Sawal la giled’a 72
72
Suma a tchen Alona mi b’e vunam yam amulâ
1Ni sawal la gile d’a Salomon mi hlata.
Alo mana, ang he d’alâ mamulâ á ka sariyad’a d’igi ang na,
ang tak ad’u d’ingêr manga mamulâ goroma mi.
2Ar mi ka sariyad’a yam sum mangâ ki d’ingêra,
yam mang suma hohoud’a ki gagazid’a mi.
3Ar ahuniyô suma Israel-lâ a mba ki duzîd’a,
ar yi mat ma ndingâ mi zul ahlena yam d’ingêra.
4Ar amulâ mi ka sariya d’a d’ingêra
mi suma hohou suma aduk sumina,
ar mi mbut ni ma sut suma houd’a,
ar mi miret suma a nga djobozi vunazina kä kasemu.
5Kid’a afata ki tilâ a nga b’o tua d’a,
ar suma a ringîng mandarang gak didin.
6Ar amulâ mi mbut ni d’igi alo
ma mi se yam asu ma a tchawam mbeina na,
mi mbut ni d’igi mbiyo alo
ma mi d’idje andagad’ina na mi.
7Kur atchogoi mamba, suma d’ingêrâ a mba zul avogovogo.
Suma a mba kak ki b’leng nga halasa
gak dabid’a hatchogoid’id’a.
8Ar mi te leud’a tinï ad’ud’a
avun alum ma ngol ma Mediterane-na
dei gak avun apo d’a Matna;
kabo ma avun alum ma Efrat-na,
gak mba avun dabid’a handagad’id’a.
9Andjaf suma abagei hur fulîna, a mba grif kä avoromu,
mam suma djangûna a mba trâ
andaga d’a gugud’upa kä avorom mi.
10Amulei suma Tarsis-sâ ki suma yam tilina,
a mba mbam ki he d’a hawad’a,
amulei suma Saba-na kamulei suma Seba-na
a mba hum he d’a hawad’a mi.
11Amuleina pet a mba grif kä avoromu,
andjaf suma pet a mba mbut ni magumei mama mi.
12Mba mi sut suma hohou suma a nga yuma,
mba mi sut suma talal suma sama ndjunuzi nga d’uo na mi.
13Mba mi we hohou suma amangeîna,
mba mi sut suma talala mi.
14Mam mba mi prud’uzi woi
abo suma a nga djobozi vunazina,
ki suma a nga lazi murud’umbina,
kayam azi ni vama kal teglesâ iramu.
15Ar va mi lum mbi!
Ar a hum lor ra Saba-d’a,
ar a tchen Alona kam kur burâ kaf,
ar a tchen Alona kam burâ ki burâ ala mi b’e vunam kamu.
16Ambas mamba mba d’i wul awuna heî,
agu ma yam ahuniyôna mba mi hô kä ki vuta
d’igi agu ma Liban-na na.
Suma a mba zul kur azina
d’igi asuna nga mi zul na mi.
17Ar simiyêm mi yï didin,
ar simiyêm mi yï yam andagad’a
gak dabid’a hatchogoid’id’a.
Ar suma a b’e vuna yam tazi ni ki simiyêmu,
ar andjaf suma pet a yum ala amul ma furîd’a!
18Ar ei suburi Ma didina Alo meina, Alona hi Israel
ma tu ma ndak á lahle suma atchapmina!
19Ei gilei simiyêm ma subura gak didin!
Ar subur mamba ti oî yam andagad’a pet!
Amin! Amin!
20Tchenda hi David Jesse goromid’a dap da’.
Zur Zeit ausgewählt:
Sawal la giled’a 72: BA
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Azumeina Bible © Alliance Biblique du Tchad, 1999.