Zakaliya 12
12
Kupatuka kwa Yelusalema kwa kulutwe
1Awa akewo majwi a Shukulu Kalunga kuli Isalele, Shukulu Kalunga uje wajangumwine melu, uje watangele asi, nakwana mwonyo kuli munu. Ikeye alinakwendeka ngwendi, 2“Njikapwisa Yelusalema ngwe nganja ya vinyu, miyati ya vanu vaje vanazengelekako vakanwako, co vakapelyangela ngwe vaka-kupenda. Co omo vakavandamena Yelusalema mukuyilwisa, co na vinganda vikwavo vya mu Yunda vakavivandamena mukuvilwisa lalo. 3Oloni omo simbu ije iketa, Yelusalema njikaipwisa ngwe limanya lyakulema, muyati woshe wa vanu vaje vakeseka kulijundula vakavulumuka. Co miyati yoshe ya vanu va mu kaye vakalipandakana amo nakuyilwisa. 4A simbu ije njikayiya-yiisa tuvalu twavo twoshe, co vaka-kulondao voshe vakapwa viyambangani. Njikanyunga vanu va mu Yunda, oloni njikatsitsivalesa mesho a tuvalu twa vitozi vavo. 5Asinoni vikota vya Yunda vakalyendekesa vakevo vavenya ngwavo, ‘Shukulu Kalunga Njambi Muka-nzili yoshe akana nzili kuli vanu vendi vaje vakala mu Yelusalema!’
6“A simbu ije vikota vya Yunda njikavapwisa ngwe tuhya twa mu shwata nambe ngwe tuhya twa mu lihya lya vimbuto vyakuhya, vakanyongesa miyati yoshe ya vanu vaje vanalyata navo. Co vanu va mu Yelusalema vakakala mu kwoloka mu nganda.
7“Yange Kalunga, njikahyanesa mbunga ya mashwalale va mu Yunda akulivanga, ngeci kasingimiko ka vatekulwila va Ndaviti na kasingimiko ka vanu va mu Yelusalema kesi kakatuvakane ka vanu va mu Yunda. 8A simbu ije Shukulu Kalunga akanyunga vaje vakala mu Yelusalema, nameme vaje vakuzeya manene akati kavo vakakala na nzili ngwe yakele nayo Ndaviti. Vatekulwila va Ndaviti vakashwana ngwe kangelo ka Shukulu Kalunga, ngwe Njambi vene vavenya. 9Co a simbu ije njikanyongesa muyati woshe wa vanu vaje vakeseka kulwisa Yelusalema.
10 #
Yow 19:37; Kuj 1:7 “Njikashulisa vatekulwila va Ndaviti na vanu veka va mu Yelusalema na munzinzime wa mema ku mbunge na munzinzime wakulombela. Vakakenga kuli uje ivativile likunga nakumutsiya, co vakamulila ngwe vaje vanatsisa munavo umolika. Vakalila manene, ngwe vaje vanatsisa munavo wa ntwatwa umolika wa munalume. #Mat 24:30; Kuj 1:7 11A litangwa lije kukakala kulila kwakama mu Yelusalema ngwe kulila kwakulilila Handandelimone#12:11 HANDANDELIMONE: Amo lizina lya Mbale, njambi wa vimena mu Kanana na Silya. Omo vimena vyajujwamene nakuma a mwaka, vaka-kulemesa njambi ou vayongwele ngeci na njambi yavo natsi lalo, co valilile kutsa kwendi. mu cana ca Mengindo. 12Lifuti likalila, naanga na naanga vakalilila kwavo lika, vatekulwila va ku naanga ya Ndaviti, na vatekulwila va ku naanga ya Natane, 13na vatekulwila va ku naanga ya Levi, na vatekulwila va ku naanga ya Shimei, na vinaanga vikwavo vyoshe.” 14Naanga na naanga vakalilila kwavo lika, vanalume va ku naanga na naanga vakalilila kwavo lika kulyangunuka na vanakazi.
Zur Zeit ausgewählt:
Zakaliya 12: MBB
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
The Bible in Mbunda ©The Bible Society of Zambia, 2006