Sawal la giled’a 62
62
Ang tin hurungî yam Alona
1Ni sawal la gile d’a David mi hlat mi hat mi ma ngolâ hi suma hle sawalina ki Jedutun.
2Nata Alona tu ba, an kak ki halasa;
sut manda ti tcholï natamu.
3Mam tu nahina manda, ni sut manda,
ni gulumun man ma ad’eng ma ngunguna;
an nga ni le mandara va tu d’i.
4Agi suma, ni gak mindja ba,
agi mba togogi tagi yam sana á zud’um kä
d’igi gulumun ma nga mi leng kä na,
d’oze d’igi gulumun ma nga mi i weta kä woina na ge?
5Agi ndjagagi vunagi ná zud’um kä kur ngol mamba,
tagi nga d’i lagi djivid’a ni yam zla d’a kad’a,
agi b’agi vunagi yam suma ni ki vunagiya,
wani kurugi krovo agi nga yagi nahlena kaziya.
Tchol ndjö
6Nata Alona tu ba, an nga kaka ki halasa;
deng ta manda ti tcholï natamu.
7Mam tu nahina manda, ni sut manda,
ni gulumun man ma ad’eng ma ngunguna;
an nga ni le mandara va tu d’i.
8Sut manda ki subur manda a tcholï nata Alona.
Mam nahina d’a ndjununda,
ni yi man ma ngeid’a mi.
9Agi suma, agi tinigi hurugi kam
kur atchogoi d’a lara ge pet,
agi dagizi zla d’a kurugid’a,
kayam mam mi yi mei ma ngeid’a.
Tchol ndjö
10Gagazi, suma pet a ni d’igi simet ma sana fom ki vunama na,
suma pet ni suma ka zlad’a.
Le a hlazi pet ni ki kilona ni,
azi nafefeta kal simet ma sana fom ki vunama.
11Agi tinigi hurugi yam ahle suma a b’ad’azi kad’engina d’i,
agi tinigi hurugi yam ahle suma hurumba d’uo mi.
Le ahle magina a zul heî pî,
agi tinigi hurugi kazi d’i.
12Alona mi de zlad’a yam tu;
an hum yan mbà mi dala:
Ad’enga ni manda!
13Salad’a, o manga ni d’a didinda,
kayam angî Ma wurak nge nge pî
yam sun mam mba mi latina.
Zur Zeit ausgewählt:
Sawal la giled’a 62: BA
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Azumeina Bible © Alliance Biblique du Tchad, 1999.