JOHAN 2
2
Jesu’n tui uoin asuohsahna
1Ani thum niin, Galili gam a Kana khuo ah kitenna khat a um a, khunah Jesu nu zong a um hi. 2Jesu leh anuazuite zong kitenna ah chiel ahi uhi. 3Tualeh uoin ahing bei tahin, Jesu nu’n akungah “Uoin anei nawn sih uh,” achi hi. 4Jesu’n akungah, numei#Numei chipen Zou kam in simmawna ahia, Greek leh Aramaik ham in zatatna etsahna ahi. Tualeh Scofield gen dan in “Madam” china ahi. nang awlmawna toh kei bang kisai kha ahiei? Ka hun atung nai sih hi, achi hi. 5Anu in tuonvaite kungah, Aman na kung ua “Agen pouma bawl un” achi hi. 6Judate tawndan ngaina dungzui a, tui a kisiensuona dinga kizang suongtuibel litar sawmgiet ahiei, zaleh sawmni ahiei, dawl chiet guh atung uhi. 7Jesu’n akung uah, “Tuibelte ah tui sungdim un,” achi a, tuachi’n amaun belgong gei chiet in asung dim uhi. 8Aman akung uah, “Themkhat sawhkhie unlen, pawi nehbawl tuonvai lamkaipa kungah vatawi un,” achi hi. Amaun ava tawi uhi. 9Pawi nehbawl tuonvai lamkaipa’n tua tui uoin hing suoh khu achiem a, hei a kipata hing umdoh ahiei chi atheisih a, (ahivangin tuonvai tuisawkheten athei uhi) Pawi nehbawl tuonvai lamkaipa’n mouneipa ahan a, 10Akungah, “Michin in akipat chil in uoin chiate ahawm masa a, michielten akham nua chieng ua, achia loudeute ahawm uhia, nang lah tu dongin achia na nei na lailai a,” achi hi.
Nuazuiten agingta uh
11Tami chiemtena lamdang kipatna Jesu’n Galili gam a Kana khuo a abawl ahia; tualeh athupina akilang sah hi, anuazuiten Ama agingta ta uhi. 12#Mat. 4.13Tami nuain Kapernaum khuo ah Jesu anu toh, asanggamte toh, tualeh anuazuite toh apei suh ua, khunah ni tam ataam sih uhi.
Jesu’n biehinn asuh siengna
13 #
Pawt. 12.1-27
Tualeh Judate peikan pawi anaita a, Jesu Jerusalem ah apeitouta hi. 14Tualeh biehinn huong sunga bawng leh belam leh vakhu zuate tualeh dawkan a sum hengmi toute amu hi. 15Aman jepna khauhuol abawl zouin biehinn huongsung akipat in, belamte leh bawngte abawn in a notdoh sienga, tualeh sumheng mite dangka abuohkhup pieh a, adawkante uh a sawnpua pieh hi. 16Aman vakhu zuate kungah, “Tam silte tana pat in lamang un, Ka Pa inn summet bawlna inn in bawl sih un,” achi hi. 17#Late. 69.9Tuachi’n anuazuiten, “Na inn a dinga ka phattuom ngainain ahing ne tumta chi a David gel ahing theidoh uhi.” 18Tuachi’n Judaten adawng ua, akungah, “Tam silte na bawl ngal leh koute lah a chiemtena bang ahiei na hing lah thei ding?” achi uhi. 19#Mat. 26.61; 27.40; Mak. 14.58; 15.29Jesu’n adawnga “Tam biehinn susie un, ni thum sungin ka tungding ding hi,” achi hi. 20Tuachi’n Judaten, “Tami biehinn lamna in kum sawmli leh guh alut a, nang maw ni thum sunga na tun ding kia ding?” achi uhi. 21Ahivang in Aman atahsa pumpi biehinn agenna ahi zaw hi. 22Tuaziehin mishi lah akipat a athawkia nuain anuazuiten tam akung ua athugente ahing thei thata ua, Pasian Laisiengthou leh Jesu thugen agingta ta uhi. 23Peikan annkuonglui lai a Jesu Jerusalema a um laiin, chiemtena lamdang abawlte amu un mi tampiten amin agingta ta uhi. 24Hinanleh Jesu’n mizousie atheichien ziehin amaute lah ah akikaang koi hi. 25Tualeh Aman mihing sunga um athei ziehin, mihing thu koima hilchet akiphamaw sih hi.
Currently Selected:
JOHAN 2: ZOUBSI
Highlight
Share
Copy
Want to have your highlights saved across all your devices? Sign up or sign in
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.