Zakaliya 14
14
Yelusalema na miyati yeka ya vanu
1Kengeni, litangwa lya Shukulu Kalunga lyakusompa lili muyehi. Co Yelusalema vakaipukula, co vije vyakupukula vakavipangela akati keni. 2Shukulu Kalunga akakungulula miyati yoshe ya vanu nakulwisa Yelusalema. Nganda vakayambata, co vakapukula vyuma vya mu vinjuvo, vanakazi vakavazivisa shwamwa. Co litambelo lya vanu vakaya ku vunzinda, oloni vaje vakasalao kuvakavatundisa mu nganda. 3Asinoni Shukulu Kalunga akaya nakulwa na miyati ya vanu vaje, ngwe mwalwile mu visimbu vya kunima. 4A litangwa lije akemana a Munkinda wa Oliveta, mu ngangela ya Yelusalema. Asinoni Munkinda wa Oliveta ukatavuka akati kushangumuka mu ngangela kweta na mu kangombe ka yambi, co cimbongo cakama manene cikakala mukati. Co litambelo limo lya munkinda likashwenya ku kunto likwavo mu mbwela. 5Co yeni mukatewela mu cimbongo eci caangununa munkinda mu mitambela ivali. Mukatewa ngwe muvatewele vakukulwila veni omo lifuti lyajajele a simbu ya Mwene Uziya wa mu Yunda. Shukulu Kalunga Njambi yange akaija, akaija amo na tungelo twendi vakujela.
6A litangwa lije, kukukakala lisika nambe mema akukonda, 7nambe lisusulungu, likapwa litangwa lya ceke nameme ku simbu ya vutsiki. Vavenya Shukulu Kalunga ikeye lika azivuka litangwa eli.
8 #
Ezek 47:1; Yow 7:38; Kuj 22:1 Omo litangwa lije likaija, mema akutonola njenje akatuuka kutunda mu Yelusalema, co litambelo lyawo limo likaya ku Lishali lya Kutsa, co litambelo likwavo lalo likaya ku Lishali lya Menditelenyani. Co akaita myaka yoshe, cisika na ndombo akakalako simbu yoshe. 9Asinoni Shukulu Kalunga akapwa mwene wa ano asi oshe, co munu woshe akalemesa kupwa Njambi nakumuzivuka a lizina lyendi.
10Lifuti lyoshe, kutunda ku Ngemba ku kunto nakweta ku Limone mu mbwela, likanyekumuka. Yelusalema ikakala a mwela wayo akulunduka, co nganda ikatunda ku Cikolo ca Mbenjemani nakweta ku Cikolo ca mu Mbango, kuje kwakele cikolo calaja, kutunda ku Kaposhi ka Hananele, nakweta ku cikamwino ca vinyu. 11#Kuj 22:3 Vanu vakakala kuje mu kwoloka, co kukukakala lalo lyova lyakunyonga.
12Shukulu Kalunga akanena mushongo wakukomokesa a miyati ya vanu voshe vaje valwisa Yelusalema. Situ yavo ikavola oku vakevo vacili nakuyoya, mesho avo na vindaka vyavo vikavola.
13A simbu ije Shukulu Kalunga akavaiya-yiisa na lyova ngeci munu na munu akakwata munu uje yakalyata nendi nakumulwisa. 14Vanu va mu Yunda vakalwa mukuvingilikiya Yelusalema. Co vakambata vufuko vwakupukula vwavungi vwa miyati ya vanu voshe, ngolinde na siliva na vuzalo.
15Co mushongo wakukomokesa lalo ukakala a tuvalu, na a vamula, na a tumelo, na a vimulu, na a tusitu voshe vaje vakakala mu vilombo vya vitozi.
16 #
VaLe 23:39-43
Asinoni vaje vasaleleo ku miyati yoshe ya vanu vaje valwisile Yelusalema vakaya ku Yelusalema a mwaka na mwaka mukulemesa Shukulu Kalunga Muka-nzili yoshe ngwe mwene, co vakalisamba a Ciwano ca Mapapela. 17Nga muyati umo wa vanu vakavyana kuya nakulemesa Shukulu Kalunga Muka-nzili yoshe, co nyonzi kuyikanyokela mu lifuti lyavo. 18Nga vaka-Ingito vakavyana kulisamba a Ciwano ca Mapapela, co navo vakavinja mushongo wa cifwa cimo uje wakatuma Shukulu Kalunga ku muyati woshe wa vanu vaje vakavyana kuyako. 19Eci cikapwa cihiso ca a Ingito na a miyati ya vanu voshe nga kuvakalisamba Ciwano ca Mapapela.
20A litangwa lije vakasoneka a vingenjo vya tuvalu ngwavo, “Vyakukundika kuli Shukulu Kalunga.” Vindeo vya mu Njuvo ya Shukulu Kalunga vikapwa vyakujela ngwe malonga a ku mutula. 21Vindeo vyoshe vya mu Yelusalema na mu Yunda mwoshe vakavyangunwina kwavyo lika nakuvipangesa mukulemesa Shukulu Kalunga Muka-nzili yoshe. Co vanu vaje vakombelela vin̄ombelo vakavipangesa akutelekamo situ yakukombelela. Omo simbu ije iketa, kukukakala muka-kulandesa mu Njuvo ya Shukulu Kalunga Muka-nzili yoshe.
Zur Zeit ausgewählt:
Zakaliya 14: MBB
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
The Bible in Mbunda ©The Bible Society of Zambia, 2006