Rom 14
14
Kristen ag lailkad ii epeɗiadmana
1Aria, danab laa nug ooppa genab doyak nuhig ɠagattag iitta dayeb amu, ag nug aon tamaniak ahilag ooppa omalna noig! Amge ag dabmak laala, dabmak amuam keeke anuqaknu iitta, danab oh ag amunu ele dabmak laippu ii aotteb amu, ag nug ele amunu aib nai appeg ona appeg doum. 2Danab laa nuhig ooppa genab doyak am ɠagattag ele nug ee oh lanan Kayak noobppa ena daatte dootte. Amu danab laa nug ooppa genab doyak nuhig ɠagattag iitta ele, nug Kayak noobppa ena daakkunu nug doɗ teppu ii lamanu dootte amunu nug doɗ teppu ii latte. 3Danab nug ee oh latte, nug danab doɗ teppu ii latte ele, nug nuhignu aib dabmak nau awom. Amu danab doɗ teppu ii latte, nug danab ee oh latte ele nuhignu, “Am hipunin hette,” anam aib dabmeum. Iitta. Kayak Nug danab amu nuhig daakkunu awom daatte. 4Na am danab aun amunu na danab laanu maɗi nidnu nai eheɗ nuhignu attem? Am nahip keeke iitta, nug am Kayaknu maɗi nid. Nug uɗat nuhigppa ɠagattag hippaidkkutai o iitta nuhig uɗatppa na qekkutai, amu oh am nuhig gumak danabnuib keeke daatte, amge nug geha ɠagattag hippaidkku. Aɗinu? Naɗi Nug nukka ɠagattag qetteb, nug ɠagattag daakku.
5Aria, danab laa nug deɗ laippunu, amuam deɗ gunnab, deɗ laala eɗattak dootte, amu danab laa nug deɗ oh am iɗu laippu anam dootte. Anam amge danab oh ag anen anen ag kobol atten am tutukku amu, ag ahilag dabmakppa dabmak aon, aɗi kobol am tutukku doon autna aweg! 6Amu danab laa nug deɗ laanu gun dootte, danab amu, nug Naɗinu dabmaama anam dabmette. Amu danab laa nug ee oh latte, nug Kayak amegppa, “Ena ha meɗom,” anana latte amunu, nug ele Naɗinu dabmaama anam hette. Aria, danab laa nug ee oh ii latte, nug ele Naɗinu dabmaama, teppu laa lamanu gun mette, amuppa nug ele am Kayak amegppa, “Ena ha meɗom,” awa atte. 7Amu ig doottem, oonigppanu danab laippu laa nug bau dayak nuhignu, am nukka nuhig keekeib iitta. Amu danab laippu laa nug mauhak nuhignu, am nukka nuhig keekeib iitta. 8Amunu ig bau daattem dayeb, amuam Naɗinu keeke. O ig mauhkkunig dayeb, amuam Naɗinu keeke amunu, ig bau daagnigte, o iitta ig mauhkkunigte, ig am Naɗinuib daattem.
9Kristus Nug danab ag mauhppig, danab ag bau daatteb ele, amu oh dilag Naɗi daakkunu, Nug diig amununab mauha, eɗua hibaittom. 10Ig oh geha Kayaknu hettoɗiak abenppa daagnig amunu, na layap, nug Jesusnu ooppa genab dotte amu, na aɗinu nug epeɗittem? Aɗinu na layapnu keeke hamu bia doottem? 11Kayak naippa ig oh nuhig hettoɗiakppa daagnignu nai daatte am inam. “Naɗi atte. ‘Da genab bau daattem, genab amubia geha danab ah oh ag genab da noolppa gatelag qaun ona, da binal mekkulag. Amu danab ah oh ag dahilnu, “Nug am Kayak genab,” aon akkulag.’ ” 12Amunu ig oh anen anen geha kobol oh hettem elenu diig amu Kayak amegppa akkunig.
13Amunu ig lainkad laa dilag kobolnu amu ig ii epeɗiadmata. Iitta. Ig lainig laa hipuninppa na qemanu dabmeta, keeke laa ig hepput na qekkunu ii hematanu dabmetat oitu! 14Amu da am Naɗi Jesusnu danab, amu Nug da ippuniɗa auta awe, da ee laippu laa nug nukka ii lanaknu epeɗiak ii daatte doottem. Amge danab nug nukka keeke atten laa nug amunu eheɗ dootte, nuhigppa am eheɗ daatte ele doottem. 15Aria, laa nug keeke laa lakkunu eheɗ dootte dayeb, amge na ee amu lattem amu, kobol nahip amuppa na heppe, na layap nug ooppa guittak dookku, na amunu dookkut, kobol amuppa na layapnu oot ii mauhtte. Amu Kristus Nug na layap amu eɗua aokkunu mauhom amunu, na nahip ee lanak kobolppa nuhig ooppa genab doyak aib heppe nauhom. 16Amu ag keeke laalanu ena dootteb ele, ⌊laa ag anam ii dootteb, na beɗunppa⌋ laa ag keeke amunu nai eheɗ amananu ag dabmeig! 17Aɗinu? Ee lanak amu le lanaknu kobol ele aa Kayaknu ɗo maɗoɗnu diig iitta. Kayaknu ɗo maɗoɗ diig am genab tutukku hak kobol, maɗoɗ kobol, amu maɗoɗppan gamag ahak kobol ele. Keeke amu oh am Kayak Ouɗi Nug he bette. 18Danab laa nug ib amuppa Kristus waappa daya nuhig uɗat hette ele, geha Kayak Nug nuhignu ena dookku; danab ag ele nuhignu am danab ena dooglag.
19Amunu tamaniakppa ig kobol laala, ig kobol amu dim lamittutut, danab laa ele maɗoɗ daattem, amu kobol laala ig kobol amu dim lamidtutut, ig lainkad ele, ig oh ihinig ooppa genab doyak nug ɠagattag qedattem, ig kobol amuib dim lamidta hetu! 20Ag aib ee lanaknuib dabmena, Kayaknu uɗat heppeg nauhom. Am genab, ee oh am lanaknu epeɗiak daatte, amge na keeke laa lae, amu he, danab laa nug oo eeɗak doya na qette dayeb amu, na aakku kobol eheɗ hettem. 21Amu kobol elele haknu am inam. Na doɗ teppu lappe, na layap nug na anitta na qekku dayeb, na aib doɗ teppu lame. Amu wainnu ele anam dayeb amu, na aib lame, o keeke laa ele anam dayeb amu na aib heme.
22Na Kayak noobppa ee lanaknu aɗi ootppa genab doottem amu, na amu hekkutnu elele, amge danab oh nahip dabmak dim lamidkkulagnu aib heme. Danab laa nug keeke laanu ena dabmette, nuhig dabmak keeke amunu beɗuppa nai ii yaatte ele amu, nug itittak ena awom daatte. 23Amge danab nug ee laanu, “Kayak Nug da ee imu lakkulnu aib atte doottem,” akku, me nug latte amu, nug aakku he, nuhig ooppan oiyak ippunittaknu ulum nug ooppa guittak medatte. Aɗinu? Nug Kayaknu neekkakppa keeke amu hekkunu am elele ooppa genab ii dootte. Amu aɗitai keeke danab nug Kayak nug amu hekkunu elele dootte ooppa genab ii dootte, nug hekku dayeb amu nug aakku hipunin hette.
Zur Zeit ausgewählt:
Rom 14: NB
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© (Active), Wycliffe Bible Translators, Inc. All rights reserved.
