Efesus 3
3
Pol nanda' maol nawalipa epes hiesi sololama Godi owa' Judaisi
1Krais nakolasa epes hiesi wambotagw biam esis Juda saloma esis ina Juda sataga etifis. Amama atom dei' ae' Pol, Krais Jisas nanda'e anda' kalabusa agiambama ipe' epes fowa' pelolama Godi. 2Endilisi, ape' hiapai mape etapi God nagiambamapa na'a. Amama anan nase'e ma imafiam enda' maol ewalapam ewalipipam. 3Maol anama Anan nasi'ianai nape na'ama. Basef Ananimi bu'wami fowa' ata' mandambaho', dei' God nawalapameam alihim anda'am bandam mail pas amama. 4Ama i'i pitalifa basef amama, pegawa okom ae'anai ma basef hiami Kraisi mali' mape mandambaho'. 5Fowa' la'ela'ef God ina nawalapam alihima enis epes, owa'. Ea' dei' Ambal Bu'unai Ananinai nawalapam alihima afa' aposel waloma amam profet ananifai. 6Basef amama bu'wami Godi mape na'ama. Epes hiesi owa' Judaisi hi'alas fowa' sololama Godi saloma ipe' pataga etifipa paloma ape' Israel. Ea' ipe' hipei paloma ape' Juda mofa' amamaga bu'wami hiami God na'i endilisi nase'apami ma lagel Krais Jisasi.
7God nandandepa ae' anda' maol awalapa basef amama bu'wami. Anan okom nainaili nagiambame na'a nanda'e la'ifiwi, amama atom dei' ape anda' maol anama. 8Endilisi ae' ape falafuwei agi' endilisi ma amam nematawa hiesi Godi. Ea' Anan okom nainaili nagiambame na'a ma anda' maol awalipa esis sololama Godi basef bu'wami ma Krais. Waf anama naloma basef amama bo'om endilisi mikila' gawa epes hiesi, ea' ina la'ifisa sagawa ofagema amama, owa'. 9Ea' God nagiambamas na'a nihi'ambasa okom Ananinai maloma waf hianai Ananinai epes hiesi. Okom anama naloma waf anama ananinai hianai damba damba nape nandambaho' nafi'i nataga dei'. Ea' dei' nanda' amamaga hiami hi'alam mataga mape nase'e maol anama awalapa amama mape mandambahi'i alihim. 10Fowa' ata' mandambaho', dei' na'i esis amam nematawa Godi sombale'efanai sihi'ambam amam dembemi agufumi maloma amamaga pepel hianai nape heveni mogawa gawa Godi. Gawa anama hianai ananinai naninani lu'una sa'ona hi'alana. 11Anan nanda'am na'ama etin si'i okom ananinai atona nape la'ela'ef na'iama lagel dembinai ape'inai Krais Jisasi atona. 12Ape' mape la'ifipa maloma anan mombale'efana. Amama atom ape' ina umbamahapa ma mefe'ma God, owa'. Ape' ukup la'ifim endilisi ea' dei' mafe' felefele'ma Anan. 13Ea' dei' a'ipipa a'i nimanimi amama dei' efa'ama igiambamepa, na'ama piti amama ukup aom, pa'i ipe' ina la'ifipa, owa'. Pepe la'ifipa si'i ipe' dembipei. Dei' main, nimanimi amama magiambamepa.
Pol nanda' betena esis Efesus ata' sogawa andeande' waf Krais okom nainailasanai
14Ae' okom na'i Krais nakolas ape' Juda maloma ipe' ina Judaipei mataga etifipa, amama atom dei' indiwa nembawa etawa anda' beten anifela Ahalome. 15Ape' hiapai mape etap maloma sape ilif wapoti', ape' amam nematawa wambotagw hiami mofa' agof ape'imi ma Anan atona. 16Ae' anda' beten ahali'ana na'ama. A'i God nigiambamepa ma pepel nafifilili ananinai lu'unai endilisi. A'i pepel Ananinai atona nonda'epa pepe la'ifipama opalef ipe'imi nomona Ambal Bu'unai Ananinai atona. 17A'i bale'ef ipe'inai atona Krais nope opalef ipe'imi nomon la'ela'ef. Ea' anda' beten ahali' Goda waf ukup maimailasanai nope si'ina ma ipe' ma nonda'epa la'ifipa pila waf anama si'i nombalef lawag nahapila etap nowala la'ifina. 18A'i ipe' pefa' pepel neloma amam nematawa Godi hiesi pegawa okom Kraisi nainailipa, anama lu'una endilisi nafe' laogon endilisi nafe' wa'ol wa'ol nalata gani ilif endilisi ea' nowala nafe' owin endilisi nafe' etin. 19Ea' anda' beten ahali' Goda basef akutaimi na'ama. A'i ipe' pegawa okom anama Kraisi endilisi, anama nikila' gawa epes hiesi. A'i ipe' pegawa okom anama Kraisi ma pepe si'ipa endilisi ma waf bu'unai God okom na'ianai hianai. 20God anan la'ifinai. La'ifimi amama Ananimi dei' manda' maol opalef ape'imi nomon, amama la'ifim endilisi. La'ifimi amama atom anan la'ifinai ma nonda' amamaga hiami mikila' basef hiami manda' beten mahali'anami hi'alam maloma ukup ape' hiapai wapoti'. 21Amama atom dei' ape' epes Godi mombale'efana minifela God mefela agel Ananinai lu'una ma Krais Jisas la'ela'ef mofe' mofe' anona nemaf owagama gani. Endilisi.
Zur Zeit ausgewählt:
Efesus 3: aojF
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2013, Wycliffe Bible Translators, Inc. All rights reserved.