SALMOS 149
149
1¡Le wká'n ẕen X̱anžo Dios!
¡Le goḻ che X̱anžon' to da' kobe!
¡Le wká'n ẕene' Ḻe' gan zej ndobe benne' chie' ka'!
2¡Le yebele, ḻe'e, benne' Israel ka', ḻaw Dios, Bennen' bene' ḻe'e!
¡Le yebele, ḻe'e, zoale yež Sión, ḻaw Dios, Bennen' nake' Benne' Wnná Bia' Ẕen chele!
3¡Le wká'n ẕen La la'y che X̱anžon', na' wya'ale!
¡Le wchoncho yid ka', na' le wchínnj da' ka' ẕgoḻ-le, nich we ḻawle Ḻe'!
4X̱anžo Dios žaz ḻaže'e benne' chie' ka'.
Žape' ba la'ne benne' gax̱jw ḻaže' ka', na' žeslé' ḻégake'.
5Žaḻa' yebégekle benne' chie' ka' ḻo yeḻa' ẕen chie',
na' góḻgake' ḻo yeḻa' žebele chégake' dot yele.
6Žaḻa' kwéžeya'agake', nich we ḻáwgake' Dios,
zej noe'e ya ntoche' ka' da' zej nla žop ḻa'aten,
7nich yezí'gake' wzón benne' zi'to' ka',
na' góngake' benách yež ka' ẕia,
8na' nich wchéjgake' benne' wnná bia' ka' do ya,
na' ḻezka' benne' waḻe ka',
9na' nich wžía yí'gake' benne' ka' ka wnnakze Dios gaken chégake'.
Da' ni gaken yeḻa' ba nez ẕen chegak benne' ka' che Dios.
¡Ga'n ẕen X̱anžon'!
Zur Zeit ausgewählt:
SALMOS 149: zty
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2002, Wycliffe Bible Translators, Inc. All rights reserved.