Matiyew 3
3
Zaŋ Batist a zəlata ndaw hay ma ka mbəɗadama mendzey ta
(Mk 1.2-6; Lk 3.1-6; Zŋ 1.19-23)
1Da har ana ŋga na na, Zaŋ Batis ma tsarawa, a tələkey mey da palah ma Zudey: 2«Mbəɗadama mendzey kwar ba, Slala ma 'ərlam ka gurawa ba.» 3Ndaw sek Ezayi a tsawa na ka ŋga, ŋga me ləvey:
«Vəɗe ma ɗay a tsənawa da palah,
ləmadama buwal ma Bay’ərlam.
Ləmadəmara tsəveɗ aŋga hay dender dender.»
4Zana ma Zaŋ ana me pey ka vaw na, ma mbez ma zlegweme, ma dzuwa ha hərap da bəzay hwoɗ ta kanda ma həzlay. Tek aŋga me zəmey na hwayok ta 'uwam ma ley. 5Arka na ndaw ma Zerulem hay, ma Zude, ma dala ma Zurdeŋ hay tabiya ha ma dawam ka tsakay ŋga. 6Zaŋ tok na a dzuhəɓadata a yam da wayaŋ ma Zurdeŋ, taya tey na a ɓadama meŋgəsey ta hay.
Zaŋ a zəley ndaw hay ma mbəɗada mendzey
(Lk 3.7-9)
7Andza ŋga ma nəkadata Fariziyeŋ hay ta Sadusieŋ hay haɗadzidzay, a səmawaha ma da dzuhəɓey vaw da har aŋga na, ma ləvatar: «Gwalay ma kutsesl eɗey hay, ma ɓakwar wewer ma da ləhey da metsey mevel ma Bay'ərlam ma da sawa na na way? 8Ekəɗey na kam tek na, ma ɓada ha mbəɗada me mendzey kwar ba na; 9ka da dzalam ka 'ar vaw kwar ana me ləvey: ‹la na, baba la na Abraham tsa zlay›. Hərway i ɓadakwar, ŋgwa neney hay na, Bay ma Bəla a slafa ma təradata bəzey ma Abraham ahiya. 10Ekəɗey na zlamba ma wa vaw aha tsoy, ma da rətsey salslasləlay ma vəɗe tek hay, mendzey ma vəɗe ma tek ma yam bəzey hayakakay ana hay na, a da rətsəmata ba, a da kuyadəmata ba a waw.
Medzuhəɓey da yam ta medzuhəɓey da waw
(Mk 1.7-8; Lk 3.15-18; Zŋ 1.24-28)
11«Yah na, i dzuhəɓadakwar na a yam, ma ɓada ma mbəɗey mendzey, ama ndaw ma da sawa da dəba ɗaw ana na, gədaŋ aha a fənaya: i ɗa ndaw aha ma tsukwadara tahərak aŋga da sek kakay. Ŋga na a da dzuhəɓadakwar na da Mesəfrey Kokwoɗ ana ta waw. 12Vəley ŋga me kəfey daw ma zəga ha da har, a da petsey gəlaŋ aŋga. Daw hayna na a həla a dey. Ama dzandzar ana na, a da kakəra ba da waw me mətsey kakay ana.»
Zaŋ a dzuhəɓada Yezu a yam
(Mk 1.9-11; Lk 3.21-22; Zŋ 1.29-34)
13Arka Yezu ma tsarawa, a sawa da Galiley ha kasl a Zurdeŋ ka tsakay ma Zaŋ, ma ŋga ka dzuhəɓada a yam. 14Zaŋ a wuɗey akwa na ma mbəɗar mey, ma ləvar: «Ma da dzuhəɓadaya dzadzak na kah tok na, ka sawa ka tsakay ɗaw ma i ka dzuhəɓadaka na ma mey mey?» 15Ama Yezu na ma mbəɗar kava: «Ekəɗey na mbəkada ka key andza ha, təɗe ŋga lama i da ndasladama dzerey tabiyaha na andza ha.» Arka na ŋga ma mbəkada ka key andza ha. 16Andza ma dzuhəɓadama ba na, Yezu ma bawa da yam. Arka ndasl ma 'ərlam me ndzesləɗey, ŋga ma nəkada Mesəfrey ma Bay ma Bay Bəla a harɗawa ha andza hwoɗgwam ma sawa ka ŋga. 17Arka Vəɗe ma ɗay ma tsənawa da 'ərlam a ləvey: «Neney na Bəzey ma mey 'ərev a ɗaw, ma daya 'ar na ŋga, i ma wala na.»
Zur Zeit ausgewählt:
Matiyew 3: MOF
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Le Nouveau Testament en langue Mofu © 2007 Alliance Biblique du Cameroun