Sawal la giled’a 101
101
Amul ma ngolâ mi hle vunam á tit d’ingêr
1Wana ni sawal la gile d’a David mi hlata.
An mba ni hle sawala yam o mang nga didinda,
yam sariya mang nga kad’a mi.
Ma didina, ni ang ba, an mba ni gilengû.
2An mba ni kak tchugot
á hum zla d’a suma d’engzengâ a data.
Ni mindja ba, ang mba mba kan nge?
An mba ni tit yam gagazi d’a kurunda avo huraziyanu.
3An mba ni tin iran yam vama tcho tu d’i.
An noî sunda hi suma a hulong á tuwal fileinina woyo,
an mba ni zlap ki sed’ezi d’i.
4An mba ni ka’î ma mbut ira d’i,
an min we tchod’a ki iran nduo mi.
5Sama mi ka hula yam ndromina,
an mba ni bam mbeyo;
suma a nga fo avilid’a mi ndrozinina,
an mba ni arazi woyo.
6An mba ni tin iran
yam suma d’engzeng suma yam ambasina,
kayam azi kak gevenu;
sama nga mi tit tit ta iratina
ni mam ba, mba mi lan sunda.
7Sama mbut ira mba mi kak kur aziyan ndi.
Ma ka zlad’a mba mi tchol avoron nduo mi.
8An nga ni tchi suma asa’at
suma yam ambasina woi burâ ki burâ
á dabazi woi kur azì ma ngolâ hi Ma didinina.
Zur Zeit ausgewählt:
Sawal la giled’a 101: BA
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Azumeina Bible © Alliance Biblique du Tchad, 1999.