Rom 1
1
Digmaknu nai
1Da Pol, da Kristus Jesusnu maɗi nid. Nug da totol danab daakkulnu otiɗa amu Kayaknu Nai Ena mehuqkkulnu ele tituaniɗom. 2Kayak Nug anukka Nai Ena amu megakkunu nai qakka a, nuhikkud propet ag aon, Kayak naippa yaaeg noum. 3Nai ena amuam Kayak Nug bekka, ihinig Naɗi Jesus Kristus, nuhignu nai. Wan imuppan menuakppa amu, Nug Dawit buɗubppa aakku doum. 4Nug doa, ad emaitakppa mauhe, Kayak Ouɗi Nug nuhig ɠagattagppa he, Nug eɗua hibaittom, amu amuppa Kayak Ouɗi Nug he, Jesus Nug am Kayak Bekka miag atia malom; Nug am Jesus Kristus, ihinig Naɗi. 5Jesus, nuhigppa amu, Kayak Nug da iitta aɗi danab iɗu iɗu oh ag nuhignu oolagppa genab doon, nuhig nai dim lamidkkulagnu onilagppa ekkulnu Nug nuhig ehanittak okkai hamu megatte meɗa, da totol danab ele dayeye, totol uɗat hekkulnu meiɗom. 6Amu ag Jesus Kristusnu danab ag Rom daatteb ele amu, ag ele am Jesus Kristusnu ewak baag doon dim lamidtteb. 7Amu da Pol, da ag Rom danab, Kayak ahilagnu oo mauhe, ag nuhikkud danab ah oppiaawak ele daaglagnu onilagppa eum ele amu, da ahilagnu yaattem. Kayak, ig Mamenig, amu ihinig Naɗi Jesus Kristus ele, ahilah ehanittak okkai hamu mettak, amu ahilah maɗoɗ ele ahilagppa daaglahnu ool daatte.
Pol nug Rom anadkkunu oo dayom
8Aria, tatam da ahilag ohnu Jesus Kristus onigppa Kayak dahil amegppa, “Ena heme,” awe attem. Aɗinu? Ahilag ooppa genab doyaknu amu danab wan atu ohppa ag aegeg dootteb. 9Amu Kayak, da meul ohppa Nug waappa dayeye Nug oɗe dim lamittette, Nug Bekkanu Nai Ena mehuqttem amu, Nugnab da nai yaattem imuam genabib yaattem doya malom daatte amunu da iikku yaattem. Am inam. 10Da haen oh unuqittak dahilppa ag onilag diie, Kayaknu dabmaknab awak am inam daatte dayeb amu, da ahilagppa gemu gokkulnu ib laa ha meɗakkunu haen oh Nug oɗ medattem.
11Da ag anadkkulnu ool okkai daatte. Amunu diig am, da ag Kayak Ouɗinu ɗo hamu mettak laa madappi, ag oolag ɠagattag aqakkunu ool daatte. 12Da inam dabmettem. Ahilag ooppa genab doyak da ehaniɗeb, amu dahil ooppa genab doyak ag ehanadkkunu ool daatte. Anam dayeb amu ig oh oo ɠagattag qak aognig. 13O lailad, da ag imu doon autna aoglagnu ool daatte. Haen kuɗum da uɗat dahilppa, da iitta aɗi danab laala ehanatti, ag ele Kayak baekkudppa daatteb, amubia da ag Rom daatteb, ag ele ehanadkkulnu ool dayom amunu, da ahilagppa gokkulnu dabmemi, amge haen oh keeke laa nug da ippul oo neum. 14Amu Kayak Nug da Grik danab amu danab laala ele, danab doyak dabmak ena ele, danab dabmak iitta bia ele, ag oh ehanadkkulnu uɗat meɗe daattem 15amunu, da ag Rom appa daatteb ele ahilagppa Nai Ena mehuqkkulnu ool okkai daatte.
16Da Jesusnu Nai Enanu amu, da uɗa nak ii doottem. Aɗinu? Nai amuam Kayaknu ɠagattag, amu Kayak Nug amuppa danab aun aɗi ag oolagppa genab dootteb ele, Nug ag eɗua diitte; Juda ag tatam ⌊nai amu⌋ doyegeg, iitta aɗi ag aakku geha dootteb. 17Nai Enappa Kayak Nug ib attenppa ihinignu, “Genab tutukku hak danab,” akkunu ippunigtte. Genab tutukku daagnignu ib am ooppa genab doyak, aakkuib. Ib laa iitta. Kayak naippa yaak inam daatte amubia. “Laa nug Kayak noobppa genab tutukku hak danab daatte, nug Kayaknu ooppa genab dootte amunu, nug bau daakku,” awa atte.
Danab oh ag Kayak dimedappig
18Danab ag hipunin digdig, eheɗ hak digdig ele henana, ag amuppa doyak diig genabib heeg miag atiak ii dayeye, Kayak Nug hab aabppanu heehe, nuhig oppoɗi bak aakku miag atiak daatte. 19Nug amu hettenu diig am, danab ag Kayak Nug attem daatte, doyak amu oh amu lokkumak ii daatte. Iitta. Am miag atiak daatte. Aɗinu? Kayak Nug nukka ag ippuanattom daatte, doyak amu ahilagppa miag atiak daatte. 20Kayak nukka nuhignu ag ippuanattomnu amu, anukkanab Nug keeke oh hattom, haen amuppanu uɗie gemu ele danab ag Nug keeke hattom am anidtteb, amuppa danab ag Kayaknu kobol laala, danab ag ii anidtteb ele, amu dooglagnu elele. Amu ag genab Kayaknu kobol diig anidna amu nuhig ɠagattag naɗi hanhan daatte ele, amu ele anidppig amunu, danab ahilag eheɗ hak lokkumidna, ag anen anen, “Da ii doomi,” akkulagnu elele iittanab. 21Amu ag Kayak dooppig, amge ag Nug am genab Kayak oolagppa genab ii doonna, ag Nug binag amahlak oppiaawak ii mettana, ag Nug amegppa, “Ena heme,” aon ii appig. Iitta. Dabmak ahilag eɗua, dabmak tutukku iitta be, ag oolag ootot aqe, gatatu manom. 22Amu ag hibguitta hena, inam appig. “Ig am doyak dabmak ena ele,” appig, amge ag danab nug Kayak dab-ii-maama ii dim lamidtte elenu kobol dim lamitte, 23ag Kayak ii mauhtte, Nug binag amahalak oppiaawak ele, ag Nug dimettan, baula Nug noobppa dup nona binag ii meppig. Ag baolina, danab mauhtte ele dottolkad, ai dottolkad, doɗ laala ele dottolkad, amu mat keeke dottolkad ele hattana, ag noolagppa dup nona binalag meppig.
24Ag anam heppig, amunu Kayak Nug uuatte, ahilag dabmak nau amuib dim lamittegeg, kobol nau ag eeɗatteg, ag akka akka ag beɗulkadppa gappai kobol nau hena, dubuttid tak daappig. 25Danab anam amu ag Kayaknu nai doyak diig genabibppanu uun baolin, ag nai hambuppuak aoppig. Amu ag keeke Kayak hattom ele, ag keeke amu noolagppa dup nona binalag mena, amu dilag uɗat hena, ag waalagppa daanna, ag Kayak, Nug am keeke ohnu diig daatte ele, ag Nug dimedappig. Kayak amu, ig hanhan Nug binag metu! Genab. 26Danab ag anam eheɗ heppig amunu, Kayak danab amu uuatte, ag dubuttid kobol ooppa daappig. Ah ag danab uuadna, ag nug awak kobol tutukku uuna, danab ele iitta, ah lailkad ele gappai heppig. 27Amu danab ag ele ah ele nug awak kobol tutukku uueg, ag oolag aab dittiak bia huana ahe amu, ag danab lailkad ele gappai heppig. Danab ag uɗa nak kobol danab laa ele anam heppig. Ag akka anam hena, nob nau eheɗ hak ahilag amunu elele aoppig.
28Laa ele amu, ag Kayaknu dabmak aɗan oiglagnu uuppig amunu, Kayak Nug ag ahilag kobol nau, dabmak nauppanu bette, ag amu dim lamidkkulagnu uuattom. Amu ag kobol nau, danab ag hekkulagnu elele iitta amu, aakku hetteb. 29Amu ag kobol nau digdig, kobol eheɗ digdig, baubau awaknu hik qak kobol, amu gappai hak digdig ele hetteb. Ag laanu ameg qe oolag elele ii daatte dootteb, ag layag kekeɗ metta duug oak kobol, nug mehqak kobol, layag bubuittak kobol, amu oo aeg bak kobol ele, ag kobol nau amu oh henan daatteb. Ag layagnu dimug nai mattiak kobol, 30layag baeg qak anak kobol, Kayaknu nau ninig ele doyak kobol, laa dilagnu eheɗ doya nai tappe nak kobol, beɗuppa tak kobol, ag akka onilag humana amunu nai mattiak kobol ele hetteb. Ag kobol nau bau digdignu dabmena hetteb, amu ag anilkad mamelkad oɗelag dim ii lamidtteb. 31Amu ag dabmak pehettak iitta ele. Ag nai qakkan atteb, amge ag ii dim lamidtteb. Ag lailkad dilagnu, ag ahilagppa nug ehanittak kobol ii dim lamidtteb, amu ag oo doyak ii doyaya nau hak kobol ele dim lamidtteb. 32Ag Kayaknu ɗo tutukku, amuam danab ag kobol nau amu hetteb ele, ag mauhkkulagnu atte amu ag dootteb, amge ag kobol nau amu hekkulagnu oolag he, ag amu hetteb. Danab amu ag anam aakku hetteb, amge amu aakkuib iitta. Iitta. Ag ele danab laa kobol nau amu hetteb binalag metteb.
Zur Zeit ausgewählt:
Rom 1: NB
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© (Active), Wycliffe Bible Translators, Inc. All rights reserved.
