Efesus 2
2
God nanda' ape' maga'i mape namepa
1Basef ipe'imi mape na'ama. Fowa' ipe' panda' waf naninani aonai nahepa paga'. Dei' main, ipe' ina pagawa God, owa'. Pesambalona panda' waf aonai. 2Nogota anama ipe' ata' paila waf aonai atona etapanai ea' paila basefa aman aonai. Anan la'ifinai numafi pepel aonai nape la'afen numafi etap naloma otaga. La'ifimi amama mataga aman anama aonai dei' numafi epes isima sesambala basef Godi. 3Fowa' ape' hiapai manda' waf aonai si'i epes isima sesambala basef Godi sanda'ami, maila nomonas opaf apinai atona. Ape' maila opaf apinai ma ukup ape'imi atom. Amama atom dei' ata' mape owina okom wandafunai Godi, si'i enis epes etapasi.
4Ea' God nati owahipipa endilisi ape' epes, okom lu'unai nainailapa. 5Amama atom dei' nanda'apa mataga namepa. Ape' mape si'i saga'i ma waf aonai. Ea' nanda'apa mataga namepa mape la'ifipa maloma Jisas Krais. Amama okom lu'unai Godi nagiambamepa nefa'epa pitanimani. 6God nafelapa mape namepa maloma Jisas Krais, mofa' agel lu'unai mape la'ifipa maloma anan, ea' ukup mapomana ilif heven. 7God nanda'apa na'ama ma nogota anae' dei' nafe' nafe' notaga owagama nihi'ambas okom ananinai nainailapa nigiambamapa na'a, ma epes hiesi soloma ensel hiami sogawa okom anama ananinai lu'unai endilisi nandawalap alihina ma ape' na'ama. Anan nanda'apa mape la'ifipa maloma Krais Jisas. 8Dei' main, God nagiambamepa na'a, amama atom dei' nofa'epa pitanimani pembale'efa Krais. Amamaga amama ina ipe' etipa panda'am, owa'etin. God atona nase'epam na'a. 9Amama ina si'i amamaga ipe' panda' maol pefa'ami, owa'. Ea' ina enin epen etitin la'ifina nefela agel ananinai atona ma amamaga amama, owa'. 10Dei' main, God atona nanda'apa mape. Lagel Krais Jisasi atona nanda'apa mataga dambaipa ma waf bu'unai ape' mailana mafe'.
Krais nakolasa epes hiesi wambotagw biam sataga wambota atotona
11Ape' mogawa amama andeande'. Lagof amam Judai atom matopa' alop amamunai. Ea' esis Juda safela esis etis sa'i epes satopa' alop. Ea' ipe' fowa' pape pelolama God owa' Judaipei, sofalepa sa'i, “Owa' petopa' alopi.” Basef amama ma'i waf alopanai ande' atogon. 12Ipe' pegawa nogota anama fowa' ata' pape pelolama God, ipe' ata' pape ande' laogona Krais, pape ande'ma epes hiesi Israel epes Godi, ea' pape ande'ma basef endilisimi atom God na'iam naloma esis. Basef amama na'i endilisimi atom nagiambamapa. Ipe' fowa' ina anom amamaga bu'wami pape pehafam anona nemaf, owa'. Ipe' owa' pembale'efa God. 13Ea' ipe' fowa' pape laogona God, esimbel Kraisi atom ma ga' ananinai mofa'epa dei' makolasepa pafi'i pape felefele'ma Goda lagel Jisasi atona.
14Dei' main, Anan atona ofagonama opaf awanena. Anan nakolasa ape' Juda maloma ipe' anona wambota epes hipei fowa' pelolama God, dei' mataga mape epes etifipa. Anan atona nahape' waf anama nawala ape' Juda maloma ipe' owa' Judaipei. Ea' anan atona natopa' waf anama naumbihinai lopa' fitapanai. 15Ga' Kraisi atona Anan nali'amona basefa mi'uli fowa' God naso' Mosesanai maloma anom basef tu'wanim mape mi'uli anama. Anan nanda'am na'ama nokolasa epes wambotagw biam, ape' Juda maloma ipe' owa' Judaipei mataga si'i epen etitin dambainai. Ama mope opalef awanem mope etifigin felefele'ma God. 16Krais naga' lawag usi'inai tu'wanainai nakolasa epes sape wambotagw biam sataga si'i alop atotona. Ea' ga' ananinai natagaha waf asasinai naumbihinai lopa' fitapanai naga' hi'alana. 17Anan dei' nafi'i na'i basef bu'wami nawalapam na'i, “Dei' ipe' pape opalef etifim paloma God naloma epes.” Anan na'ipipa basef amama fowa' pape laogona God pelolamana, paloma ape' Juda ananipai mape felefele'ma Anan wapoti'. 18Lagel Kraisi atona ape' epes hiesi mape wambotagw biam mape eaf alihina mafe'ma Ahalomapa Goda Ambal Bu'unai Ananinai atona.
Ape' Kristen hiapai si'i ipat Godi
19Ipe' dei' ina ata' pape si'i laugunisi dalaisi etap a'asi, owa'. Ipe' pape paloma esis amam nematawa epes hiesi Godi, wambota Ananinai. 20Ipe' pape si'i ipat Godi nape nala'ana. Anan nanda'ana natoma ilifa afa' aposel waloma amam profet nawafa si'i olalefa ipat anama. Ea' Krais Jisas anan atona si'i olaf nali'i la'ifinai endilisi ma ipat anama. 21Faulaga natoma la'ifina ma Krais, ea' la'ifina andeande' nape. Dei' God ata' nanda' ipat anama nala'ana etin nataga lu'una ma nope bo'ona ma Dembinai atona. 22Ipe' wapoti' pape la'ifipa paloma Jisas Krais, dei' God nape nakolasipa etifigin la'ela'ef paloma enis Kristen alupusi hiesi. Ea' nanda'epa pataga si'i ipat endilisi God napeinai ma Ambal Bu'unai Ananinai atona.
Zur Zeit ausgewählt:
Efesus 2: aojF
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2013, Wycliffe Bible Translators, Inc. All rights reserved.