zong suhmang in a umta hi; tualeh silgilou bawl dinga ngahte zousie sattan in a umta uhi. 21Tua miten kamteng khat in mite asukhielsah ua, kulpi kotpi a thuhil mite awhna dingin thang akam ua, tualeh midih khu bangmalou in akiheimangsan zel uhi.
22Tuaziehin Mangpa Abraham tandoh pa’n Jakob innkuonte tungtang thu ah tambangin agen hi, “Jakob tuin amuolphou nawn sih dinga, amai muol nawn sih ding hi. 23Hinanleh ka khut suoh atate alah ua, amu chiengin, ka min asiengthousah ding ua, Jakob Misiengthoupa khu asiengthousah ta ding ua, tualeh Israel Pasian agiingta ding uhi. 24Tualeh hagau lam a sil bawlkhielten zong ahing theisiemta ding ua, tualeh phunhatten thuhilnate apom siemta ding uhi.”
Currently Selected:
ISAI 29: ZOUBSI
Highlight
Share
Copy
Want to have your highlights saved across all your devices? Sign up or sign in
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.