Johanes 4
4
Jesus rät to eene samaritische Fru
1Aus de Har ieescht wist, daut de Farisäa jehieet hauden, daut Jesus mea Jinja muak un deept aus Johanes, #Joh 3,22.26 2wan Jesus selfst uk nich deepen deed, oba de Jinja deeden, 3veleet hee Judäa un jinkj wada no Galiläa. 4Hee must oba derch Samaria reisen.
5Hee kjeem dan en Samaria no de Staut Siechar, dicht bie daut Stekj Launt, daut Jakob sienen Sän Josef jejäft haud. #1Mo 48,22; Jos 24,32 6Doa wia de Jakobsborm. Wiels Jesus meed wia von siene Reis, sad hee sikj bie däm Borm dol. Daut wia aul Meddach. 7Dan kjeem eene Fru von Samaria doahan toom Wota holen. Jesus säd to ar: Jeff mie waut to drinkjen! 8Siene Jinja wieren no de Staut jegonen äten kjeepen. 9Dan säd de Fru von Samaria to am: Woo kjemt daut, daut du mie no een Drunk Wota frajchst, un doabie best du een Jud un ekj eene samaritische Fru? Wiels de Juden haben met de Samarita nuscht to doonen. #Luk 9,52-53 10Jesus auntwuad un säd to ar: Wan du de Gottesgow kjansd, un wist wäa dit es, dee to die sajcht: Jeff mie to drinkjen, dan wurscht du am jefroacht haben, un hee wudd die läwendjet Wota jejäft haben. #Joh 7,38-39
11De Fru säd to am: Har, du hast nuscht, wuamet du schapen kaust, un de Borm es deep. Wua kjrichst du dan daut läwendje Wota häa? 12Best du jrata aus ons Voda Jakob, dee ons disen Borm jeef, ut däm hee selfst un siene Säns un sien Vee drunken? 13Jesus auntwuad un säd to ar: Wäa von dit Wota drinkjt, däm woat wada darschten. #Joh 6,58 14Wäa oba daut Wota drinkjt, daut ekj jäw, däm woat niemols mea darschten. Daut Wota daut ekj jäw, woat en am eene emma ranende Kjwal, un jeft eewjet Läwen. #Psa 36,10; Joh 6,35; 7,38-39
15De Fru säd to am: Har, jeff mie daut Wota, daut mie nich mea darschten woat, un ekj nich mea bruck komen, Wota schapen! 16Jesus säd to ar: Go roop dienen Maun, un komm wada häa! 17De Fru säd to am: Ekj hab kjeenen Maun. Jesus säd to ar: Du best rajcht wan du sajchst: Ekj hab kjeenen Maun. 18Du hast fief Mana jehaut, un dee, dän du nu hast, es nich dien Maun. Doa hast du de Woarheit jerät.
19De Fru säd to am: Har, ekj see, daut du een Profeet best. 20Onse Vodasch haben opp disen Boajch aunjebät, un de Juden sajen, Jerusalem es de Staut, wua eena aunbäden saul. #5Mo 12,5; Psa 122,1-9 21Jesus säd to ar: Fru, jleew mie, de Tiet kjemt, daut jie dän Voda nich opp disen Boajch, uk nich en Jerusalem aunbäden woaren. 22Jie Samarita weeten nich, waut jie aunbäden. Wie weeten, waut wie aunbäden, wiels daut Heil kjemt von de Juden. #2Kjen 17,29-41; Jes 2,3 23Oba de Tiet kjemt, un es nu aul, daut de woarhauftje Aunbäda dän Voda em Jeist un en de Woarheit aunbäden woaren. No soone Aunbäda sieekjt de Voda. 24Gott es Jeist, un dee am aunbäden, motten am em Jeist un en de Woarheit aunbäden. #Reema 12,1; 2Kor 3,17
25De Fru säd to am: Ekj weet, daut de Messias kjemt, dee doa Christus heet. Wan dee komen woat, dee woat ons aules dietlich moaken. #Joh 1,41 26Jesus säd to ar: Ekj, dee met die räd, sie de Messias.
27Un doaräwa kjeemen siene Jinja, un see wundaden sikj, daut hee met eene Fru räd. Oba kjeena säd: Waut sieekjst du?, ooda: Wuarom rätst du met ar? 28De Fru leet äare Wotakruck stonen un jinkj en de Staut nenn un säd to de Menschen: 29Komt un seet eenen Maun, dee mie aules jesajcht haft, waut ekj jedonen hab! Kunn dit de Christus sennen? 30Dan jinjen see ut de Staut rut un kjeemen no Jesus.
31Entweschen säden de Jinja to am: Liera, #4,31 ooda Rabi at doch! 32Oba hee säd to an: Ekj hab waut to äten, wua jie nuscht von weeten. 33Dan säden de Jinja eena toom aundren: Haft am wäa waut to äten jebrocht? 34Jesus säd to an: Mien äten es daut, daut ekj däm sienen Wellen doo, dee mie jeschekjt haft, un sien Woakj verechten doo. #Joh 6,38; 17,4 35Saj jie nich: Daut sent noch vea Moonat bat de Arnt Tiet kjemt? Oba ekj saj junt: Moakt eemol de Uagen op un kjikjt no de Arnt, dee es aul riep un reed toom arnten. #Mat 9,37 36Wäa de Arnt enbrinjt, kjricht Loon un saumelt Frucht fa daut eewje Läwen, soo daut dee, dee doa seit, un dee, dee doa arnt, sikj toop freien kjennen. 37Wiels hia es dee Spruch woa: Eena seit un dee aundra arnt. 38Ekj hab junt jeschekjt, daut to arnten, wuafäa jie nich jeoabeit haben. Aundre haben de Oabeit jedonen, un jie sent en äare Oabeit nenn jekomen.
39Väl Samarita en dee Staut jleewden aun am, wiels de Fru to an säd: Hee haft mie aules jesajcht, waut ekj jedonen hab. 40Aus de Samarita no am kjeemen, prachaden see am, daut hee bie an bliewen sull. Un hee bleef doa twee Doag. 41Un derch daut, waut hee to an räd, jleewden noch väl mea aun am. 42Dan säden see to de Fru: Nu jleew wie nich mea bloos wäajen daut, waut du ons sätst. Wie haben nu selfst jehieet, un wie weeten, daut dit werkjlich Christus, de Heilant fa de Welt es. #Apost 8,5-8
Jesus heelt dän Sän von eenem Rejierungs Beaumten
43Om twee Doag veleet Jesus doa un jinkj no Galiläa. #Mat 4,12 44Jesus säd selfst, daut een Profeet en sienem ieejnen Launt nich jeieet woat. #Mat 13,57 45Aus hee dan no Galiläa kjeem, neemen de Galiläa am opp, wiels see wieren uk en Jerusalem opp däm Fast jewast un hauden jeseenen, waut hee doa aules jedonen haud. #Joh 2,23
46Jesus kjeem dan wada no Kana en Galiläa, wua hee daut Wota to Wien jemoakt haud. Un doa wia een Rejierungs Beaumta von Kapernaum, dee eenen kranken Sän haud. #Joh 2,1.9 47Aus dee hieed, daut Jesus von Judäa no Galiläa jekomen wia, jinkj hee han un prachad am, to komen un sienen Sän to heelen, dee doodeskrank wia. 48Dan säd Jesus to am: Wan jie Menschen nich Tieekjens un Wunda seenen, well jie nich jleewen. #Joh 2,18; 1Kor 1,22 49De Rejierungs Beaumta säd to am: Har, komm ea mien Kjint stoaft! 50Jesus säd to am: Go trigj, dien Sän läft. De Mensch jleewd, waut Jesus säd, un muak sikj opp dän Wajch. 51Un opp däm Trigjwajch kjeemen am siene Deena entjäajen un säden to am: Dien Sän läft. 52Hee fruach an, om woone Tiet daut met am wia bäta jeworden. Un see säden: Jistren, Klock eent nomeddach veleet am daut Feeba. 53Dan sach de Voda, daut daut krakjt dee Tiet jewast wia aus Jesus to am jesajcht haud: Dien Sän läft. Un hee selfst, un siene gaunze Famielje kjeemen toom Gloowen. 54Dit wia nu daut tweede Tieekjen, daut Jesus deed, aus hee von Judäa no Galiläa jekomen wia. #Joh 2,11
Zur Zeit ausgewählt:
Johanes 4: PB
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Plautdietsch Bible © 2003 Kindred Productions and United Bible Societies Association, Inc.